സഹോദരിയുടെ ഭര്ത്താവിനാല് കൊല്ലപ്പെട്ട പിഎച്ച്ഡി വിദ്യാര്ത്ഥിനിയുടെ പഴയ ഫേസ്ബുക്ക് പോസ്റ്റ് വൈറല്: ഞെട്ടലില് ന്യൂയോര്ക്ക്
By: 600002 On: Jul 2, 2026, 11:48 AM
പി പി ചെറിയാന്
ന്യൂയോര്ക്കില് സഹോദരിയുടെ ഭര്ത്താവിനാല് ക്രൂരമായി പീഡിപ്പിക്കപ്പെടുകയും കൊല്ലപ്പെടുകയും ചെയ്ത വിക്ടോറിയ കാസില് (25) എന്ന പിഎച്ച്ഡി വിദ്യാര്ത്ഥിനിയുടെ പഴയൊരു സോഷ്യല് മീഡിയ പോസ്റ്റ് ഇപ്പോള് നോവായി മാറുന്നു. മൂന്ന് വര്ഷം മുമ്പ് തന്റെ സഹോദരിയുടെ വിവാഹദിവസം, പ്രതിയായ ജോസഫ് ഹോര്ണറെ (27) 'ലോകത്തിലെ ഏറ്റവും അത്ഭുതകരമായ മനുഷ്യരില് ഒരാള്' എന്ന് വിശേഷിപ്പിച്ചുകൊണ്ടായിരുന്നു വിക്ടോറിയ ഫേസ്ബുക്കില് ചിത്രങ്ങള് പങ്കുവെച്ചിരുന്നത്.
നോര്ത്ത് മാസാപെക്വയിലെ വീട്ടില് വെച്ചാണ് വിക്ടോറിയ കൊല്ലപ്പെട്ടത്. ജോസഫിന്റെ ഭാര്യ (വിക്ടോറിയയുടെ സഹോദരി) ഒരു യാത്രയിലായിരുന്ന സമയത്തായിരുന്നു സംഭവം.
പിയാനോ മാറ്റിവെക്കാന് സഹായം ചോദിച്ചാണ് ജോസഫ് വിക്ടോറിയയെ വിളിച്ചുവരുത്തിയത്. തുടര്ന്ന് പിന്നില് നിന്ന് കഴുത്തുഞെരിച്ച് ബോധംകെടുത്തിയ ശേഷം ക്രൂരമായി പീഡിപ്പിച്ചു കൊലപ്പെടുത്തുകയായിരുന്നു.
ഒരു സ്കൂള് സംഗീത അധ്യാപകനായ ജോസഫ്, കൊലപാതകത്തിന് ശേഷം സ്വയം 911-ല് വിളിച്ച് പോലീസിനെ വിവരമറിയിക്കുകയും കുറ്റം സമ്മതിക്കുകയുമായിരുന്നു. കഴിഞ്ഞ പത്തു വര്ഷമായി തനിക്ക് വിക്ടോറിയയോട് അമിതമായ അഭിനിവേശമുണ്ടായിരുന്നുവെന്ന് പ്രതി പോലീസിനോട് വെളിപ്പെടുത്തി. ജോസഫിനെ പോലീസ് സംഭവസ്ഥലത്തുനിന്നുതന്നെ അറസ്റ്റ് ചെയ്തു.