എഡ്മൻ്റണിൽ കനത്ത മഴ, നദിയിലെ ജലനിരപ്പ് ഉയരുന്നു

 

എഡ്മൻ്റൺ നഗരം കനത്ത മഴയ്ക്കാണ് ഈ വേനൽക്കാലത്ത് സാക്ഷ്യം വഹിക്കുന്നത്. കനത്ത മഴയെത്തുടർന്ന് നോർത്ത് സസ്കാച്ചെവൻ നദിയിൽ  ജലനിരപ്പ് ഉയരുകയും വെള്ളപ്പൊക്കത്തിനിടയാക്കുകയും ചെയ്തു.  നദിയിലെ ജലനിരപ്പ് ഉയർന്നതിനെത്തുടർന്ന് സുരക്ഷ മുൻനിർത്തി ബോട്ട് സർവീസുകൾ താൽക്കാലികമായി നിർത്തിവെച്ചു. മണ്ണൊലിപ്പ് സാധ്യതയുള്ളതിനാൽ 'ഹൈ ലെവൽ ബ്രിഡ്ജിൻ്റെ' ഒരു വശത്തെ നടപ്പാത അടച്ചിരിക്കുകയാണ്. കൂടാതെ, കാനഡാ ദിനാഘോഷങ്ങളുടെ ഭാഗമായുള്ള പടക്കക്കണ്ണാട്ടങ്ങൾ നദീതീരത്ത് നിന്ന് കാണുന്നതിനും വിലക്കുണ്ട്.

മലനിരകളിൽ നിന്നുള്ള മഞ്ഞുരുകലും കനത്ത മഴയും കാരണം വർഷത്തിലെ ഈ സമയത്ത് നദിയിൽ വെള്ളം ഉയരുന്നത് പതിവാണെന്ന് കാലാവസ്ഥാ വിദഗ്ദ്ധർ പറയുന്നു. നദിയിലൂടെ സെക്കൻഡിൽ 1,100 ക്യുബിക് മീറ്റർ വെള്ളമാണ് ഇപ്പോൾ ഒഴുകുന്നത്.  2010-ന് ശേഷം ആറ് തവണ നദിയിൽ ഇതേ രീതിയിൽ വെള്ളം ഉയർന്നിട്ടുണ്ട്. നിലവിൽ നദിയിൽ ജലനിരപ്പ് ഉയർന്നിട്ടുണ്ടെങ്കിലും, നഗരത്തിൻ്റെ ചരിത്രത്തിലെ വലിയ പ്രളയങ്ങളുമായി താരതമ്യം ചെയ്യുമ്പോൾ ഇത് വളരെ കുറവാണ്.

എഡ്മൻ്റണിൻ്റെ ചരിത്രത്തിലെ ഏറ്റവും ഭയാനകമായ വെള്ളപ്പൊക്കമുണ്ടായത് 1915 ജൂൺ 28-നാണ്. അന്ന് സെക്കൻഡിൽ 5,800 ക്യുബിക് മീറ്റർ വെള്ളമാണ് നദിയിലൂടെ ഒഴുകിയത്. ഇത് വിഖ്യാതമായ നയാഗ്ര വെള്ളച്ചാട്ടത്തിലൂടെ ഒഴുകുന്ന വെള്ളത്തിൻ്റെ ഇരട്ടിയിലധികമാണ്. അന്ന് നദീതീരത്തെ വ്യവസായങ്ങളും ജനവാസ മേഖലകളും പൂർണ്ണമായി തകർന്നുപോയെങ്കിലും ഭാഗ്യവശാൽ ആരുടെയും ജീവൻ നഷ്ടപ്പെട്ടില്ല.

നഗരത്തിൻ്റെ സമീപകാല ചരിത്രത്തിലെ ഏറ്റവും വലിയ വെള്ളപ്പൊക്കമുണ്ടായത് 1986 ജൂലൈ 19-നാണ്. അന്ന് സെക്കൻഡിൽ 4,520 ക്യുബിക് മീറ്റർ വേഗതയിലായിരുന്നു ഒഴുക്ക്. ഇത് ക്ലോവർഡെയ്ൽ, റോസ്‌ഡെയ്ൽ തുടങ്ങിയ പ്രദേശങ്ങളെ വെള്ളത്തിനടിയിലാക്കി. ഈ രണ്ട് മഹാപ്രളയങ്ങളിലും നദിയിൽ എത്രത്തോളം വെള്ളം ഉയർന്നിരുന്നു എന്ന് ജനങ്ങൾക്ക് മനസ്സിലാക്കാൻ 'വാൾട്ടർഡെയ്ൽ പാലത്തിന്' താഴെ പ്രത്യേക അടയാളങ്ങൾ ഇന്നും സൂക്ഷിച്ചിട്ടുണ്ട്.