യു എസ് സുപ്രീം കോടതി സുപ്രധാന വിധികള്; പ്രസിഡന്റിന്റെ അധികാരം വിപുലപ്പെടുത്തി, മെയില്-ഇന് ബാലറ്റുകള്ക്കും അനുകൂല തീരുമാനം
By: 600002 On: Jun 30, 2026, 8:53 AM
ഫിലിപ്പ് തോമസ്
വാഷിംഗ്ടണ്: അമേരിക്കന് സുപ്രീം കോടതി രാജ്യത്തിന്റെ ഭരണ-തിരഞ്ഞെടുപ്പ് സംവിധാനങ്ങളെ ബാധിക്കുന്ന രണ്ട് സുപ്രധാന വിധികള് പ്രസ്താവിച്ചു.
ആദ്യ വിധിയില്, സ്വതന്ത്ര ഫെഡറല് ഏജന്സികളുടെ മേധാവികളെ പ്രസിഡന്റിന് പദവിയില് നിന്ന് നീക്കാനുള്ള അധികാരം കൂടുതല് വിപുലീകരിക്കുന്ന നിലപാടാണ് കോടതി സ്വീകരിച്ചത്. ഇതോടെ പ്രസിഡന്റിന് എക്സിക്യൂട്ടീവ് ശാഖയിലെ നിയന്ത്രണം കൂടുതല് ശക്തിപ്പെടുമെന്ന് വിലയിരുത്തപ്പെടുന്നു.
മറ്റൊരു പ്രധാന വിധിയില്, നിശ്ചിത സമയപരിധിക്കകം തപാലില് അയച്ച മെയില്-ഇന് ബാലറ്റുകള് വൈകി തിരഞ്ഞെടുപ്പ് അധികാരികള്ക്ക് ലഭിച്ചാലും, സംസ്ഥാന നിയമം അനുവദിക്കുന്ന ഗ്രേസ് പീരിയഡിനുള്ളില് ലഭിക്കുന്നവ സാധുവായി എണ്ണാമെന്ന നിലപാടും കോടതി ശരിവച്ചു. ഈ തീരുമാനം തപാല് വോട്ടെടുപ്പ് വ്യാപകമായി ഉപയോഗിക്കുന്ന സംസ്ഥാനങ്ങള്ക്ക് നിര്ണായകമായതായി വിലയിരുത്തപ്പെടുന്നു.
ഈ രണ്ട് വിധികളും അമേരിക്കന് പ്രസിഡന്റിന്റെ ഭരണാധികാരവും ഭാവിയിലെ തിരഞ്ഞെടുപ്പ് നടപടിക്രമങ്ങളും സംബന്ധിച്ച ചര്ച്ചകള്ക്ക് പുതിയ വഴിത്തിരിവാകുമെന്ന് രാഷ്ട്രീയ നിരീക്ഷകര് അഭിപ്രായപ്പെടുന്നു.