കാനഡ ഗ്രീനർ ഹോംസ് പദ്ധതി ബ്രിട്ടീഷ് കൊളംബിയയിലേക്കും, പ്രതിവർഷം $1,700 വരെ ലാഭിക്കാം

 

ബ്രിട്ടീഷ് കൊളംബിയ നിവാസികൾക്ക്  ഊർജ്ജ ബില്ലുകളിൽ  വലിയ ലാഭം നേടാൻ സഹായിക്കുന്ന 'കാനഡ ഗ്രീനർ ഹോംസ് അഫോർഡബിലിറ്റി പ്രോഗ്രാം'  ഫെഡറൽ സർക്കാർ വിപുലീകരിച്ചു. ഈ പദ്ധതി വഴി ജനങ്ങൾക്ക് പ്രതിവർഷം 300 ഡോളർ മുതൽ 1,700 ഡോളർ വരെ ലാഭിക്കാൻ സാധിക്കുമെന്നാണ് സർക്കാർ വ്യക്തമാക്കുന്നത്. കുറഞ്ഞ വരുമാനമുള്ളവർക്കും ഇടത്തരം വരുമാനമുള്ളവർക്കും തങ്ങളുടെ വീടുകൾ പരിസ്ഥിതി സൗഹൃദമായി നവീകരിക്കുന്നതിന്  സഹായിക്കുന്ന പദ്ധതിയാണിത്. ഇതിലൂടെ വീടുകളിൽ ഹീറ്റ് പമ്പുകൾ സ്ഥാപിക്കാനും, ഇൻസുലേഷൻ മെച്ചപ്പെടുത്താനും സാധിക്കും.

യോഗ്യരായ ആളുകൾക്ക് യാതൊരുവിധ ചെലവുമില്ലാതെ ഈ നവീകരണങ്ങൾ ചെയ്തു നൽകും. 500 മില്യൺ ഡോളറിലധികം തുകയാണ് ഈ പദ്ധതിക്കായി നീക്കിവെച്ചിരിക്കുന്നത്. ഇതിൽ 300 മില്യൺ ഡോളർ ഫെഡറൽ സർക്കാരിൻ്റെ വിഹിതമാണ്. 35,000-ത്തിലധികം കുടുംബങ്ങൾക്ക് ഇതിൻ്റെ പ്രയോജനം ലഭിക്കും. ബ്രിട്ടീഷ് കൊളംബിയയിൽ BC Hydro, FortisBC എന്നീ സ്ഥാപനങ്ങൾ വഴിയാണ് ഈ പദ്ധതി നടപ്പിലാക്കുന്നത്.  ഉയർന്ന കാര്യക്ഷമതയുള്ള ഇലക്ട്രിക്കൽ ഹീറ്റ് പമ്പുകൾ സ്ഥാപിക്കുക, വീടിൻ്റെ മുകൾത്തട്ട്, പുറം ചുവരുകൾ, ബേസ്‌മെൻ്റ് എന്നിവടങ്ങളിൽ ഇൻസുലേഷൻ പുതുക്കുക, സ്മാർട്ട് തെർമോസ്റ്റാറ്റുകൾ സ്ഥാപിക്കുക, വെൻ്റിലേഷൻ സംവിധാനങ്ങൾ മെച്ചപ്പെടുത്തുക എന്നിവ ഈ പദ്ധതിയിലൂടെ ചെയ്യാനാകും.

നിലവിൽ ഓയിൽ ഹീറ്റിംഗ് സംവിധാനം ഉപയോഗിക്കുന്നവർ അത് മാറ്റി ഹീറ്റ് പമ്പുകളിലേക്ക് മാറുമ്പോൾ പ്രതിവർഷം 1,300 ഡോളറിലധികം ലാഭിക്കാൻ സാധിക്കും. നിലവിൽ ഈ പദ്ധതി വഴി വീടുകൾ നവീകരിച്ചവർക്ക് ശരാശരി 386 ഡോളർ വർഷം തോറും ലാഭിക്കാൻ കഴിയുന്നുണ്ട്. വീടുകളിൽ ചൂടു നിലനിർത്താനും വെള്ളം ചൂടാക്കാനും ഫോസിൽ ഇന്ധനങ്ങൾ ഉപയോഗിക്കുന്നത് വഴിയാണ് 96 ശതമാനത്തിലധികം ഹരിതഗൃഹ വാതകങ്ങളും ഉണ്ടാകുന്നത്. പുതിയ പദ്ധതി വഴി ഇത്തരം മലിനീകരണം വൻതോതിൽ കുറയ്ക്കാൻ സാധിക്കും. പ്രതിവർഷം ഏകദേശം 1.5 ടൺ ഹരിതഗൃഹ വാതക ഉദ്‌വമനം കുറയ്ക്കുകയാണ് പദ്ധതിയുടെ ലക്ഷ്യം. 

ബ്രിട്ടീഷ് കൊളംബിയക്ക് പുറമെ ക്യൂബെക്ക്, നോവ സ്കോട്ടിയ, പി.ഇ.ഐ, മാനിറ്റോബ എന്നീ പ്രവിശ്യകളിലും ഈ പദ്ധതി ലഭ്യമാണ്. എന്നാൽ ഒൻ്റാരിയോ, സസ്‌കാച്ചെവൻ തുടങ്ങിയ പ്രവിശ്യകളിലെ താമസക്കാർ തങ്ങൾക്ക് ഈ ആനുകൂല്യം ലഭിക്കാത്തതിൽ അതൃപ്തി പ്രകടിപ്പിച്ചിട്ടുണ്ട്.