റോബ്ലോക്സും ഡിസ്‌കോർഡും സോഷ്യൽ മീഡിയ ബില്ലിൽ ഇല്ല; ആശങ്കയോടെ മാതാപിതാക്കളും വിദഗ്ദ്ധരും

കുട്ടികൾ വ്യാപകമായി ഉപയോഗിക്കുന്ന റോബ്ലോക്സും ഡിസ്‌കോർഡും സോഷ്യൽ മീഡിയ ബില്ലിൽ ഉൾപ്പെടുത്താത്തതിൽ ആശങ്ക പ്രകടിപ്പിച്ച് മാതാപിതാക്കളും വിദഗ്ദ്ധരും രംഗത്ത്. റോബ്ലോക്സ് (Roblox), ഡിസ്‌കോർഡ് (Discord) തുടങ്ങിയ ഓൺലൈൻ ഗെയിമിംഗ്, മെസ്സേജിംഗ് പ്ലാറ്റ്‌ഫോമുകൾ വഴി കുട്ടികൾ വലിയ രീതിയിൽ ചൂഷണം ചെയ്യപ്പെടുന്നുണ്ടെന്ന് കനേഡിയൻ പോലീസ് നിരന്തരം മുന്നറിയിപ്പ് നൽകുന്നുണ്ട്. എന്നാൽ, കനേഡിയൻ സർക്കാർ പുതുതായി കൊണ്ടുവന്ന 'സേഫ് സോഷ്യൽ മീഡിയ ആക്റ്റിൽ' ഈ പ്ലാറ്റ്‌ഫോമുകളെ ഉൾപ്പെടുത്താത്തതാണ് ആശങ്കയ്ക്ക് വഴിവച്ചിരിക്കുന്നത്.

ഫേസ്ബുക്ക്, എക്സ്  തുടങ്ങിയ പരമ്പരാഗത സോഷ്യൽ മീഡിയ പ്ലാറ്റ്‌ഫോമുകളെ ലക്ഷ്യമിട്ടാണ് പുതിയ ബില്ലിൻ്റെ ഘടന തയ്യാറാക്കിയിരിക്കുന്നത്. ലോകമെമ്പാടുമുള്ള ആളുകളുമായി ആശയവിനിമയം നടത്താൻ സഹായിക്കുന്ന സൈറ്റുകളെയാണ് സർക്കാർ നിലവിൽ സോഷ്യൽ മീഡിയയായി കണക്കാക്കുന്നത്. റോബ്ലോക്സ് പോലുള്ളവ അടിസ്ഥാനപരമായി ഗെയിമിംഗ് ആപ്പുകൾ ആയതിനാൽ, അവ ഈ നിർവചനത്തിന് പുറത്തായി.

എന്നാൽ, ഈ ഗെയിമിംഗ് ആപ്പുകളിലും ആളുകൾക്ക് പരസ്പരം സംസാരിക്കാനും മെസ്സേജ് അയക്കാനും സാധിക്കും. ഈ സൗകര്യം മുതലെടുത്താണ് തീവ്രവാദ ഗ്രൂപ്പുകളും കുറ്റവാളികളും കുട്ടികളെ കെണിയിൽ വീഴ്ത്തുന്നത്. 2024-നും 2025-നും ഇടയിൽ റോബ്ലോക്സുമായി ബന്ധപ്പെട്ട് കുട്ടികൾ ചൂഷണം ചെയ്യപ്പെട്ട ആയിരത്തിലധികം പരാതികൾ ലഭിച്ചിട്ടുണ്ടെന്ന് കനേഡിയൻ പോലീസ് (RCMP) വ്യക്തമാക്കുന്നു.

ഗെയിമിംഗ് ആപ്പുകളിലെ അപകടങ്ങൾ അവഗണിക്കുന്നത് അംഗീകരിക്കാനാകില്ലെന്ന് ചിൽഡ്രൻ ഫസ്റ്റ് കാനഡയുടെ സിഇഒ സാറ ഓസ്റ്റിൻ പറഞ്ഞു. ഈ പ്ലാറ്റ്‌ഫോമുകളെ നിയന്ത്രിക്കാൻ ഡിജിറ്റൽ സേഫ്റ്റി കമ്മീഷനെ ചുമതലപ്പെടുത്തുമെന്ന് സർക്കാർ പറയുന്നുണ്ടെങ്കിലും അതിന് വളരെയധികം സമയമെടുക്കും. അതിനാൽ വരാനിരിക്കുന്ന പാർലമെൻ്റ് സമ്മേളനത്തിൽ ഈ ബില്ലിൽ ആവശ്യമായ മാറ്റങ്ങൾ വരുത്താൻ സർക്കാരിൽ സമ്മർദ്ദം ചെലുത്തുമെന്ന് അവർ വ്യക്തമാക്കി.