ആൽബർട്ടയുടെ വേർപിരിയൽ പ്രശ്നങ്ങൾ പരിഹരിക്കില്ല; ബ്രെക്സിറ്റ് പാഠങ്ങൾ ഓർമ്മിപ്പിച്ച് രാഷ്ട്രീയ നിരീക്ഷകർ

കാനഡയിൽ നിന്നുള്ള ആൽബർട്ടയുടെ വേർപിരിയൽ പ്രശ്നങ്ങൾ പരിഹരിക്കില്ലെന്ന്  മുന്നറിയിപ്പുമായി പ്രമുഖ മാധ്യമപ്രവർത്തകൻ കോൾബി കോഷ്.  കാനഡയിൽ നിന്നുള്ള വേർപിരിയൽ പ്രവിശ്യ നേരിടുന്ന എല്ലാ പ്രതിസന്ധികൾക്കുമുള്ള ശാശ്വത പരിഹാരമാകുമെന്ന് വിശ്വസിക്കുന്നവർ, യുണൈറ്റഡ് കിംഗ്ഡത്തിന് സംഭവിച്ച രാഷ്ട്രീയ-സാമ്പത്തിക പ്രത്യാഘാതങ്ങൾ വിലയിരുത്തണമെന്ന് അദ്ദേഹം നാഷണൽ പോസ്റ്റിൽ എഴുതിയ ലേഖനത്തിൽ ചൂണ്ടിക്കാണിക്കുന്നു.

ബ്രിട്ടൻ യൂറോപ്യൻ യൂണിയൻ വിട്ട് ഇപ്പോൾ ഒരു പതിറ്റാണ്ട് തികയുകയാണെന്നും, എന്നാൽ ഈ തീരുമാനം രാജ്യത്തിന് ഗുണത്തേക്കാളേറെ ദോഷമാണ് വരുത്തിവെച്ചതെന്നും അദ്ദേഹം വ്യക്തമാക്കുന്നു. യൂറോപ്യൻ യൂണിയനിൽ നിന്നും പുറത്തുകടന്നാൽ രാജ്യത്തെ കുടിയേറ്റ പ്രശ്നങ്ങൾ പൂർണ്ണമായി പരിഹരിക്കാൻ കഴിയുമെന്നായിരുന്നു ബ്രെക്സിറ്റ് അനുകൂലികളുടെ പ്രധാന വാദം. എന്നാൽ, പത്ത് വർഷത്തെ അനുഭവങ്ങൾ തെളിയിക്കുന്നത് ഈ ചരിത്രപരമായ തീരുമാനം യുകെയിലെ കുടിയേറ്റ പ്രതിസന്ധികളെ കൂടുതൽ സങ്കീർണ്ണമാക്കുക മാത്രമാണ് ചെയ്തതെന്നാണ്. അതിർത്തികൾ കൂടുതൽ കർശനമാക്കാനും പരമാധികാരം വീണ്ടെടുക്കാനും നടത്തിയ ഈ നീക്കം, പ്രായോഗിക തലത്തിൽ വിപരീത ഫലങ്ങളാണ് ഉണ്ടാക്കിയത്.

ഒരു വലിയ സഖ്യത്തിൽ നിന്നോ ഫെഡറൽ സംവിധാനത്തിൽ നിന്നോ പെട്ടെന്ന് വേർപെട്ടു പോകുമ്പോൾ ഉണ്ടാകുന്ന അദൃശ്യമായ ഭരണപരമായ പ്രതിസന്ധികളുടെ ഉദാഹരണമായാണ് ബ്രെക്സിറ്റ് വിലയിരുത്തപ്പെടുന്നത്.
ഈ പശ്ചാത്തലത്തിൽ, കാനഡയിൽ നിന്നും മാറി ഒരു സ്വതന്ത്ര രാജ്യമായാൽ ആൽബെർട്ട നേരിടേണ്ടി വരുന്ന വൻതോതിലുള്ള സാമ്പത്തിക-സാമൂഹിക ബാധ്യതകളെക്കുറിച്ച് പ്രവിശ്യയിലെ ആളുകൾ  ഗൗരവമായി ചിന്തിക്കേണ്ടതുണ്ടെന്ന് കോൾബി കോഷ് തന്റെ രാഷ്ട്രീയ വിശകലനത്തിലൂടെ ഓർമ്മിപ്പിക്കുന്നു.

സ്വയംഭരണവും സ്വാതന്ത്ര്യവും വാഗ്ദാനം ചെയ്യുന്ന വിഘടനവാദ ആശയങ്ങൾ പലപ്പോഴും യാഥാർത്ഥ്യവുമായി പൊരുത്തപ്പെടാറില്ലെന്ന പാഠമാണ് ബ്രെക്സിറ്റ് നൽകുന്നത്. കാനഡയുമായി നിലനിൽക്കുന്ന രാഷ്ട്രീയ ഭിന്നതകൾക്ക് പരിഹാരം വേർപിരിയലല്ലെന്നും, ബ്രിട്ടന് സംഭവിച്ചതുപോലെയുള്ള തകർച്ചകൾ ഒഴിവാക്കാൻ ഇത്തരം ചരിത്രപരമായ പാഠങ്ങൾ ഉൾക്കൊള്ളാൻ ആൽബെർട്ട തയ്യാറാകണമെന്നും റിപ്പോർട്ടിൽ  പറയുന്നു.