ഭൂമിക്ക് തൊട്ടരികിലൂടെ ഭീമൻ ഛിന്നഗ്രഹം കടന്നുപോകുന്നു; കാനഡയിൽ നിന്ന് കാണാനാകും

പതിനാറാം നൂറ്റാണ്ടിന് ശേഷം ഭൂമിയോട് ഏറ്റവും അടുത്ത ദൂരത്തിൽ ഒരു ഭീമൻ ഛിന്നഗ്രഹം (Asteroid) ഈ വാരന്ത്യത്തിൽ കടന്നുപോകുന്നു. '1997 NC1' എന്ന് പേരിട്ടിരിക്കുന്ന ഈ ഛിന്നഗ്രഹം കാനഡയുടെ ചില ഭാഗങ്ങളിൽ നിന്ന് കാണാൻ സാധിക്കുമെന്ന് ശാസ്ത്രജ്ഞർ അറിയിച്ചു. കാനഡയിലെ പ്രശസ്തമായ 'സി.എൻ ടവറിനേക്കാൾ'  മൂന്നിരട്ടി വലിപ്പമുള്ളതാണ് ഈ ഭീമൻ ഛിന്നഗ്രഹം. ജൂൺ 27-നാണ് ഇത് ഭൂമിക്ക് ഏറ്റവും അരികിലെത്തുന്നത്. എന്നാൽ, ഇത് ഭൂമിക്ക് യാതൊരുവിധ ഭീഷണിയും ഉയർത്തുന്നില്ലെന്ന് കനേഡിയൻ സ്പേസ് ഏജൻസി (CSA) അറിയിച്ചു.

ഭൂമിയിൽ നിന്നും ഏകദേശം 25 ലക്ഷം കിലോമീറ്റർ ദൂരത്തിലാണ് ഇത് കടന്നുപോകുന്നത്. അതായത്, ഭൂമിയിൽ നിന്ന് ചന്ദ്രനിലേക്കുള്ള ദൂരത്തിൻ്റെ ഏതാണ്ട് ഏഴിരട്ടി അകലം. കേൾക്കുമ്പോൾ വലിയ ദൂരമായി തോന്നാമെങ്കിലും, ബഹിരാകാശ കണക്കുകൾ പ്രകാരം ഇത് വളരെ അടുത്താണ്.  നാസയുടെ (NASA) കണക്കുകൾ പ്രകാരം, ക്രിസ്തുവർഷം 1600-ന് ശേഷം ഇതാദ്യമായാണ് ഈ ഛിന്നഗ്രഹം ഭൂമിയോട് ഇത്രയും അടുത്തെത്തുന്നത്. ഇനി 2133-ൽ മാത്രമേ ഇത് ഭൂമിയുടെ ഇത്രയും അരികിൽ വരൂ. 

കാനഡയുടെ തെക്കൻ ഭാഗങ്ങളിൽ ഉള്ളവർക്ക് ശനിയാഴ്ച രാത്രി ആകാശം പൂർണ്ണമായും ഇരുളുന്നതോടെ ഇത് കാണാൻ സാധിക്കും. എന്നാൽ നഗ്നനേത്രങ്ങൾ കൊണ്ട് ഇത് കാണാനാകില്ല; ഒരു ചെറിയ ടെലിസ്കോപ്പ് എങ്കിലും ഇതിനായി ആവശ്യമുണ്ട്. ആകാശത്തെ 'ഒഫിയൂക്കസ്' നക്ഷത്രസമൂഹത്തിന് നേരെ ടെലിസ്കോപ്പ് തിരിച്ചുനോക്കിയാൽ, നക്ഷത്രങ്ങൾക്കിടയിലൂടെ വളരെ പതുക്കെ നീങ്ങുന്ന ഒരു ചെറിയ പ്രകാശബിന്ദുവായി ഇതിനെ കാണാൻ സാധിക്കും. 

ഇത്തരം പ്രതിഭാസങ്ങൾ സാധാരണയായി അഞ്ച് വർഷത്തിൽ ഒരിക്കലാണ് സംഭവിക്കാറുള്ളത്. ഭൂമിക്ക് അപകടമൊന്നും വരുത്താതെ ഇത്രയും അരികിലൂടെ ഒരു ഛിന്നഗ്രഹം കടന്നുപോകുന്നത് ശാസ്ത്രജ്ഞർക്ക് വലിയൊരു അവസരമാണ്. ഇതിൻ്റെ വലിപ്പം, ആകൃതി, ഇതിലടങ്ങിയിരിക്കുന്ന മൂലകങ്ങൾ എന്നിവയെക്കുറിച്ച് കൂടുതൽ പഠിക്കാനും ഇതിൻ്റെ സഞ്ചാരപഥം കൃത്യമായി മനസ്സിലാക്കാനും സഹായിക്കുമെന്ന് ഗവേഷകർ പറയുന്നു.