ഭാര്യയെ കൊന്ന കേസില് 74-കാരന് വധശിക്ഷ; ഫ്ലോറിഡയുടെ ചരിത്രത്തിലെ ഏറ്റവും പ്രായം കൂടിയ പ്രതിക്ക് ഒടുവില് അന്ത്യം
By: 600002 On: Jun 27, 2026, 7:24 AM
പി പി ചെറിയാന്
ഫ്ലോറിഡ: മുപ്പത്തിനാല് വര്ഷം മുമ്പ് ഭാര്യയെ ക്രൂരമായി കുത്തിക്കൊലപ്പെടുത്തിയ കേസില് 74-കാരനായ പ്രതിയുടെ വധശിക്ഷ ഫ്ലോറിഡയില് നടപ്പാക്കി. വ്യാഴാഴ്ച വൈകുന്നേരം ഫ്ലോറിഡ സ്റ്റേറ്റ് ജയിലില് വെച്ചാണ് ഡസ്റ്റി റേ സ്പെന്സര് (Dusty Ray Spencer) എന്ന പ്രതിയുടെ വധശിക്ഷ നടപ്പാക്കിയത്. ഫ്ലോറിഡയുടെ ആധുനിക ചരിത്രത്തില് വധശിക്ഷയ്ക്ക് വിധേയനാകുന്ന ഏറ്റവും പ്രായം കൂടിയ തടവുകാരനാണ് സ്പെന്സര്.
ഈ വര്ഷം ഫ്ലോറിഡയില് നടപ്പാക്കുന്ന ഒന്പതാമത്തെ വധശിക്ഷയാണിത്. ലൂസിയാനയിലെ സ്റ്റാര്ക്കിന് സമീപമുള്ള ഫ്ലോറിഡ സ്റ്റേറ്റ് ജയിലില് വെച്ച് മൂന്ന് മരുന്നുകള് അടങ്ങിയ മാരകമായ ഇന്ജക്ഷന് (Three-drug injection) നല്കിയാണ് ശിക്ഷ നടപ്പാക്കിയത്. വൈകുന്നേരം 6:10-ഓടെ ഇയാളുടെ മരണം സ്ഥിരീകരിച്ചു.
'ക്ഷമിക്കുക, ആ കുടുംബത്തോട് ഞാന് ക്ഷമ ചോദിക്കുന്നു. എന്റെ ആത്മാവിനെ ഞാന് ദൈവകരങ്ങളില് ഏല്പ്പിക്കുന്നു. ഞാന് വരികയാണ് കര്ത്താവേ... ആമേന്,' എന്നതായിരുന്നു ശിക്ഷ നടപ്പാക്കുന്നതിന് തൊട്ടുമുമ്പ് സ്പെന്സറിന്റെ അവസാന വാക്കുകള്.
1991 ഡിസംബറിലാണ് കേസിനാസ്പദമായ സംഭവങ്ങളുടെ തുടക്കം. ഭാര്യ കാരന് സ്പെന്സറിനെ ശ്വാസം മുട്ടിച്ച് കൊല്ലാന് ശ്രമിച്ച കേസില് ജയിലിലായ ഡസ്റ്റി റേ സ്പെന്സര്, പുറത്തിറങ്ങിയാല് തുടങ്ങിയത് അവസാനിപ്പിക്കുമെന്ന് ഭാര്യയെ ഫോണിലൂടെ ഭീഷണിപ്പെടുത്തിയിരുന്നു.
1992 ജനുവരിയില് ജാമ്യത്തിലിറങ്ങിയ ഇയാള്, കാരനെ ആക്രമിക്കുന്നത് തടയാന് ശ്രമിച്ച കൗമാരക്കാരനായ വളര്ത്തു മകനെ ഇസ്തിരിപ്പെട്ടി കൊണ്ട് ക്രൂരമായി മര്ദ്ദിച്ചു. തൊട്ടടുത്ത ആഴ്ച വീടിന് പുറത്തു വെച്ച് കാരന്റെ തലയില് ചെങ്കല്ല് കൊണ്ട് അടിക്കുകയും, മകന് രക്ഷിക്കാന് ശ്രമിച്ചെങ്കിലും പരാജയപ്പെടുകയുമായിരുന്നു. തുടര്ന്ന് നെഞ്ചില് മാരകമായി കുത്തിപ്പരിക്കേല്പ്പിച്ചാണ് ഇയാള് കാരനെ കൊലപ്പെടുത്തിയത്.
ഫ്ലോറിഡ ഡിപ്പാര്ട്ട്മെന്റ് ഓഫ് കറക്ഷന്സിന്റെ 1924 മുതലുള്ള രേഖകള് പ്രകാരം ഇതിനുമുമ്പ് 72 വയസ്സുള്ള രണ്ട് തടവുകാരുടെ വധശിക്ഷ മാത്രമാണ് സംസ്ഥാനത്ത് നടപ്പാക്കിയിട്ടുള്ളത്. എന്നാല് 74-ാം വയസ്സില് ശിക്ഷിക്കപ്പെട്ട സ്പെന്സര് ഈ റെക്കോര്ഡ് ഭേദിച്ചു. വരും ആഴ്ചകളില് (ജൂലൈ 14) ഡെന്നിസ് സോച്ചര് എന്ന മറ്റൊരു 74-കാരന്റെ വധശിക്ഷയും ഫ്ലോറിഡയില് നിശ്ചയിച്ചിട്ടുണ്ട്.
അമേരിക്കന് ചരിത്രത്തില് ആധുനിക കാലത്ത് വധശിക്ഷയ്ക്ക് വിധേയനായ ഏറ്റവും പ്രായം കൂടിയ വ്യക്തി 2018-ല് അലബാമയില് ശിക്ഷിക്കപ്പെട്ട 83-കാരനായ വാള്ട്ടര് ലെറോയ് മൂഡി ജൂനിയര് ആണ്.
2025-ല് മാത്രം ഫ്ലോറിഡയില് 19 പേരുടെ വധശിക്ഷ നടപ്പാക്കിയിരുന്നു. ഇത് സംസ്ഥാന ചരിത്രത്തിലെ ഏറ്റവും ഉയര്ന്ന നിരക്കായിരുന്നു. കഴിഞ്ഞ വര്ഷം അമേരിക്കയില് ആകെ 47 വധശിക്ഷകള് നടപ്പാക്കിയതില് ഏറ്റവും കൂടുതല് ഫ്ലോറിഡയിലായിരുന്നു.
1992-ല് സ്പെന്സറിന് ആദ്യമായി കോടതി വധശിക്ഷ വിധിച്ചെങ്കിലും പിന്നീട് വന്ന നിയമനടപടികളെ തുടര്ന്ന് ശിക്ഷ പുനഃപരിശോധിക്കാന് ഉത്തരവിട്ടിരുന്നു. എന്നാല് കഴിഞ്ഞ ആഴ്ച ഫ്ലോറിഡ സുപ്രീം കോടതിയും, വ്യാഴാഴ്ച യു.എസ് സുപ്രീം കോടതിയും പ്രതിയുടെ അവസാന അപ്പീലും തള്ളിയതോടെയാണ് വധശിക്ഷ നടപ്പാക്കാനായതെന്ന് അധികൃതര് വ്യക്തമാക്കി.