കാനഡയിൽ ഭവനലഭ്യത വർദ്ധിക്കുന്നതായി റിപ്പോർട്ട്: ഏറ്റവും ചിലവ് കുറഞ്ഞ നഗരങ്ങളിൽ ലെത്ബ്രിഡ്ജ് ഒന്നാമത്

 

കാനഡയിലെ ഭൂരിഭാഗം നഗരങ്ങളിലും വീട് വാങ്ങുന്നതിനുള്ള സാമ്പത്തിക ബാധ്യത മുൻവർഷങ്ങളെ അപേക്ഷിച്ച് കുറഞ്ഞതായി വിലയിരുത്തൽ. കാനഡയിലെ പ്രമുഖ റിയൽ എസ്റ്റേറ്റ് കമ്പനിയായ 'റോയൽ ലെപേജ്' പുറത്തുവിട്ട ഏറ്റവും പുതിയ പഠനറിപ്പോർട്ടിലാണ് ഇത് സംബന്ധിച്ച പരാമർശം ഉള്ളത്. പഠനവിധേയമാക്കിയ 62 പ്രധാന നഗരങ്ങളിൽ 61 എണ്ണത്തിലും വലിയ പുരോഗതിയാണ് രേഖപ്പെടുത്തിയിരിക്കുന്നത്. റിപ്പോർട്ട് പ്രകാരം കാനഡയിൽ വീട് വാങ്ങാൻ ഏറ്റവും അനുയോജ്യമായതും സാമ്പത്തിക ലാഭമുള്ളതുമായ 15 നഗരങ്ങളുടെ പട്ടികയും അധികൃതർ പുറത്തുവിട്ടു. ഈ നഗരങ്ങളിലേക്ക് താമസം മാറാൻ പകുതിയിലധികം കനേഡിയൻമാരും താല്പര്യം പ്രകടിപ്പിക്കുന്നുണ്ടെന്നാണ് സർവേ വ്യക്തമാക്കുന്നത്.

പുതിയ പട്ടികയിൽ ആൽബർട്ടയിലെ ലെത്ബ്രിഡ്ജ്  ആണ് വീട് വാങ്ങാൻ ഏറ്റവും ചിലവ് കുറഞ്ഞ നഗരമായി ഒന്നാം സ്ഥാനത്തെത്തിയത്. ഇവിടെ ഒരു വീടിൻ്റെ ശരാശരി വില $338,700 ഡോളറാണ്. അതായത്, ഒരു ശരാശരി കുടുംബത്തിൻ്റെ പ്രതിമാസ വരുമാനത്തിൻ്റെ 19 ശതമാനത്തിൽ താഴെ മാത്രമേ ഭവന വായ്പാ തിരിച്ചടവിനായി വിനിയോഗിക്കേണ്ടി വരുന്നുള്ളൂ. തൊട്ടുപിന്നിൽ ന്യൂ ബ്രൺസ്വിക്കിലെ സെൻ്റ് ജോൺ  രണ്ടാം സ്ഥാനത്തും, മുൻവർഷങ്ങളിൽ ഒന്നാമതായിരുന്ന ഒൻ്റാരിയോയിലെ തണ്ടർ ബേ  മൂന്നാം സ്ഥാനത്തുമെത്തി. ആൽബർട്ടയിലെ റെഡ് ഡീർ, സസ്ക്വെച്ചാനിലെ റജീന എന്നിവയാണ് ആദ്യ അഞ്ച് സ്ഥാനങ്ങളിൽ ഇടംപിടിച്ച മറ്റ് നഗരങ്ങൾ. 

കഴിഞ്ഞ രണ്ട് വർഷങ്ങളായി ടൊറൻ്റോ, വാൻകൂവർ തുടങ്ങിയ മെട്രോപൊളിറ്റൻ നഗരങ്ങളിലെ ഉയർന്ന ഭവനവിലയിൽ നേരിയ കുറവുണ്ടായതും, വിപണിയിൽ വീടുകളുടെ ലഭ്യത വർദ്ധിച്ചതുമാണ് ഈ അനുകൂല മാറ്റത്തിന് കാരണമായി ചൂണ്ടിക്കാണിക്കപ്പെടുന്നത്. വൻനഗരങ്ങളിലെ അമിത ചിലവുകൾ കാരണം ബുദ്ധിമുട്ടുന്ന സാധാരണക്കാർക്ക് ഇത്തരം ചെറുനഗരങ്ങൾ മികച്ചൊരു ബദലാണെന്ന് റോയൽ ലെപേജ് സി.ഇ.ഒ ഫിൽ സോപ്പർ പറഞ്ഞു. വിൻഡ്സർ-എസെക്സ് പോലുള്ള നഗരങ്ങളിൽ മോർട്ട്ഗേജ് നിരക്കുകളിൽ വലിയ കുറവുണ്ടായത് വരും ദിവസങ്ങളിൽ ഈ മേഖലകളിലേക്ക് ജനങ്ങൾ കൂട്ടത്തോടെ കുടിയേറാൻ കാരണമാകുമെന്നാണ് സാമ്പത്തിക വിദഗ്ദ്ധരുടെ വിലയിരുത്തൽ.