ഡോ. സതീഷ് കതുല ഇന്ഡോ-അമേരിക്കന് പ്രസ് ക്ലബ് ചെയര്മാന്
By: 600002 On: Jun 25, 2026, 8:36 AM
ഡോ. മാത്യു ജോയ്സ്
ന്യൂയോര്ക്ക്, ജൂണ് 21: ഇന്ഡോ-അമേരിക്കന് പ്രസ് ക്ലബ്ബിന്റെ (ഐഎപിസി) ഡയറക്ടര് ബോര്ഡ് ചെയര്മാനായി പ്രമുഖ ഡോക്ടറും എഴുത്തുകാരനും അധ്യാപകനും സാമൂഹിക പ്രവര്ത്തകനുമായ ഡോ. സതീഷ് കതുലയെ നിയമിച്ചു. ന്യൂയോര്ക്കിലെ എല്മോണ്ടിലുള്ള കേരള സെന്ററിന്റെ നവീകരിച്ച ഓഡിറ്റോറിയത്തില് നടന്ന ചടങ്ങില് പുതിയ നേതൃത്വസംഘം സത്യപ്രതിജ്ഞ ചെയ്ത് അധികാരമേറ്റു.
ലോകമെമ്പാടുമുള്ള ആയിരക്കണക്കിന് ആളുകള് സോഷ്യല് മീഡിയയിലൂടെ തത്സമയം വീക്ഷിച്ച ചടങ്ങില് ന്യൂയോര്ക്ക് ട്രൈസ്റ്റേറ്റ് മേഖലയിലെ നൂറിലധികം സാമൂഹ്യ സാംസ്കാരിക, ബിസിനസ്, മാധ്യമ രംഗങ്ങളിലെ പ്രമുഖര് പങ്കെടുത്തു. ചടങ്ങില് വിവിധ മേഖലകളില് ശ്രദ്ധേയ സേവനം അനുഷ്ഠിച്ച ഏഴ് പ്രമുഖരെ ലൈഫ് ടൈം അച്ചീവ്മെന്റ് അവാര്ഡുകള് നല്കി ആദരിച്ചു.
ന്യൂയോര്ക്കിലെ ഇന്ത്യന് കോണ്സുലേറ്റിലെ പ്രസ് ആന്ഡ് ഇന്ഫര്മേഷന് കോണ്സല് പിയൂസ് സിംഗ് അവാര്ഡുകള് വിതരണം ചെയ്തു. അമേരിക്കയിലെ ഇന്ത്യന് പ്രവാസികളുടെ നേട്ടങ്ങള് ലോകത്തിന് മാതൃകയാണെന്നും വിവിധ മേഖലകളില് അവര് മികവിന്റെ പുതിയ മാനദണ്ഡങ്ങള് സ്ഥാപിച്ചിട്ടുണ്ടെന്നും അദ്ദേഹം പറഞ്ഞു.
ഐഎപിസി സ്ഥാപക ചെയര്മാന് ജിന്സ്മോന് സക്കറിയയും മുന് ചെയര്മാന് കമലേഷ് മേത്തയും പുതിയ ഭാരവാഹികള്ക്ക് സത്യപ്രതിജ്ഞ ചൊല്ലിക്കൊടുത്തു. മാധ്യമങ്ങള്ക്ക് നല്കിയ പിന്തുണ പരിഗണിച്ച് ബോബ് വര്ഗീസിനെ ഐഎപിസിയുടെ ഓണററി അംഗമായി ഉള്പ്പെടുത്തി.
സ്വീകരണ പ്രസംഗത്തില് ഡോ. സതീഷ് കതുല, ബാല്യകാലത്ത് പത്രങ്ങളും റേഡിയോയും തനിക്ക് ലോകത്തിലേക്കുള്ള ജാലകമായിരുന്നുവെന്ന് അനുസ്മരിച്ചു. തെറ്റായ വിവരങ്ങളും രാഷ്ട്രീയ ധ്രുവീകരണവും നിറഞ്ഞ ഇന്നത്തെ സാഹചര്യത്തില് സത്യം സംരക്ഷിക്കുന്നതില് മാധ്യമപ്രവര്ത്തകര്ക്കുള്ള ഉത്തരവാദിത്തം വലുതാണെന്ന് അദ്ദേഹം പറഞ്ഞു.
''പത്രപ്രവര്ത്തനം വെറും വാര്ത്ത റിപ്പോര്ട്ട് ചെയ്യല് മാത്രമല്ല; അത് സമൂഹത്തോടുള്ള ഉത്തരവാദിത്തവും സ്വാധീനവുമാണ്,'' എന്ന് അദ്ദേഹം പറഞ്ഞു. ഇന്ത്യയും അമേരിക്കയും തമ്മിലുള്ള സാംസ്കാരിക-നയതന്ത്ര ബന്ധങ്ങള് ശക്തിപ്പെടുത്തുന്നതില് മാധ്യമങ്ങള്ക്ക് നിര്ണായക പങ്കുണ്ടെന്നും അദ്ദേഹം അഭിപ്രായപ്പെട്ടു.
ഇന്ഡോ-അമേരിക്കന് പ്രസ് ക്ലബ്ബിന്റെ (ഐഎപിസി) പുതിയ ചെയര്മാനായി ചുമതലയേറ്റ ഡോ. സതീഷ് കതുല, സംഘടനയുടെ ഡിജിറ്റല് സാന്നിധ്യം ശക്തിപ്പെടുത്തുന്നതിനും റിപ്പോര്ട്ടിംഗിലെ ധാര്മിക മാനദണ്ഡങ്ങള് ഉയര്ത്തുന്നതിനും ആരോഗ്യ-ശാസ്ത്ര പത്രപ്രവര്ത്തനത്തിന്റെ നിലവാരം മെച്ചപ്പെടുത്തുന്നതിനും മുന്ഗണന നല്കുമെന്ന് പ്രഖ്യാപിച്ചു.
സ്ഥാപക ചെയര്മാനും ബോര്ഡ് സെക്രട്ടറിയുമായ ജിന്സ്മോന് സക്കറിയ തങ്ങളുടെ നേതൃത്വപരിചയവും ആഗോള മാധ്യമ ശൃംഖലകളുമായുള്ള ബന്ധവും ഐഎപിസിയുടെ പ്രവര്ത്തനങ്ങള്ക്ക് കൂടുതല് കരുത്തേകുമെന്ന് പ്രസ്താവിച്ചു. ചടങ്ങില് സംസാരിച്ച മുന് ചെയര്മാന് കമലേഷ് മേത്ത, ''ഐഎപിസി ഒരു സംഘടന മാത്രമല്ല, സത്യത്തിനും പ്രാതിനിധ്യത്തിനും വേണ്ടിയുള്ള ഒരു പ്രസ്ഥാനമാണ്'' എന്ന് അഭിപ്രായപ്പെട്ടു.
ഐഎപിസി സ്ഥാപക പ്രസിഡന്റ് അജയ് ഘോഷ്, മാധ്യമപ്രവര്ത്തനം ജനാധിപത്യത്തെ ശക്തിപ്പെടുത്തുന്ന ദൗത്യമാണെന്ന് ചൂണ്ടിക്കാട്ടി. ചടങ്ങില് വൈസ് ചെയര്മാന് ഡോ. മാത്യു ജോയിസ് എഡിറ്റ് ചെയ്ത 'ഐഎപിസി ക്രോണിക്കിള്സ്' പ്രകാശനം ചെയ്തു.
2026 ഒക്ടോബര് 23 മുതല് 25 വരെ ഒഹായോയിലെ സിന്സിനാറ്റിയില് നടക്കുന്ന ഐഎപിസിയുടെ അടുത്ത അന്താരാഷ്ട്ര മാധ്യമ സമ്മേളനത്തിന്റെ കിക്ക് ഓഫ്, ഡോ. കതുല ഔദ്യോഗികമായി പ്രഖ്യാപിച്ചു. സമ്മേളനത്തിന്റെ പ്രാധാന്യത്തെക്കുറിച്ച് ബോര്ഡ് അംഗം ഷാന് ജസ്റ്റസ് വിശദീകരിക്കുകയും സംഘാടകര്ക്കുവേണ്ടി നന്ദി അറിയിക്കുകയും ചെയ്തു.
ഇന്ഡോഅമേരിക്കന് പ്രസ് ക്ലബ്ബിന്റെ (ഐഎപിസി) നേതൃത്വ സ്ഥാനാരോഹണവും അവാര്ഡ് ദാന ചടങ്ങും വിവിധ മേഖലകളില് ശ്രദ്ധേയ സംഭാവനകള് നല്കിയ ഏഴ് ഇന്ത്യന്-അമേരിക്കന് നേതാക്കളെ ആദരിക്കുന്ന വേദിയായി.
പരിപാടിയുടെ എംസിയും സംഘാടകയുമായൂരുന്ന പട്രീഷ്യ ഉമാ ശങ്കര് ആരോഗ്യരംഗം, മാധ്യമരംഗം, വിദ്യാഭ്യാസം, സാമൂഹിക സേവനം, സംരംഭകത്വം തുടങ്ങിയ മേഖലകളില് ശ്രദ്ധേയ സംഭാവനകള് നല്കിയ ഏഴ് ഇന്ത്യന്-അമേരിക്കന് നേതാക്കളെ പരിചയപ്പെടുത്തുകയും, ലൈഫ് ടൈം അച്ചീവ്മെന്റ് പുരസ്കാരങ്ങള് നല്കി ആദരിക്കുകയും ചെയ്തു.
സാമൂഹ്യസേവനം, പൊതുജനാരോഗ്യം, വിദ്യാഭ്യാസം, സാമൂഹികന്യായം, മാധ്യമം, സംരംഭകത്വം, മാനസികാരോഗ്യം എന്നീ മേഖലകളിലെ മികവിനാണ് ലൈഫ് ടൈം അച്ചീവ്മെന്റ് പുരസ്കാരങ്ങള് സമ്മാനിച്ചത്.
സമൂഹസേവന രംഗത്തെ പ്രവര്ത്തനങ്ങള്ക്ക് ഡോ. ജഗദീഷ് ഗുപ്ത, പൊതുജനാരോഗ്യ രംഗത്തെ നേതൃത്വത്തിന് ഡോ. ഇന്ദര്പാല് ഛബ്ര, വിദ്യാഭ്യാസ-പൗര ഇടപെടല് മേഖലകളിലെ സംഭാവനകള്ക്ക് ഡോ. വിനോദ് സഞ്ചേതി, സാമൂഹിക നീതി ന്യായ നടത്തിപ്പില് ആജീവനാന്ത സേവനത്തിന് സുധ ആചാര്യ, സാമ്പത്തിക-മാധ്യമ രംഗത്തെ മികവിന് യാക്കൂബ് മാത്യു, സംരംഭകത്വത്തിനും മനുഷ്യസ്നേഹ പ്രവര്ത്തനങ്ങള്ക്കും അലക്സ് എസ്തപ്പാന്, മാനസികാരോഗ്യ-വയോജന പരിചരണ രംഗത്തെ സംഭാവനകള്ക്ക് ഡോ. വസുന്ധര കലാസപുടി എന്നിവരാണ് പുരസ്കാര ജേതാക്കള്.
ചടങ്ങില് ഡോ. കൃഷന് കുമാര്, ഡോ. ശശി ഷാ, ആന്ഡി ഭാട്ടിയ തുടങ്ങിയ സാമൂഹ്യ സാംസ്കാരിക നേതാക്കള്,പുതിയ ഭാരവാഹികളെയും പുരസ്കാര ജേതാക്കളെയും അഭിനന്ദിച്ചു. വടക്കേ അമേരിക്കയിലുടനീളമുള്ള മാധ്യമ പ്രവര്ത്തകരെ ഏകോപിപ്പിക്കുന്നതില് ഐഎപിസി വഹിക്കുന്ന പങ്ക് അവര് പ്രശംസിച്ചു.
ഡിജിറ്റല് മാധ്യമങ്ങളുടെ വളര്ച്ച, തെറ്റായ വിവരങ്ങളുടെ വെല്ലുവിളി, പ്രവാസി മാധ്യമങ്ങളുടെ ഭാവി തുടങ്ങിയ വിഷയങ്ങള് ചടങ്ങില് ചര്ച്ചയായി. സംസ്കാരങ്ങളെ ബന്ധിപ്പിക്കുന്നതിലും സമൂഹത്തിന്റെ ശബ്ദം ഉയര്ത്തിക്കാട്ടുന്നതിലും ഇന്ഡോ-അമേരിക്കന് മാധ്യമപ്രവര്ത്തകര് വഹിക്കുന്ന നിര്ണായക പങ്ക് പ്രഭാഷകര് എടുത്തുപറഞ്ഞു.
2013-ല് സ്ഥാപിതമായ ഐഎപിസി ഇന്ന് അമേരിക്കയിലും കാനഡയിലുമായി 15 ചാപ്റ്ററുകളുള്ള മാധ്യമപ്രവര്ത്തകരുടെയും മാധ്യമ വിദഗ്ധരുടെയും ശക്തമായ ശൃംഖലയായി വളര്ന്നിട്ടുണ്ട്. പുതിയ ചെയര്മാന് ഡോ. സതീഷ് കതുലയുടെ നേതൃത്വത്തില് പ്രൊഫഷണല് വികസന പരിശീലനങ്ങള്, യുവജന മെന്റര്ഷിപ്പ് പദ്ധതികള്, ദേശീയ മാധ്യമ സമ്മേളനങ്ങള്, ഇന്ത്യ-അമേരിക്ക മാധ്യമ സഹകരണങ്ങള്, ആഗോള പത്രസ്വാതന്ത്ര്യ പ്രവര്ത്തനങ്ങള് എന്നിവ കൂടുതല് വിപുലീകരിക്കുമെന്ന് സംഘടന അറിയിച്ചു.
2026-ലെ ഇന്ഡക്ഷന് ആന്ഡ് അവാര്ഡ് ദാന ചടങ്ങ് ആ ദൗത്യത്തെ വീണ്ടും ഉറപ്പിച്ചു, സമഗ്രത, സ്വാതന്ത്ര്യം, പൊതുജനസേവനം എന്നിവ ഉള്ക്കൊള്ളുന്ന നേതാക്കളെ ആഘോഷിച്ചു. ഡോ. സതീഷ് കതുലയുടെയും സമര്പ്പിത നേതൃത്വ സംഘത്തിന്റെയും നേതൃത്വത്തില്, മികവ്, ഐക്യം, പുതുമാധ്യമത്തിന്റെ നിലനില്ക്കുന്ന ശക്തി എന്നിവയില് വേരൂന്നിയ ഐഎപിസിയുടെ
ചരിത്രത്തില്, ഒരു പുതിയ അധ്യായം ആരംഭിക്കുന്നു.
കൂടുതല് വിവരങ്ങള്ക്ക്, സന്ദര്ശിക്കുക: www.indoamericanpressclub.com