എയർ ഇന്ത്യ ഭീകരാക്രമണത്തിൻ്റെ നടുക്കുന്ന ഓർമ്മകളുമായി പ്രിയപ്പെട്ടവർ. ടൊറൻ്റോ ക്വീൻസ് പാർക്കിൽ അനുസ്മരണ ചടങ്ങുകൾ സംഘടിപ്പിച്ചു

 

 

കാനഡയുടെ ചരിത്രത്തിലെ ഏറ്റവും ഭീകരമായ ദുരന്തങ്ങളിലൊന്നായ 1985-ലെ എയർ ഇന്ത്യ വിമാന ദുരന്തത്തിൽ ജീവൻ നഷ്ടപ്പെട്ടവരെ ടൊറൻ്റോയിലെ ക്വീൻസ് പാർക്കിൽ നടന്ന പ്രത്യേക ചടങ്ങിൽ അനുസ്മരിച്ചു. ക്വീൻസ് പാർക്കിൽ ഒത്തുകൂടിയ ഇരകളുടെ കുടുംബാംഗങ്ങളും പൊതുജനങ്ങളും തങ്ങളുടെ പ്രിയപ്പെട്ടവരുടെ ഓർമ്മകൾക്ക് മുന്നിൽ പ്രണാമം അർപ്പിച്ചു. വർഷങ്ങൾ  കഴിഞ്ഞിട്ടും തങ്ങളുടെ പ്രിയപ്പെട്ടവർ നഷ്ടപ്പെട്ടതിൻ്റെ ആഴമേറിയ ദുഃഖവും ശൂന്യതയും ഇപ്പോഴും മാറിയിട്ടില്ലെന്ന് ചടങ്ങിൽ പങ്കെടുത്ത ബന്ധുക്കൾ പറയുന്നു.

1985 ജൂൺ 23-ന് മോൺട്രിയാലിൽ നിന്നും ലണ്ടൻ വഴി ബോംബെയിലേക്ക് പറക്കുകയായിരുന്ന എയർ ഇന്ത്യയുടെ 182-ാം നമ്പർ 'കനിഷ്ക' വിമാനമാണ് അയർലൻഡ് തീരത്തിന് സമീപം വച്ച് പസഫിക് സമുദ്രത്തിന് മുകളിൽ വെച്ച് ബോംബ് സ്ഫോടനത്തിലൂടെ തകർക്കപ്പെട്ടത്. വിമാനത്തിലുണ്ടായിരുന്ന 268 കനേഡിയൻ പൗരന്മാരും 22 ഇന്ത്യൻ പൗരന്മാരും ഉൾപ്പെടെ 329 പേരും ഈ  ദുരന്തത്തിൽ കൊല്ലപ്പെട്ടിരുന്നു. സിഖ് തീവ്രവാദ സംഘടനയായ ബാബർ ഖൽസയാണ് ഈ ക്രൂരമായ ആക്രമണത്തിന് പിന്നിലെന്ന് അന്വേഷണ ഏജൻസികൾ കണ്ടെത്തിയിരുന്നു. കാനഡയുടെ ചരിത്രത്തിലെ തന്നെ ഏറ്റവും വലിയ കൂട്ടക്കൊലയായി കണക്കാക്കപ്പെടുന്നു.

കാനഡയുടെ സുരക്ഷാ-ഇന്റലിജൻസ് വിഭാഗങ്ങൾക്കുണ്ടായ ഗുരുതരമായ വീഴ്ചകളാണ് ഇത്രയും വലിയൊരു ദുരന്തത്തിന് വഴിവെച്ചതെന്ന് പിന്നീട് നടന്ന അന്വേഷണങ്ങളിൽ വ്യക്തമായിരുന്നു. ഇതേക്കുറിച്ചുള്ള വിവരങ്ങളും ഇരകളുടെ സ്മരണകളും ഉൾപ്പെടുത്തി ഹാമിൽട്ടണിലെ മക്മാസ്റ്റർ സർവ്വകലാശാല അടുത്തിടെ ഒരു ഓൺലൈൻ ആർക്കൈവ് രൂപീകരിച്ചിട്ടുണ്ട്. ക്വീൻസ് പാർക്കിൽ നടന്ന ഈ ഒത്തുചേരൽ കേവലം ഒരു അനുസ്മരണം മാത്രമല്ലെന്നും ഇത്തരം അക്രമ സംഭവങ്ങൾ ഇനി ആവർത്തിക്കാതിരിക്കാൻ സമൂഹത്തിൽ സമാധാനവും ഐക്യവും നിലനിർത്തേണ്ടതിന്റെ പ്രാധാന്യം ഓർമ്മിപ്പിക്കുന്നതാണെന്നും അധികൃതരും പങ്കെടുത്തവരും വ്യക്തമാക്കി.