മോഹിനിയാട്ടത്തിന് കേന്ദ്ര സംഗീത നാടക അക്കാദമി പുരസ്കാരം: അമേരിക്കന് പ്രവാസി ഇന്ത്യക്കാര്ക്ക് അഭിമാനമായി ഡോ. സുനന്ദ നായര്
By: 600002 On: Jun 22, 2026, 9:48 AM
ജീമോന് റാന്നി
ഹൂസ്റ്റണ്: മോഹിനിയാട്ട രംഗത്തെ സമഗ്ര സംഭാവനകള്ക്ക് ഇന്ത്യയിലെ പരമോന്നത കലാബഹുമതികളിലൊന്നായ 2024-ലെ സംഗീത നാടക അക്കാദമി പുരസ്കാരത്തിന് പ്രശസ്ത നര്ത്തകിയും ഗുരുവുമായ ഡോ. സുനന്ദ നായര് തിരഞ്ഞെടുക്കപ്പെട്ടു. മോഹിനിയാട്ടം വിഭാഗത്തിലാണ് ഈ ദേശീയ അംഗീകാരം ലഭിച്ചത്. നിരവധി വര്ഷങ്ങളായി ഹൂസ്റ്റണില് താമസമാക്കിയ മലയാളിയായ സുന്ദന്ദ അമേരിക്കന് പ്രവാസി ഇന്ത്യക്കാര്ക്ക് അഭിമാനമായി മാറി.
സംഗീത നാടക അക്കാദമി പുരസ്കാരം ഇന്ത്യയിലെ പ്രകടനകലകള്ക്കായുള്ള ദേശീയ അക്കാദമിയായ സംഗീത നാടക അക്കാദമി നല്കുന്ന ഏറ്റവും ഉയര്ന്ന ബഹുമതികളിയാണ്. രാജ്യത്തെ ഏറ്റവും അഭിമാനകരവും പ്രശസ്തവുമായ സാംസ്കാരിക അംഗീകാരങ്ങളില് ഒന്നായി ഈ പുരസ്കാരം കണക്കാക്കപ്പെടുന്നു. കലാരംഗത്തെ അസാധാരണമായ സംഭാവനകളെയും ജീവിതസാഫല്യങ്ങളെയും ആദരിക്കുന്നതിനാണ് ഈ ബഹുമതി നല്കുന്നത്.
പത്മഭൂഷണ് ഡോ. കനക് റെലെയുടെ ശിഷ്യപരമ്പരയില് വളര്ന്ന ഡോ. സുനന്ദ നായര്, നളന്ദ നൃത്യകലാ മഹാവിദ്യാലയത്തിന്റെ കലാ-അക്കാദമിക് പാരമ്പര്യം മുന്നോട്ട് കൊണ്ടുപോകുന്ന പ്രമുഖ മോഹിനിയാട്ടം ആചാര്യരില് ഒരാളാണ്. ഡോ. കനക് റെലെയുടെ മുതിര്ന്ന ശിഷ്യയും നളന്ദയില് പരിശീലനം നേടിയ ആദ്യകാല വിദ്യാര്ഥികളില് ഒരാളുമായ അവര്, ഈ വര്ഷം പ്രൊഫഷണല് മോഹിനിയാട്ടം കലാകാരിയും അധ്യാപികയുമായി നാല് പതിറ്റാണ്ടുകള് പൂര്ത്തിയാക്കുകയാണ്.
നളന്ദായില് (യൂണിവേഴ്സിറ്റി ഓഫ് മുംബൈ ) നിന്ന് മോഹിനിയാട്ടത്തില് ബിരുദവും ബിരുദാനന്തര ബിരുദവും നേടിയ ആദ്യ വിദ്യാര്ത്ഥിനിയാണ് സുനന്ദ നായര്.
അഞ്ച് ദശാബ്ദത്തിലേറെ നീളുന്ന കലാജീവിതത്തില്, അവതാരക, നൃത്തസംവിധായക, ഗവേഷക, ഗുരു എന്നീ നിലകളില് ഡോ. സുനന്ദ നായര് ശ്രദ്ധേയമായ സംഭാവനകള് നല്കിയിട്ടുണ്ട്. ഇന്ത്യയിലെയും വിദേശത്തെയും പ്രമുഖ നൃത്തോത്സവങ്ങളിലും സാംസ്കാരിക വേദികളിലും അവര് മോഹിനിയാട്ടം അവതരിപ്പിച്ചിട്ടുണ്ട്. ആത്മീയത, ശാസ്ത്രീയത, സൗന്ദര്യാത്മക മികവ് എന്നിവ സമന്വയിക്കുന്ന അവതരണങ്ങളിലൂടെ അവര് ദേശീയ-അന്തര്ദേശീയ തലത്തില് പ്രശസ്തി നേടിയിട്ടുണ്ട്.
നാല് പതിറ്റാണ്ടിലേറെ കാലമായി പ്രൊഫഷണല് കലാകാരിയായും അധ്യാപികയായും പ്രവര്ത്തിക്കുന്ന ഡോ. നായര്, നിരവധി ശിഷ്യരെ ഇന്ത്യന് ശാസ്ത്രീയ നൃത്തരംഗത്ത് വളര്ത്തിയെടുത്തിട്ടുണ്ട്. അവരുടെ ശിഷ്യരില് ദൂരദര്ശന് ഗ്രേഡഡ് ആര്ട്ടിസ്റ്റുമാര്, സി.സി.ആര്.ടി. സ്കോളര്ഷിപ്പ് ജേതാക്കള്, പുരസ്കാര ജേതാക്കള്, പ്രമുഖ കലാകാരന്മാര് എന്നിവര് ഉള്പ്പെടുന്നു. ഇന്ത്യയിലെയും വിദേശത്തെയും വിവിധ വേദികളില് അവരുടെ ശിഷ്യര് മികച്ച പ്രകടനങ്ങള് കാഴ്ചവച്ചുവരുന്നു.
അമേരിക്കയില് മോഹിനിയാട്ടത്തിന്റെ പ്രചാരണത്തിലും ഡോ. സുനന്ദ നായര് നിര്ണായക പങ്കുവഹിച്ചിട്ടുണ്ട്. കഴിഞ്ഞ ഇരുപത് വര്ഷത്തിലേറെയായി തന്റെ സ്ഥാപനത്തിലൂടെയും കലാപരിപാടികളിലൂടെയും പ്രഭാഷണ-പ്രദര്ശനങ്ങളിലൂടെയും കേരളത്തിന്റെ ശാസ്ത്രീയ നൃത്തരൂപത്തെ ആഗോളതലത്തില് പരിചയപ്പെടുത്തുന്നതില് അവര് സജീവമാണ്. ഇതിലൂടെ ഇന്ത്യന് പ്രവാസി സമൂഹത്തില് മോഹിനിയാട്ടത്തിന് ശക്തമായ അടിത്തറ സൃഷ്ടിക്കാനും കലാരൂപത്തിന്റെ പാരമ്പര്യം സംരക്ഷിക്കാനും അവര്ക്ക് കഴിഞ്ഞിട്ടുണ്ട്.
കലാപരമായ മികവിനോടും ഗുരുപാരമ്പര്യത്തോടുമുള്ള അചഞ്ചലമായ പ്രതിബദ്ധതയിലൂടെ തലമുറകളെ പ്രചോദിപ്പിച്ചുകൊണ്ടിരിക്കുന്ന ഡോ. സുനന്ദ നായര്, മോഹിനിയാട്ടത്തിന്റെ സമ്പന്ന പാരമ്പര്യം ലോകമെമ്പാടും പ്രചരിപ്പിച്ചുകൊണ്ടിരിക്കുകയാണ്.
ഇന്ത്യന് ശാസ്ത്രീയ നൃത്തത്തിനും പ്രത്യേകിച്ച് മോഹിനിയാട്ടത്തിനും നല്കിയ സമഗ്ര സംഭാവനകളും ജീവിതകാല സമര്പ്പണവും പരിഗണിച്ചാണ് 2024-ലെ സംഗീത നാടക അക്കാദമി പുരസ്കാരത്തിന് ഡോ. സുനന്ദ നായരെ തെരഞ്ഞെടുത്തത്.
അനവധി അംഗീകാരങ്ങള് അവരെ തേടിയെത്തി. അവയില് ചിലതു താഴെ കൊടുക്കുന്നു
കലാരത്നം -കേരള കലാമണ്ഡലം ഡീംഡ് യൂണിവേഴ്സിറ്റി 2016
കലാശ്രീ അവാര്ഡ് -കേരള സംഗീത നാടക അക്കാദമി 2011
നൃത്യസേവാമണി അവാര്ഡ് - ക്ളീവ്ലാന്ഡ് ത്യാഗരാജ ഫെസ്റ്റിവല് 2020
ഗ്ലോബല് എക്സല്ലന്സ് അവാര്ഡ് ഫോര് പെര്ഫോമിംഗ് ആര്ട്സ്, 2019
ബാംഗ്ലൂര് ക്ലബ് ഓഫ് കഥകളി യുടെ സൈറ്റേഷന് 2018
മുതിരായ് പതിത വിതഗര്, നാട്യാഞ്ജലി ഫെസ്റ്റിവല് 2018
അനന്ത മാര്ഗശീര്ഷ നാട്യ പുരസ്കാരം, നായര് സംഗമം 2018 (NSSONA)
നളന്ദ കനക നര്ത്തന പുരസ്കാര്- നളന്ദ ഡാന്സ് റിസര്ച്ച് സെന്റര് 2017
ഒരനുഗ്രഹീത കലാകാരിയായ സുനന്ദയുടെ പ്രത്യേകത അവര് രംഗത്ത് അവതരിപ്പിക്കുന്ന കഥാപാത്രങ്ങളുടെ മിഴിവ്, അനായാസ്യത, ദൃശ്യ ഭംഗി, സംഗീതവുമായി ഇഴുകി ചേര്ന്ന് സൃഷ്ടിക്കപ്പെടുന്ന അഭിനയ മുഹൂര്ത്തങ്ങള് ഇവയൊക്കെയാണ്. മോഹിനി ആട്ടത്തിനു ഏറ്റവും യോജിച്ച ശരീര പ്രകൃതി, സൗന്ദര്യം ഇവയൊക്കെയാല് അനുഗ്രഹിക്കപ്പെട്ട ഈ കലാകാരി മധ്യവയസ്സിലും തന്റെ മനസ്സും ശരീരവും അങ്ങേയറ്റം ശ്രദ്ധയോടെ പാകപ്പെടുത്തി, പരിപാലിച്ചു നൃത്ത കല അതിന്റെ എല്ലാ പരിശുദ്ധിയോടും പൂര്ണ്ണതയോടും അവതരിപ്പിച്ചു കൊണ്ട് മുന്നേറുന്നു.
എത്ര തിരക്കുകള് ഉണ്ടെങ്കിലും എല്ലാ വര്ഷവും ചുരുങ്ങിയത് രണ്ടു നൃത്ത മഹോത്സവങ്ങള് സുനന്ദ'സ് പെര്ഫോമിംഗ് ആര്ട്ട് സെന്റര് (SPARC) ന്റെ കൊടിക്കീഴില് അവര് നടത്തി പ്പോരുന്നു. തന്റെ ഗുരുവിന്റെ ജന്മ ദിനത്തോടനുബന്ധിച്ചു നടത്തുന്ന കനക് ഫെസ്റ്റിവല് മുംബൈയിലും, നര്ത്തകി എന്നപേരില് ഹ്യൂസ്റ്റണിലും. ഹൂസ്റ്റണിലെ നൃത്ത പഠന ക്ലാസ്സുകള്ക്ക് പുറമെ, മുംബയിലെ ശ്രുതിലയയുടെ ക്ലാസ്സുകളും, കൂടാതെ ഗുരുവായൂരില് മറ്റൊരു ക്ലാസും ഇപ്പോഴും നടന്നു പോരുന്നു. കനക് നൃത്തോത്സവത്തോടനുബന്ധിച്ചു ഇന്ത്യയിലെ നിരവധി നഗരങ്ങളില് പ്രകടനം നടത്തി വരുന്നു.
തന്റെ ജീവിതത്തിന്റെ ഏറിയ പങ്കും നൃത്തത്തിന് വേണ്ടി ഉഴിഞ്ഞു വച്ച ഈ നര്ത്തകി ഒരു നല്ല കുടുംബിനി കൂടിയാണ്. രണ്ടു കുട്ടികളാണ് അവര്ക്കുള്ളത്. മകന് അനിരുദ്ധ് കെമിക്കല് എഞ്ചിനീയര് ആയി ജോലി നോക്കുന്നു. മകള് സിയ ടെക്സാസ് എ ആന്ഡ് എം യൂണിവേഴ്സിറ്റിയില് നിന്ന് സോഷിയോളജി മേജര് ബിസിനെസ്സ് മൈനര് ആയി ബിരുദം എടുത്തു. സിയയും ഒരു നല്ല നര്ത്തകിയാണ്. ഭരതനാട്യവും, മോഹിനി ആട്ടവും അഭ്യസിച്ചിട്ടുണ്ട്.
അചഞ്ചലമായ ഗുരു ഭക്തി, നിശ്ച്ചയ ദാര്ഢ്യം, നൃത്തത്തോടുള്ള പ്രതിബദ്ധത, നൃത്തരംഗത്തെ മറ്റു കലാകാരികളുമായുള്ള ഊഷ്മള സൗഹൃദങ്ങള്, സമൂഹത്തോടുള്ള പ്രതിബദ്ധത ഇവയൊക്കെയാണ് എടുത്തു പറയേണ്ടവ. സര്വേശ്വരന് തുടര്ന്നും എല്ലാ ഐശ്വര്യങ്ങളും നല്കി അവരെ അനുഗ്രഹിക്കുമാറാകട്ടെ ആശംസിച്ചുകൊണ്ട് നിരവധി സന്ദേശങ്ങള് എത്തികൊണ്ടിരിക്കുന്നുവെന്ന് ഇന്ത്യയുടെ പ്രസിഡന്റില്നിന്നും ഈ വലിയ ബഹുമതി ഏറ്റുവാങ്ങാന് ഒരുങ്ങുന്ന സുനന്ദ ഈ ലേഖകനോട് പറഞ്ഞു.