വേനൽക്കാലത്ത് നദികളിലിറങ്ങുന്നവർ ജാഗ്രത പാലിക്കണമെന്ന മുന്നറിയിപ്പുമായി കാൽഗറി പൊലീസും ഫയർഫോഴ്സും

വേനൽക്കാലത്ത് ചൂടിൽ നിന്ന് രക്ഷനേടാനായി ബോ, എൽബോ നദികളിലിറങ്ങുന്നവർ സുരക്ഷാ മുൻകരുതലുകൾ കർശനമായി പാലിക്കണമെന്ന് കാൽഗറി നിവാസികൾക്ക് അധികൃതർ മുന്നറിയിപ്പ് നൽകി. വെള്ളമുള്ളിടത്തെല്ലാം അപകടസാധ്യതയുണ്ടെന്നും, മുങ്ങിമരണങ്ങൾ ഉൾപ്പെടെയുള്ള അപകടങ്ങൾ വളരെ പെട്ടെന്നാണ് സംഭവിക്കുന്നതെന്നും അധികൃതർ ഓർമ്മിപ്പിച്ചു.

ഓരോ വേനൽക്കാലത്തും ജൂലൈ മാസത്തിലാണ് ഏറ്റവും കൂടുതൽ ജലരക്ഷാപ്രവർത്തനങ്ങൾ നടത്തേണ്ടി വരുന്നതെന്നും, എന്നാൽ കൃത്യമായ ശ്രദ്ധയുണ്ടെങ്കിൽ ഇത്തരം അപകടങ്ങൾ പൂർണ്ണമായും ഒഴിവാക്കാവുന്നതാണെന്നും കാൽഗറി ഫയർ ഫോഴ്സ് ഉദ്യോഗസ്ഥർ വ്യക്തമാക്കി.  ലൈഫ് ജാക്കറ്റ് ധരിക്കാതിരിക്കുക, തണുത്ത വെള്ളത്തിൽ ദീർഘനേരം കഴിയുക, മദ്യപിച്ചോ മറ്റ് ലഹരിപദാർത്ഥങ്ങൾ ഉപയോഗിച്ചോ വെള്ളത്തിലിറങ്ങുക എന്നിവയാണ് ജലാശയങ്ങളിലെ മരണങ്ങൾക്ക് കാരണമാകുന്ന മൂന്ന് പ്രധാന ഘടകങ്ങളെന്ന് കാൽഗറി പോലീസ് വ്യക്തമാക്കി. നിയമങ്ങൾ കൃത്യമായി പാലിക്കപ്പെടുന്നുണ്ടെന്ന് ഉറപ്പാക്കാൻ ഈ വേനൽക്കാലത്ത് പോലീസും  ഉദ്യോഗസ്ഥരും കനത്ത നിരീക്ഷണം നടത്തുമെന്ന് കാൽഗറി പോലീസ് സർവീസ് സർജൻ്റ് ആൻഡി വുഡ്‌വാർഡ് പറഞ്ഞു. വെള്ളത്തിലിറങ്ങുമ്പോൾ ലൈഫ് ജാക്കറ്റ് നിർബന്ധമായും ധരിക്കുക, നീന്തൽ പഠിക്കുക തുടങ്ങിയ ലളിതമായ സുരക്ഷാ മാർഗ്ഗങ്ങൾ പാലിക്കണമെന്ന് നഗരസഭാ അധികൃതർ ജനങ്ങളോട് അഭ്യർത്ഥിച്ചു.