ഷിക്കാഗോ ഇന്ത്യന് കോണ്സുലേറ്റില് സ്വാമി വിവേകാനന്ദന്റെ പൂര്ണ്ണകായ പ്രതിമ അനാച്ഛാദനം ചെയ്തു
By: 600002 On: Jun 18, 2026, 10:47 AM
പി പി ചെറിയാന്
ഷിക്കാഗോ: അമേരിക്കയിലെ ഷിക്കാഗോയിലുള്ള ഇന്ത്യന് കോണ്സുലേറ്റ് ജനറല് ഓഫീസില് സ്വാമി വിവേകാനന്ദന്റെ പൂര്ണ്ണകായ പ്രതിമ അനാച്ഛാദനം ചെയ്തു. യു.എസിലെ ഇന്ത്യന് അംബാസഡര് വിനയ് മോഹന് ക്വാത്രയാണ് പ്രതിമയുടെ അനാച്ഛാദന കര്മ്മം നിര്വ്വഹിച്ചത്. ഇന്ത്യന് കോണ്സുലേറ്റും യു.എസ് ഇന്ത്യന് കമ്മ്യൂണിറ്റി ഫൗണ്ടേഷനും (USICF) സംയുക്തമായാണ് ചടങ്ങ് സംഘടിപ്പിച്ചത്. അമേരിക്കയിലെ ഇന്ത്യന് സമൂഹം കോണ്സുലേറ്റിന് നല്കിയ ഉപഹാരമാണ് ഈ വെങ്കല പ്രതിമ.
1893-ല് ഷിക്കാഗോയില് നടന്ന ലോകമത പാര്ലമെന്റില് സ്വാമി വിവേകാനന്ദന് നടത്തിയ ചരിത്രപ്രസിദ്ധമായ പ്രസംഗത്തിന്റെ ഓര്മ്മകള് പുതുക്കുന്നതാണ് ഈ പ്രതിഷ്ഠാപനം. ചടങ്ങില് വന്ദേമാതരം ആലപിക്കുകയും ജനപ്രതിനിധികളും കമ്മ്യൂണിറ്റി നേതാക്കളും പങ്കെടുത്ത പ്രത്യേക ചര്ച്ച സംഘടിപ്പിക്കുകയും ചെയ്തു.
'സ്വാമി വിവേകാനന്ദന് ലോകത്തിന് നല്കിയ സേവനത്തിന്റെയും സാര്വത്രിക സാഹോദര്യത്തിന്റെയും സന്ദേശം ഇന്നും പ്രസക്തമാണ്,' എന്ന് ചടങ്ങില് സംസാരിച്ച അംബാസഡര് വിനയ് മോഹന് ക്വാത്ര വ്യക്തമാക്കി.
ഭാരതത്തിന്റെ ദ്രുതഗതിയിലുള്ള സാമ്പത്തിക വളര്ച്ചയെക്കുറിച്ചും, ഇന്ത്യ-യു.എസ് പങ്കാളിത്തം ശക്തമാകുന്നതിനെക്കുറിച്ചും അദ്ദേഹം ചടങ്ങില് വിശദീകരിച്ചു. ഭാരതീയ സംസ്കാരം അമേരിക്കയില് നിലനിര്ത്തുന്നതില് ഇന്ത്യന് വംശജര് നല്കുന്ന സംഭാവനകളെ അദ്ദേഹം അഭിനന്ദിച്ചു.