ആഗോള സമാധാന സൂചിക പുറത്തുവിട്ടു; കാനഡ ആദ്യ ഇരുപതിൽ, അമേരിക്ക 134ആം സ്ഥാനത്തേക്ക് പിന്തള്ളപ്പെട്ടു

ലോകത്തിലെ ഏറ്റവും സമാധാനപൂർണ്ണമായ 20 രാജ്യങ്ങളുടെ പട്ടികയിൽ വീണ്ടും സ്ഥാനം നിലനിർത്തി കാനഡ. 2026-ലെ ഗ്ലോബൽ പീസ് ഇൻഡക്സ് റിപ്പോർട്ട് പ്രകാരം കാനഡ പതിനാലാം സ്ഥാനത്താണ്. കഴിഞ്ഞ വർഷത്തെ സൂചികയിലും കാനഡയ്ക്ക് ഇതേ സ്ഥാനം തന്നെയായിരുന്നു. നിലവിലെ കണക്കുകൾ പ്രകാരം 1.525 പീസ് സ്കോറാണ് കാനഡയ്ക്ക് ഉള്ളത്. എന്നാൽ 2025-ൽ രാജ്യത്തിൻ്റെ സ്കോർ 1.491 ആയിരുന്നു എന്നത് ശ്രദ്ധേയമാണ്.

രാജ്യത്തെ വ്യക്തിഗത സുരക്ഷിതത്വവും സുരക്ഷാ മാനദണ്ഡങ്ങളും മുൻപത്തേക്കാൾ അല്പം മെച്ചപ്പെട്ടിട്ടുണ്ട്. എങ്കിലും കാനഡയിൽ അക്രമസ്വഭാവമുള്ള പ്രതിഷേധങ്ങളും പ്രകടനങ്ങളും വർദ്ധിച്ചതായാണ് റിപ്പോർട്ടുകൾ വ്യക്തമാക്കുന്നത്. ആഭ്യന്തര സംഘർഷങ്ങളും സൈനികവൽക്കരണവുമായി ബന്ധപ്പെട്ട സാഹചര്യങ്ങളും മുൻവർഷങ്ങളെ അപേക്ഷിച്ച് വഷളായിട്ടുണ്ട്. വാസ്തവത്തിൽ 2008-ന് ശേഷമുള്ള കണക്കുകൾ പരിശോധിച്ചാൽ കാനഡയുടെ ദീർഘകാല സുരക്ഷിതത്വ സൂചികയിൽ വലിയ ഇടിവ് രേഖപ്പെടുത്തിയിട്ടുണ്ട്.

അതേസമയം ആഗോള സമാധാന സൂചികയിൽ വൻ തിരിച്ചടിയാണ് യുണൈറ്റഡ് സ്റ്റേറ്റ്സിന് നേരിടേണ്ടി വന്നിരിക്കുന്നത്. കഴിഞ്ഞ വർഷത്തെ പട്ടികയിൽ 128-ാം സ്ഥാനത്തായിരുന്ന അമേരിക്ക ഈ വർഷം 134-ാം സ്ഥാനത്തേക്ക് പിന്തള്ളപ്പെട്ടു. നിലവിൽ 2.535 പീസ് സ്കോറാണ് അമേരിക്ക രേഖപ്പെടുത്തിയിരിക്കുന്നത്. വളരെ കുറഞ്ഞ സമാധാന അന്തരീക്ഷം മാത്രമുള്ള ഒരു രാജ്യമായാണ് ഇപ്പോൾ അമേരിക്കയെ ഈ ആഗോള സൂചികയിൽ അടയാളപ്പെടുത്തിയിരിക്കുന്നത്.

എന്നാൽ ആഗോളതലത്തിൽ ഏറ്റവും സമാധാനമുള്ള രാജ്യമായി ഐസ്‌ലാൻഡ് തങ്ങളുടെ ഒന്നാം സ്ഥാനം നിലനിർത്തി. ന്യൂസിലാൻഡ് ആണ് പട്ടികയിൽ രണ്ടാം സ്ഥാനത്തുള്ളത്. സമാധാന അന്തരീക്ഷം ഏറ്റവും കുറഞ്ഞ രാജ്യമായി 163-ാം സ്ഥാനത്ത് റഷ്യ തന്നെയാണ് ഇപ്പോഴും തുടരുന്നത്. വടക്കൻ-മധ്യ അമേരിക്കൻ മേഖലകളിൽ വെച്ച് ഏറ്റവും സമാധാനമുള്ള രാജ്യമായി മാറിയിരിക്കുകയാണ് കാനഡ. ഈ മേഖലയിൽ കാനഡയ്ക്ക് തൊട്ടുപിന്നിലായി കോസ്റ്റാറിക്കയും ജമൈക്കയുമാണ് സ്ഥാനം പിടിച്ചിരിക്കുന്നത്.