ഒമ്പത് വര്ഷത്തിന് ശേഷം ഫ്രിസ്കോ പുതിയ മേയര്: റോഡ് വില്ഹോവറെ പരാജയപ്പെടുത്തി മാര്ക്ക് ഹില് വിജയിച്ചു
By: 600002 On: Jun 15, 2026, 12:40 PM
പി പി ചെറിയാന്
ഫ്രിസ്കോ: ടെക്സസിലുള്ള ഫ്രിസ്കോ നഗരത്തില് നടന്ന മേയര് റണ്ഓഫ് (രണ്ടാം ഘട്ട) തിരഞ്ഞെടുപ്പില് മാര്ക്ക് ഹില്ലിന് ഉജ്ജ്വല വിജയം. പ്രമുഖ വ്യവസായിയായ റോഡ് വില്ഹോവറെയാണ് അദ്ദേഹം പരാജയപ്പെടുത്തിയത്. ആകെ രേഖപ്പെടുത്തിയ വോട്ടുകളില് 58 ശതമാനവും (19,632 വോട്ടുകള്) മാര്ക്ക് ഹില് സ്വന്തമാക്കിയപ്പോള്, വില്ഹോവറിന് 14,146 വോട്ടുകള് മാത്രമാണ് നേടാനായത്.
കഴിഞ്ഞ മെയ് 2-ന് നടന്ന ആദ്യഘട്ട തിരഞ്ഞെടുപ്പില് ആര്ക്കും വ്യക്തമായ ഭൂരിപക്ഷം (50%ല് കൂടുതല്) ലഭിക്കാത്തതിനെത്തുടര്ന്നാണ് ആദ്യ രണ്ട് സ്ഥാനങ്ങളിലെത്തിയ ഹില്ലും വില്ഹോവറും തമ്മില് റണ്ഓഫ് പോരാട്ടത്തിന് വഴിയൊരുങ്ങിയത്. അന്ന് 35 ശതമാനം വോട്ടുകളോടെ ഹില്ലും 31 ശതമാനം വോട്ടുകളോടെ വില്ഹോവറുമാണ് മുന്നിലെത്തിയിരുന്നത്.
അഭിഭാഷകനായ മാര്ക്ക് ഹില് നിലവില് ഫ്രിസ്കോ ഐ.എസ്.ഡി സ്കൂള് ബോര്ഡ് അംഗമാണ്. വന് വ്യവസായ വികസനവും ജനസംഖ്യാ വര്ധനവും നേരിടുന്ന ഫ്രിസ്കോ നഗരത്തിന്റെ ഗതാഗതക്കുരുക്ക്, പൊതുസുരക്ഷ, അടിസ്ഥാന സൗകര്യ വികസനം എന്നിവ കാര്യക്ഷമമായി കൈകാര്യം ചെയ്യുക എന്നതായിരിക്കും പുതിയ മേയറുടെ പ്രധാന ഉത്തരവാദിത്തം.