വംശീയ അധിക്ഷേപ ആരോപണം: മോൺട്രിയോളിൽ 16 പൊലീസുകാർക്കെതിരെ അന്വേഷണം, രണ്ട് പേർക്ക് സസ്പെൻഷൻ

കാനഡയിലെ മോൺട്രിയോൾ നഗരത്തിൽ കറുത്തവർഗ്ഗക്കാർക്കും അറബ് വംശജർക്കുമെതിരെ വംശീയ അതിക്രമം കാണിച്ചെന്ന പരാതിയിൽ പൊലീസ് ഉദ്യോഗസ്ഥർക്കെതിരെ കടുത്ത നടപടി. സ്റ്റേഷൻ 39-ലെ 16 പൊലീസ് ഉദ്യോഗസ്ഥർക്കെതിരെയാണ് നിലവിൽ അന്വേഷണം നടക്കുന്നത്. ഇതിൽ കുറ്റക്കാരാണെന്ന് കണ്ടെത്തിയ രണ്ട് ഉദ്യോഗസ്ഥരെ സസ്പെൻഡ് ചെയ്യുകയും 14 പേരെ ജനങ്ങളുമായി നേരിട്ട് സമ്പർക്കമില്ലാത്ത തസ്തികകളിലേക്ക് മാറ്റുകയും ചെയ്തു.

മോൺട്രിയോൾ-നോർത്ത് മേഖലയിൽ പൊലീസ് പരിശോധനകൾക്കിടയിൽ ഇവർ വംശീയ അതിക്രമം കാണിച്ചെന്നാണ്  പ്രധാന ആരോപണം. അറബ്, കറുത്തവർഗ്ഗക്കാരായ പൗരന്മാരുടെ മുടി മുറിച്ചെടുത്ത് ട്രോഫികളായി സൂക്ഷിച്ചതായും, കേവലം വംശീയ പശ്ചാത്തലം മാത്രം നോക്കി ജനങ്ങൾക്ക് പിഴ ചുമത്തിയതായും ഉള്ള ഗുരുതരമായ വിവരങ്ങൾ പുറത്തുവന്നിട്ടുണ്ട്. കൂടെ ജോലി ചെയ്യുന്ന മറ്റ് ഉദ്യോഗസ്ഥർ തന്നെ നൽകിയ പരാതിയുടെ അടിസ്ഥാനത്തിൽ കഴിഞ്ഞ മാർച്ച് മുതലാണ് അന്വേഷണം ആരംഭിച്ചതെന്ന് മോൺട്രിയോൾ പൊലീസ് ചീഫ് ഫാഡി ഡാഗർ സ്ഥിരീകരിച്ചു.

സംഭവം അങ്ങേയറ്റം അസ്വസ്ഥതപ്പെടുത്തുന്നതാണെന്ന് മോൺട്രിയോൾ മേയർ സൊരയ മാർട്ടിനെസ് ഫെരാഡെ പ്രതികരിച്ചു. ഇത്തരം വംശീയ അതിക്രമങ്ങൾ ജനങ്ങൾക്ക് പൊലീസിലുള്ള വിശ്വാസം തകർക്കുന്നതാണെന്നും, സംഭവത്തിൻ്റെ പൂർണ്ണമായ സത്യാവസ്ഥ പുറത്തു കൊണ്ടുവരുമെന്നും മേയർ ഉറപ്പുനൽകി. സുതാര്യത ഉറപ്പാക്കുന്നതിനായി നഗരത്തിലെ പൊലീസുകാർക്ക് ബോഡി ക്യാമറകൾ നൽകുന്ന നടപടി വേഗത്തിലാക്കുമെന്നും അവർ കൂട്ടിച്ചേർത്തു.

നിലവിൽ സസ്പെൻഷനിലായ ഉദ്യോഗസ്ഥർക്കെതിരെ ക്രിമിനൽ കുറ്റം ചുമത്തുന്ന കാര്യം പ്രൊസിക്യൂട്ടർമാരുടെ പരിഗണനയിലാണ്. വംശീയ അതിക്രമങ്ങൾക്ക് ഇരയായവരോ ദൃക്‌സാക്ഷികളോ ഉണ്ടെങ്കിൽ വിവരങ്ങളുമായി മുന്നോട്ടുവരണമെന്ന് അധികൃതർ ആവശ്യപ്പെട്ടിട്ടുണ്ട്.