വെറും അഞ്ച് മിനിറ്റിൽ ചാർജ് ചെയ്യാവുന്ന അൾട്രാ ഫാസ്റ്റ് ചാർജിങ് ശൃംഖലയുമായി ബി.വൈ.ഡി കാനഡയിലേക്ക്

 ലോകത്തിലെ ഏറ്റവും വലിയ ഇവി വാഹന നിർമ്മാതാക്കളായ ചൈനയുടെ ബി.വൈ.ഡി , തങ്ങളുടെ വിപ്ലവകരമായ 'ഫ്ലാഷ് ചാർജിങ്' സാങ്കേതികവിദ്യ കാനഡയിൽ അവതരിപ്പിക്കാൻ ഒരുങ്ങുന്നു. വെറും 5 മിനിറ്റ് കൊണ്ട് വാഹനങ്ങൾക്ക് 400 കിലോമീറ്റർ വരെ സഞ്ചരിക്കാനുള്ള ചാർജ് നൽകാൻ ശേഷിയുള്ള മെഗാവാട്ട് ക്ലാസ് ചാർജിങ് ശൃംഖലയാണിത്. നോർത്ത് അമേരിക്കൻ ഭൂഖണ്ഡത്തിൽ ആദ്യമായാണ് ഈ സാങ്കേതികവിദ്യ ഔദ്യോഗികമായി എത്തുന്നത്.

കാനഡയിലെ ടൊറൻ്റോ കേന്ദ്രീകരിച്ച് ബി.വൈ.ഡി പുറപ്പെടുവിച്ച പുതിയ തൊഴിൽ പരസ്യങ്ങളിലൂടെയാണ്, തങ്ങളുടെ അത്യാധുനിക ചാർജിങ് അടിസ്ഥാന സൗകര്യങ്ങൾ രാജ്യത്തുടനീളം വ്യാപിപ്പിക്കാനുള്ള കമ്പനിയുടെ നീക്കം പുറത്തുവന്നത്.  
ബി.വൈ.ഡിയുടെ രണ്ടാം തലമുറ 'ബ്ലേഡ് ബാറ്ററി' സാങ്കേതികവിദ്യയും 1000 വോൾട്ട് പ്ലാറ്റ്‌ഫോമും അടിസ്ഥാനമാക്കിയാണ് ഈ സംവിധാനം പ്രവർത്തിക്കുന്നത്. നിലവിൽ നോർത്ത് അമേരിക്കയിലുള്ള ഏറ്റവും വേഗതയേറിയ പബ്ലിക് ചാർജറുകളേക്കാൾ മൂന്നിരട്ടിയിലധികം ശേഷിയുള്ളതാണ് ബി.വൈ.ഡിയുടെ 1,500 കിലോവാട്ട്  വരെയുള്ള പുതിയ ചാർജറുകൾ.

കാനഡയിലെ കഠിനമായ ശീതകാലാവസ്ഥയിൽ ഇവി ചാർജിങ് വേഗത കുറയുന്ന പ്രതിസന്ധി പരിഹരിക്കാൻ ഈ സാങ്കേതികവിദ്യയ്ക്ക് സാധിക്കുമെന്ന് കമ്പനി അവകാശപ്പെടുന്നു; മൈനസ് 20 ഡിഗ്രി സെൽഷ്യസ് തണുപ്പിലും വെറും അഞ്ച് മിനിറ്റിൽ 10 ശതമാനത്തിൽ നിന്ന് 70 ശതമാനം വരെ ചാർജ് കൈവരിക്കാൻ ഇതിനാകും. ചൈനയിൽ നിന്നുള്ള ഇലക്ട്രിക് വാഹനങ്ങളുടെ ഇറക്കുമതി നികുതി കാനഡ ഗണ്യമായി കുറച്ച പശ്ചാത്തലത്തിൽ, വിപണി പിടിച്ചടക്കാനുള്ള തങ്ങളുടെ ആദ്യ കാറുകൾ നിരത്തിലിറക്കുന്നതിന് മുന്നോടിയായി ശക്തമായ ചാർജിങ് ശൃംഖല സ്വന്തമായി നിർമ്മിക്കാനാണ് ബി.വൈ.ഡി ലക്ഷ്യമിടുന്നത്.