സ്കൂൾ വോളൻ്റിയർമാർക്കും ഹിജാബ് വിലക്ക്; ഗാറ്റിനോയിൽ വിവാദം പുകയുന്നു

 

 

സ്കൂൾ പരിപാടികളിൽ വോളൻ്റിയറായി പങ്കെടുക്കാനെത്തിയ മുസ്ലിം മാതാവിനോട് ഹിജാബ് മാറ്റാൻ ആവശ്യപ്പെട്ട സംഭവം കാനഡയിലെ ക്യൂബെക്കിൽ വലിയ സംവാദങ്ങൾക്ക് വഴിതുറക്കുന്നു. പ്രവിശ്യയിലെ മതനിരപേക്ഷതാ നിയമങ്ങളെക്കുറിച്ചുള്ള തർക്കങ്ങൾ ഇതോടെ വീണ്ടും സജീവമായിരിക്കുകയാണ്. സ്കൂൾ അധികൃതരുടെ നിലപാട് രക്ഷിതാക്കളെ ഇത്തരം പരിപാടികളിൽ നിന്ന് അകറ്റുമെന്ന ആശങ്കയും ഉയർന്നിട്ടുണ്ട്.

ഗാറ്റിനോയിലെ ഹൾ സെക്ടറിലുള്ള ഒരു പ്രൈമറി സ്കൂളിലാണ് സംഭവം. വരുന്ന സെപ്റ്റംബറിൽ സ്കൂളിൽ നടക്കുന്ന ഒരു പരിപാടിയിൽ വോളൻ്റിയറാകാൻ താല്പര്യം പ്രകടിപ്പിച്ചെത്തിയതായിരുന്നു ഈ മാതാവ്. എന്നാൽ ക്യൂബെക്കിലെ 'ബിൽ 94' നിയമപ്രകാരം ഹിജാബ് ധരിച്ച് വോളൻ്റിയറാകാൻ കഴിയില്ലെന്ന് സ്കൂൾ അധികൃതർ ഇവരെ അറിയിക്കുകയായിരുന്നു എന്ന് പേരെൻ്റ് കമ്മിറ്റി പ്രസിഡൻ്റ് സൈമൺ ലാജോയ് വ്യക്തമാക്കി.

ക്യൂബെക്കിലെ പുതിയ നിയമപ്രകാരം അധ്യാപകർ, പ്രിൻസിപ്പൽമാർ എന്നിവർക്ക് പുറമെ വിദ്യാർത്ഥികളുമായി ഇടപഴകുന്ന വോളൻ്റിയർമാർ ഉൾപ്പെടെയുള്ള ആർക്കും മതചിഹ്നങ്ങൾ ധരിക്കാൻ അനുവാദമില്ല. കുട്ടികൾക്ക് ഭക്ഷണം വിളമ്പുന്നതുപോലെയുള്ള ലളിതമായ കാര്യങ്ങൾ പോലും നിയമത്തിൻ്റെ പരിധിയിൽ വരും. പ്രാദേശിക സ്കൂൾ ബോർഡ് ഈ വിഷയത്തിൽ നേരിട്ട് പ്രതികരിക്കാൻ തയ്യാറായില്ലെങ്കിലും, വിദ്യാർത്ഥികൾക്ക് സേവനം നൽകുന്ന വോളൻ്റിയർമാർക്കും ബിൽ 94 ബാധകമാണെന്ന് പ്രസ്താവനയിലൂടെ സ്ഥിരീകരിച്ചു.
 
ഈ സംഭവത്തോട് രാഷ്ട്രീയ നേതാക്കൾ വ്യത്യസ്ത രീതിയിലാണ് പ്രതികരിച്ചത്. വോളൻ്റിയർമാർക്ക് മേൽ ഇത്തരം നിയമങ്ങൾ അടിച്ചേൽപ്പിക്കുന്നത് യുക്തിരഹിതമാണെന്ന് ലിബറൽ എംപി ഗ്രെഗ് ഫെർഗസ് പറഞ്ഞു.   എന്നാൽ  പാർട്ടി ക്യൂബെക്കോയിസ് എംഎൻഎ പാസ്കൽ ബെറൂബെ നിയമത്തെ അനുകൂലിച്ച് രംഗത്തെത്തി. മതനിരപേക്ഷതയുടെ കാര്യത്തിൽ ക്യൂബെക്ക് സമൂഹം വ്യക്തമായ തീരുമാനങ്ങൾ എടുത്തിട്ടുണ്ടെന്നും അത് എല്ലാവരും അനുസരിക്കാൻ ബാധ്യസ്ഥരാണെന്നും വ്യക്തമാക്കി. ഈ നിയമങ്ങൾ മുസ്ലിം സ്ത്രീകളെയും മറ്റ് മതന്യൂനപക്ഷങ്ങളെയും ലക്ഷ്യം വെച്ചുള്ളതാണെന്ന് വിമർശകർ വാദിക്കുമ്പോൾ, പൊതുസ്ഥാപനങ്ങളുടെ നിഷ്പക്ഷത നിലനിർത്താൻ ഇത് അത്യാവശ്യമാണെന്നാണ് അനുകൂലിക്കുന്നവരുടെ പക്ഷം.