സോഹ്റാന് മംദാനി: 2029-ലെ തിരഞ്ഞെടുപ്പ് ലക്ഷ്യമിട്ട് ഫണ്ട് ശേഖരണം ആരംഭിച്ചു
By: 600002 On: Jun 12, 2026, 7:57 AM
പി പി ചെറിയാന്
ന്യൂയോര്ക്ക്: ആദ്യ ഔദ്യോഗിക കാലാവധി തുടങ്ങി മാസങ്ങള് മാത്രം പിന്നിടുമ്പോള്, 2029-ലെ തന്റെ അടുത്ത മേയര് തിരഞ്ഞെടുപ്പ് പ്രചാരണത്തിനായുള്ള ഫണ്ട് ശേഖരണം ആരംഭിച്ച് ന്യൂയോര്ക്ക് സിറ്റി മേയര് സോഹ്റാന് മംദാനി. സാധാരണയായി ഒരു മേയറും ഇത്ര നേരത്തെ അടുത്ത തിരഞ്ഞെടുപ്പിനായുള്ള ഫണ്ട് ശേഖരണത്തിലേക്ക് കടക്കാറില്ലെന്നിരിക്കെ, മംദാനിയുടെ ഈ നീക്കം രാഷ്ട്രീയ വൃത്തങ്ങളില് വലിയ ചര്ച്ചയായിട്ടുണ്ട്.
വരാനിരിക്കുന്ന തിരഞ്ഞെടുപ്പില് തന്നെ തോല്പ്പിക്കാന് വലിയ സാമ്പത്തിക ശക്തികള് രംഗത്തിറങ്ങുമെന്നും, അവരെ പ്രതിരോധിക്കാന് ഇപ്പോഴേ ഒരുങ്ങണമെന്നും മംദാനി തന്റെ അനുയായികള്ക്ക് അയച്ച സന്ദേശത്തില് വ്യക്തമാക്കുന്നു.
'നമ്മുടെ എതിരാളികള് കൂടുതല് പണവും മികച്ച സ്വാധീനവുമുള്ളവരാണ്. കഴിഞ്ഞ വര്ഷം നമ്മുടെ പ്രസ്ഥാനത്തിനെതിരെ 83 ദശലക്ഷം ഡോളറാണ് അവര് ചിലവഴിച്ചത്. അതുകൊണ്ട് തന്നെ നമ്മള് ഇപ്പോഴേ നിക്ഷേപം തുടങ്ങി മുന്നേറണം,' എന്ന് അദ്ദേഹം സന്ദേശത്തില് ആവശ്യപ്പെട്ടു.
മംദാനിയുടെ സോഷ്യലിസ്റ്റ് നയങ്ങള്ക്കെതിരെ പരസ്യമായി രംഗത്തുവന്ന 'ന്യൂയോര്ക്ക് സിറ്റി കോമണ് സെന്സ്' (NYC Common Sense) പോലുള്ള ധനാഢ്യരുടെ കൂട്ടായ്മകളെ പ്രതിരോധിക്കുകയാണ് ഈ നേരത്തെയുള്ള ഫണ്ട് ശേഖരണത്തിലൂടെ അദ്ദേഹം ലക്ഷ്യമിടുന്നത്.
നിലവില് 2029-ലെ തിരഞ്ഞെടുപ്പില് മംദാനിക്കെതിരെ ശക്തരായ സ്ഥാനാര്ത്ഥികളാരും ഔദ്യോഗികമായി രംഗത്തുവന്നിട്ടില്ലെങ്കിലും, ഡെമോക്രാറ്റിക് പാര്ട്ടിയിലെ മിതവാദികളില് നിന്നും കോര്പ്പറേറ്റ് മേഖലയില് നിന്നും അദ്ദേഹത്തിന് വലിയ വെല്ലുവിളി നേരിടേണ്ടി വരുമെന്നാണ് രാഷ്ട്രീയ നിരീക്ഷകരുടെ വിലയിരുത്തല്.