വേപ്പിംഗ് ചെറുപ്പക്കാരിൽ ശ്വാസകോശ രോഗങ്ങൾക്കും, ഹൃദയസ്തംഭനത്തിനും കാരണമാകുന്നതായി യൂണിവേഴ്സിറ്റി ഓഫ് ആൽബർട്ടയുടെ പഠനം

 

ഇലക്ട്രോണിക് സിഗരറ്റുകളുടെയോ വേപ്പുകളുടെയോ ഉപയോഗം ചെറുപ്പക്കാരിൽ ശ്വാസകോശത്തിൻ്റെയും ഹൃദയത്തിൻ്റെയും പ്രവർത്തനത്തെ ഗുരുതരമായി ബാധിക്കുന്നതായി കാനഡയിലെ യൂണിവേഴ്സിറ്റി ഓഫ് ആൽബർട്ടയുടെ പുതിയ പഠനം വ്യക്തമാക്കുന്നു. ഏകദേശം മൂന്ന് വർഷത്തോളമായി വേപ്പിംഗ് ഉപയോഗിക്കുന്ന ഇരുപതുകളുടെ തുടക്കത്തിലുള്ള യുവാക്കളെ കേന്ദ്രീകരിച്ച് നടത്തിയ പഠനത്തിലാണ് ഈ കണ്ടെത്തൽ.

സാധാരണ രീതിയിലുള്ള പരിശോധനകളിൽ ഇവരുടെ ശ്വാസകോശ പ്രവർത്തനം സാധാരണ നിലയിലാണെന്ന് തോന്നിയേക്കാം. എന്നാൽ മിതമായ വേഗതയിലുള്ള നടത്തം പോലുള്ള ലളിതമായ വ്യായാമങ്ങളിൽ ഏർപ്പെടുമ്പോൾ പോലും ഇവർക്ക് കഠിനമായ ശ്വാസംമുട്ടൽ  അനുഭവപ്പെടുന്നതായി ഗവേഷകർ കണ്ടെത്തി. സാധാരണഗതിയിൽ ഈ പ്രായത്തിലുള്ളവരിൽ ഇത്തരം ശ്വാസതടസ്സങ്ങൾ പ്രകടമാകേണ്ടതല്ലെന്ന് പഠനത്തിന് നേതൃത്വം നൽകിയ പൾമണറി മെഡിസിൻ പ്രൊഫസർ മൈക്കൽ സ്റ്റിക്ക്ലാൻഡ് പറയുന്നു. 

പുകവലി മൂലമുണ്ടാകുന്ന ആരോഗ്യപ്രശ്നങ്ങൾ കുറയ്ക്കുന്നതിനുള്ള ഒരു ബദൽ മാർഗ്ഗമായിട്ടാണ് വേപ്പിംഗ് ആദ്യകാലങ്ങളിൽ അവതരിപ്പിക്കപ്പെട്ടതെങ്കിലും, നിലവിൽ കൗമാരക്കാർക്കിടയിലും യുവാക്കൾക്കിടയിലും ഇത് വലിയ രീതിയിൽ പ്രചാരം നേടിയിട്ടുണ്ട്. മനുഷ്യൻ്റെ ശ്വാസകോശം പൂർണ്ണവളർച്ചയെത്തുന്നത് ഏകദേശം 25 വയസ്സിലാണെന്നിരിക്കെ, ചെറുപ്രായത്തിൽ തന്നെ വേപ്പിംഗിലൂടെ വിഷാംശങ്ങൾ ശരീരത്തിലെത്തുന്നത് ശ്വാസകോശത്തിൻ്റെ സ്വാഭാവിക വളർച്ചയെ തടസ്സപ്പെടുത്തുമെന്നും ഭാവിയിൽ വിട്ടുമാറാത്ത ശ്വാസകോശ രോഗങ്ങൾക്ക് കാരണമാകുമെന്നും ഗവേഷകർ മുന്നറിയിപ്പ് നൽകുന്നു.

കാനഡയിലെ കണക്കുകൾ പ്രകാരം വേപ്പിംഗ് ഉപയോഗിക്കുന്നവരിൽ വലിയൊരു പങ്ക് 15 നും 24 നും ഇടയിൽ പ്രായമുള്ളവരാണ്. ഈ ഗുരുതര സാഹചര്യം കണക്കിലെടുത്ത്, ഇതിൻ്റെ ദീർഘകാല പ്രത്യാഘാതങ്ങളെക്കുറിച്ച് കൂടുതൽ പഠനങ്ങൾ നടത്തുന്നതിനായി യൂണിവേഴ്സിറ്റി ഓഫ് ആൽബർട്ടയും യൂണിവേഴ്സിറ്റി ഓഫ് ബ്രിട്ടീഷ് കൊളംബിയയും സംയുക്തമായി അടുത്ത മൂന്ന് വർഷത്തേക്ക് വിപുലമായ നിരീക്ഷണങ്ങൾ നടത്താൻ തീരുമാനിച്ചിട്ടുണ്ട്.