പോലീസ് റിപ്പോർട്ടുകൾ തയ്യാറാക്കാൻ ആർട്ടിഫിഷ്യൽ ഇൻ്റലിജൻസ്: പൈലറ്റ് പ്രൊജക്റ്റുമായി കാനഡയിലെ ആർ.സി.എം.പി

 

 ബ്രിട്ടീഷ് കൊളംബിയ, ആൽബർട്ട എന്നീ പ്രവിശ്യകളിൽ പോലീസ് റിപ്പോർട്ടുകൾ തയ്യാറാക്കുന്നതിനായി റോയൽ കാനേഡിയൻ മൗണ്ടഡ് പോലീസ് AI സാങ്കേതികവിദ്യ പരീക്ഷണാടിസ്ഥാനത്തിൽ ഉപയോഗിക്കുന്നു. 'ഡ്രാഫ്റ്റ് വൺ' എന്ന് പേരിട്ടിരിക്കുന്ന ഈ സോഫ്റ്റ്‌വെയർ, ഉദ്യോഗസ്ഥർ ധരിക്കുന്ന ബോഡി ക്യാമറകളിൽ നിന്നുള്ള ഓഡിയോ ദൃശ്യങ്ങളെ വിശകലനം ചെയ്ത് സ്വയം റിപ്പോർട്ടുകൾ നിർമ്മിക്കാൻ ശേഷിയുള്ളതാണ്. ട്രാഫിക് പിഴകൾ മുതൽ ഗുരുതരമായ കുറ്റകൃത്യങ്ങൾ വരെയുള്ള കേസുകളിലെ പ്രാഥമിക റിപ്പോർട്ടുകൾ തയ്യാറാക്കാൻ ഈ സംവിധാനം ഉപയോഗിക്കുന്നുണ്ടെങ്കിലും, കൊലപാതകം പോലുള്ള അതിഗുരുതരമായ കേസുകളെ ഇതിൽ നിന്ന് ഒഴിവാക്കിയിട്ടുണ്ട്.

നിലവിൽ പോലീസ് ഉദ്യോഗസ്ഥരുടെ ജോലിഭാരം കുറയ്ക്കാനും സമയലാഭത്തിനുമായാണ് ഓഗസ്റ്റ് വരെ നീളുന്ന ഈ പൈലറ്റ് പ്രൊജക്റ്റ് നടപ്പിലാക്കുന്നതെന്ന് ആർ.സി.എം.പി വക്താക്കൾ വ്യക്തമാക്കി.  അതേസമയം, ഈ എ.ഐ റിപ്പോർട്ടുകൾ കോടതി നടപടികളിലേക്ക് എത്തുന്നതിനെക്കുറിച്ച് നിയമവിദഗ്ദ്ധരും മനുഷ്യാവകാശ പ്രവർത്തകരും ശക്തമായ ആശങ്ക പ്രകടിപ്പിക്കുന്നുണ്ട്. കൃത്രിമബുദ്ധി തയ്യാറാക്കുന്ന റിപ്പോർട്ടുകളിൽ, സൂക്ഷ്മമായ വിവരങ്ങളിൽ പിഴവുകൾ വരാൻ സാധ്യതയുണ്ടെന്നും, ഇത് പ്രതികളുടെ ജാമ്യാപേക്ഷകളെയും വിചാരണകളെയും പ്രതികൂലമായി ബാധിച്ചേക്കാമെന്നും വിദഗ്ദ്ധർ ചൂണ്ടിക്കാണിക്കുന്നു.

കൂടാതെ, റിപ്പോർട്ടിലെ ഏത് ഭാഗമാണ് എ.ഐ നിർമ്മിച്ചതെന്നും ഏതാണ് ഉദ്യോഗസ്ഥൻ എഴുതിയതെന്നും വേർതിരിച്ചറിയാൻ പ്രതിഭാഗം അഭിഭാഷകർ ബോഡി ക്യാമറ ദൃശ്യങ്ങൾ വീണ്ടും പരിശോധിക്കേണ്ടി വരുന്നത് കോടതി നടപടികൾ വൈകാൻ കാരണമാകുമെന്നും വിമർശനമുണ്ട്. എന്നാൽ, എ.ഐ തയ്യാറാക്കുന്ന ഡ്രാഫ്റ്റുകളിൽ ഉദ്യോഗസ്ഥർ നിർബന്ധമായും പരിശോധന നടത്തി ഒപ്പുവെക്കണമെന്നും, കോടതിയിൽ സമർപ്പിക്കുന്ന റിപ്പോർട്ടുകളുടെ മുകളിൽ ഇത് എ.ഐ സഹായത്തോടെ നിർമ്മിച്ചതാണെന്ന വെളിപ്പെടുത്തൽ  ഉണ്ടായിരിക്കുമെന്നും പോലീസ് വിഭാഗം അറിയിച്ചു.