എഐ ഉപയോഗിച്ച് ഭാവിയിലെ മഹാമാരികളെയും പ്രതിരോധിക്കാനാകുന്ന പുതിയ വാക്സിൻ വികസിപ്പിച്ച് കേംബ്രിഡ്ജ് സർവ്വകലാശാല ഗവേഷകർ

ഭാവിയിൽ ഉണ്ടായേക്കാവുന്ന പുതിയ വൈറസ് ബാധകളെപ്പോലും പ്രതിരോധിക്കാൻ ശേഷിയുള്ള പുതിയ തരം വാക്സിൻ എഐ ഉപയോഗിച്ച് കേംബ്രിഡ്ജ് സർവകലാശാലയിലെ ഗവേഷകർ വികസിപ്പിച്ചു. മനുഷ്യരിൽ നടത്തിയ ആദ്യഘട്ട പരീക്ഷണങ്ങളിൽ ഈ വാക്സിൻ മികച്ച രോഗപ്രതിരോധ ശേഷി നൽകുന്നതായി കണ്ടെത്തി. എങ്കിലും, ഇത് പൊതുജനങ്ങൾക്ക് ലഭ്യമാക്കുന്നതിന് മുൻപായി കൂടുതൽ വിപുലമായ പഠനങ്ങൾ ആവശ്യമാണെന്ന് ഗവേഷകർ വ്യക്തമാക്കി.

പൂർണ്ണമായും കമ്പ്യൂട്ടർ സിമുലേഷനുകൾ വഴി ഡിസൈൻ ചെയ്ത, ഇത്തരത്തിലുള്ള ആദ്യത്തെ വാക്സിനാണിത്. കോവിഡ്-19-ന് കാരണമായ സാർസ്-കോവ്-2 ഉൾപ്പെടെയുള്ള വിവിധ തരം കൊറോണ വൈറസുകളെ ചെറുക്കുകയാണ് ഈ വാക്സിൻ്റെ ലക്ഷ്യം. 18-നും 50-നും ഇടയിൽ പ്രായമുള്ള 39 ആരോഗ്യവാന്മാരായ സന്നദ്ധപ്രവർത്തകരിലാണ് ആദ്യ ഘട്ടത്തിൽ പരീക്ഷണം നടത്തിയത്. കോവിഡ്, സാർസ് എന്നിവയ്ക്ക് പുറമെ, ഭാവിയിൽ മനുഷ്യരിലേക്ക് പടർന്ന് മഹാമാരിയുണ്ടാക്കാൻ സാധ്യതയുള്ള വവ്വാലുകളിലെ വൈറസുകൾക്കെതിരെയും ഈ വാക്സിൻ ശക്തമായ പ്രതിരോധം തീർക്കുന്നുണ്ടെന്ന് പരീക്ഷണത്തിൽ തെളിഞ്ഞു.

മൈക്രോ ഫ്ലൂയിഡ് ജെറ്റ് സാങ്കേതികവിദ്യ ഉപയോഗിച്ച് ഒരു ഡി.എൻ.എ  വാക്സിനായാണ് ഇത് നൽകുന്നത്. ഇതിനായി സൂചികൾ ആവശ്യമില്ല എന്നതിനാൽ കുത്തിവെപ്പുകളെ ഭയപ്പെടുന്നവർക്ക് ഇത് ഏറെ ആശ്വാസകരമാകും. മാത്രമല്ല, വളരെ വേഗത്തിൽ വാക്സിനേഷൻ പൂർത്തിയാക്കാനും ഇത് സഹായിക്കും. നിലവിലുള്ള വാക്സിനുകൾക്ക് അതിവേഗം ജനിതകമാറ്റം സംഭവിക്കുന്ന വൈറസുകളെ പൂർണ്ണമായി തടയാൻ കഴിയാറില്ല. എന്നാൽ പുതിയ എ.ഐ വാക്സിനുകൾ ഭാവി മുൻകൂട്ടി കണ്ട് രൂപകൽപ്പന ചെയ്തവയാണ്. ഇവയ്ക്ക് ഒരേ സമയം ഒന്നിലധികം വകഭേദങ്ങളെയും, ഇതുവരെ മനുഷ്യരിൽ കാണപ്പെടാത്ത വൈറസുകളെയും വരെ പ്രതിരോധിക്കാൻ ശേഷിയുണ്ട്.

ഈ വാക്സിനിൽ അടങ്ങിയിരിക്കുന്ന 'സൂപ്പർ ആൻ്റിജൻ' ഭൂരിഭാഗം വാക്സിൻ വിതരണ രീതികൾക്കും അനുയോജ്യമാണ്. കൂടുതൽ ആളുകളിൽ ഇതിൻ്റെ സുരക്ഷിതത്വവും ഫലപ്രാപ്തിയും ഉറപ്പുവരുത്തുന്നതിനായുള്ള രണ്ടാം ഘട്ട പരീക്ഷണങ്ങളാണ് അടുത്ത ലക്ഷ്യം.ഈ പരീക്ഷണം വിജയകരമായാൽ, ഒരു കൂട്ടം വൈറസുകളെ ഒന്നിച്ച് ചെറുക്കാൻ കഴിയുന്ന 'യൂണിവേഴ്സൽ വാക്സിനുകൾ' വികസിപ്പിക്കാൻ ഇത് വഴിയൊരുക്കും. ആഗോള ആരോഗ്യരംഗത്ത് വലിയൊരു കുതിച്ചുചാട്ടമാകുന്ന ഈ സാങ്കേതികവിദ്യ, ലോകമെമ്പാടുമുള്ള മഹാമാരി പ്രതിരോധ പ്രവർത്തനങ്ങളുടെ സ്വഭാവം തന്നെ മാറ്റിമറിച്ചേക്കാം.