ആൽബർട്ടയിൽ ദാരിദ്ര്യം രൂക്ഷമാകുന്നു: 'ഫുഡ് ബാങ്ക്സ് കാനഡ'യുടെ റിപ്പോർട്ട്

ആൽബർട്ടയിൽ ദാരിദ്ര്യവും വിലക്കയറ്റവും അനിയന്ത്രിതമായി വർദ്ധിക്കുന്നതായി പ്രമുഖ ചാരിറ്റി സംഘടനയായ 'ഫുഡ് ബാങ്ക്സ് കാനഡ'യുടെ പുതിയ വാർഷിക റിപ്പോർട്ട് . സംഘടന പുറത്തുവിട്ട പ്രോഗ്രസ് കാർഡിൽ ആൽബർട്ടയ്ക്ക് ഏറ്റവും മോശം ഗ്രേഡായ ഡി മൈനസ് മാത്രമാണ് ലഭിച്ചിരിക്കുന്നത്. വർദ്ധിച്ചുവരുന്ന ജീവിതച്ചെലവ് കാരണം പലചരക്ക് സാധനങ്ങൾ വാങ്ങാൻ പോലും സാധാരണക്കാർ ബുദ്ധിമുട്ടുന്ന സാഹചര്യത്തിലാണ്  ഈ കനത്ത തിരിച്ചടി എത്തിയിരിക്കുന്നത്.

ചികിത്സാ സൗകര്യങ്ങളുടെ കുറവ്, ഉയർന്ന ഭവനവാടക, ഭക്ഷ്യസുരക്ഷയില്ലായ്മ എന്നിവയാണ് പ്രവിശ്യയുടെ മാർക്ക് ഇത്രയധികം കുറയാൻ കാരണമായി റിപ്പോർട്ട് ചൂണ്ടിക്കാണിക്കുന്നത്.  കഴിഞ്ഞ മാസങ്ങളിൽ മാത്രം എഡ്മണ്ടൻ ഫുഡ് ബാങ്കിനെ ആശ്രയിക്കുന്നവരുടെ എണ്ണം റെക്കോർഡ് നിരക്കായ 46,000 ആയി ഉയർന്നുവെന്ന് അധികൃതർ വ്യക്തമാക്കുന്നു. നിലവിലെ സാഹചര്യം നേരിടാൻ സർക്കാർ ധനസഹായം അപര്യാപ്തമാണെന്നാണ് 68 ശതമാനം ഗുണഭോക്താക്കളും അഭിപ്രായപ്പെടുന്നത്. ദാരിദ്ര്യ ലഘൂകരണത്തിനായി വാടക നിയന്ത്രണങ്ങൾ ഏർപ്പെടുത്തണമെന്നും കൃത്യമായ പദ്ധതികൾ ആവിഷ്കരിക്കണമെന്നും റിപ്പോർട്ട് ആവശ്യപ്പെടുന്നു. കാനഡയിലുടനീളം സാമ്പത്തിക പ്രതിസന്ധി നിലനിൽക്കുന്നുണ്ടെങ്കിലും, മറ്റ് പ്രവിശ്യകളെ അപേക്ഷിച്ച് ആൽബർട്ടയുടെ സ്ഥിതി കൂടുതൽ മോശമാണെന്നാണ് ഈ റിപ്പോർട്ട് നൽകുന്ന സൂചന.