യു.എസില് ട്രക്കിംഗ് മേഖലയിലെ പരിശോധന ശക്തമാക്കി; 30 ഇന്ത്യക്കാര് ഉള്പ്പെടെ 52 പേര് അറസ്റ്റില്
By: 600002 On: Jun 5, 2026, 9:09 AM
പി.പി ചെറിയാന്
വാഷിംഗ്ടണ്: യുണൈറ്റഡ് സ്റ്റേറ്റ്സിലെ വാണിജ്യ ട്രക്കിംഗ് മേഖല ലക്ഷ്യമിട്ട് യു.എസ് ബോര്ഡര് പട്രോള് നടത്തിയ വന് പരിശോധനയില് 30 ഇന്ത്യന് പൗരന്മാര് ഉള്പ്പെടെ 52 പേര് അറസ്റ്റിലായി. അരിസോണയിലെ യൂമ സെക്ടറില് നടന്ന 'ഓപ്പറേഷന് ചെക്ക്മേറ്റ്' എന്ന പേരില് നടത്തിയ ഫെഡറല് പരിശോധനയിലാണ് രേഖകളില്ലാതെ വാണിജ്യ വാഹനങ്ങള് ഓടിച്ച ഇവര് പിടിയിലായത്.
മെയ് 11 മുതല് മെയ് 15 വരെയായിരുന്നു രാജ്യവ്യാപകമായി ശ്രദ്ധിക്കപ്പെട്ട ഈ പരിശോധന നടന്നത്. പിടിയിലായവരില് 36 പേരും കൂറ്റന് സെമി-ട്രക്കുകള് ഓടിച്ചിരുന്നവരാണെന്ന് യു.എസ് കസ്റ്റംസ് ആന്ഡ് ബോര്ഡര് പ്രൊട്ടക്ഷന് അറിയിച്ചു. ഇന്ത്യക്കാരെ കൂടാതെ മെക്സിക്കോ, എല് സാല്വദോര്, റഷ്യ എന്നീ രാജ്യങ്ങളില് നിന്നുള്ളവരും അറസ്റ്റിലായവരില് ഉള്പ്പെടുന്നു. അറസ്റ്റിലായവരുടെ പേരുവിവരങ്ങള് അധികൃതര് പുറത്തുവിട്ടിട്ടില്ല.
പിടിയിലായവരില് ഭൂരിഭാഗം പേര്ക്കും കാലിഫോര്ണിയ, ന്യൂയോര്ക്ക്, വാഷിംഗ്ടണ്, വെര്ജീനിയ തുടങ്ങിയ വിവിധ യു.എസ് സംസ്ഥാനങ്ങള് നല്കിയ കമേഴ്സ്യല് ഡ്രൈവിംഗ് ലൈസന്സുകള് (CDL) ഉണ്ടായിരുന്നു. എന്നാല് മൂന്ന് പേര്ക്ക് യാതൊരുവിധ ലൈസന്സും ഉണ്ടായിരുന്നില്ല. കൂടാതെ, പലരുടെയും വര്ക്ക് പെര്മിറ്റുകളുടെ (Employment Authorization Documents) കാലാവധി കഴിഞ്ഞതാണെന്നും അധികൃതര് കണ്ടെത്തിയിട്ടുണ്ട്. അറസ്റ്റിലായ 52 പേര്ക്കെതിരെയും ഫെഡറല് നിയമപ്രകാരം നടപടികള് സ്വീകരിച്ചിട്ടുണ്ടെന്നും ഇവരെ ഉടന് തന്നെ അമേരിക്കയില് നിന്ന് നാടുകടത്തുമെന്നും സി.ബി.പി വ്യക്തമാക്കി.
പൊതുജനങ്ങളുടെയും റോഡുകളുടെയും സുരക്ഷ മുന്നിര്ത്തിയാണ് ഇത്തരമൊരു പരിശോധന നടത്തിയതെന്ന് യൂമ സെക്ടര് ആക്ടിംഗ് ചീഫ് പട്രോള് ഏജന്റ് ഡസ്റ്റിന് ഡബ്ല്യു. കോഡില് പറഞ്ഞു. മതിയായ രേഖകളില്ലാതെയും നിയമവിരുദ്ധമായും രാജ്യത്ത് തുടരുന്ന ഡ്രൈവര്മാര് റോഡുകളില് വലിയ അപകടസാധ്യതയാണ് ഉയര്ത്തുന്നതെന്നും, ഇത്തരം ഡ്രൈവര്മാരെ കണ്ടെത്തി മാരകമായ റോഡപകടങ്ങള് ഒഴിവാക്കാനാണ് തങ്ങള് ശ്രമിക്കുന്നതെന്നും അദ്ദേഹം കൂട്ടിച്ചേര്ത്തു.
ട്രംപ് ഭരണകൂടം അനധികൃത കുടിയേറ്റത്തിനെതിരെ നടത്തുന്ന ശക്തമായ നടപടികളുടെ ഭാഗമായാണ് ഈ പരിശോധനയും. യോഗ്യതയില്ലാത്ത വിദേശ പൗരന്മാര് കമേഴ്സ്യല് ട്രക്കുകളും ബസുകളും ഓടിക്കാനുള്ള ലൈസന്സ് നേടുന്നത് തടയാന് യു.എസ് ഗതാഗത വകുപ്പ് അടുത്തിടെ കര്ശന ഉത്തരവിറക്കിയിരുന്നു.