ലോകകപ്പ് സ്റ്റേഡിയങ്ങളിൽ റീയൂസബിൾ വാട്ടർ ബോട്ടിലുകൾക്ക് ഫിഫയുടെ നിരോധനം

വരാനിരിക്കുന്ന ഫുട്ബോൾ ലോകകപ്പ് മത്സരങ്ങളിൽ കാണികൾക്ക് സ്റ്റേഡിയത്തിനുള്ളിലേക്ക് വീണ്ടും ഉപയോഗിക്കാവുന്ന വാട്ടർ ബോട്ടിലുകൾ (Reusable water bottles) കൊണ്ടുപോകുന്നതിന് ഫിഫ നിരോധനം ഏർപ്പെടുത്തി. ഒഴിഞ്ഞതും സുതാര്യവുമായ ഒരു ലിറ്റർ വരെയുള്ള ബോട്ടിലുകൾ അനുവദിക്കുമെന്ന മുൻ തീരുമാനം പൂർണ്ണമായി തിരുത്തിക്കൊണ്ടാണ് ഫിഫയുടെ ഈ പുതിയ പ്രഖ്യാപനം. സുരക്ഷാ കാരണങ്ങൾ മുൻനിർത്തിയാണ് ഈ നടപടിയെന്നാണ് ഔദ്യോഗിക വിശദീകരണം.

കളിക്കാരുടെയും കാണികളുടെയും സുരക്ഷയ്ക്ക് ഭീഷണിയാകുന്ന രീതിയിൽ ബോട്ടിലുകൾ മൈതാനത്തേക്ക് എറിയാനോ മറ്റ് രീതിയിൽ ദുരുപയോഗം ചെയ്യാനോ സാധ്യതയുണ്ടെന്നാണ് ഫിഫയുടെ നിലപാട്. വടക്കേ അമേരിക്കയിലെ 16 ലോകകപ്പ് വേദികളിലും ഈ നിരോധനം ബാധകമായിരിക്കും. ടൊറൻ്റോ, വാൻകൂവർ, മെക്സിക്കോ സിറ്റി, ലോസ് ആഞ്ചലസ്, ന്യൂയോർക്ക്, അറ്റ്ലാൻ്റ തുടങ്ങിയ പ്രമുഖ നഗരങ്ങളിലെ സ്റ്റേഡിയങ്ങളെല്ലാം ഇതിൽ ഉൾപ്പെടുന്നു.
കടുത്ത ചൂടും സാമ്പത്തിക ബാധ്യതയും: ആരാധകരുടെ ആശങ്കകൾ

ഫിഫയുടെ പെട്ടെന്നുള്ള ഈ തീരുമാനം ആരാധകർക്കിടയിൽ വലിയ പ്രതിഷേധത്തിന് കാരണമായിട്ടുണ്ട്. കടുത്ത ചൂടും ഈർപ്പവുമുള്ള വടക്കേ അമേരിക്കൻ വേനൽക്കാലത്ത് ഈ നിരോധനം ജനങ്ങളെ ദുരിതത്തിലാക്കുമെന്നാണ് പ്രധാന വിമർശനം. ജൂൺ 12-ന് ടൊറൻ്റോയിൽ നടക്കുന്ന കാനഡ - ബോസ്നിയ ആൻഡ് ഹെർസഗോവിന മത്സരദിവസം 26°C ചൂടാണ് പ്രവചിച്ചിരിക്കുന്നത്. വാൻകൂവറിലെ മത്സരങ്ങൾക്ക് താപനില 20 ഡിഗ്രിയോളമായിരിക്കും. ഇത്തരം സാഹചര്യങ്ങളിൽ കൃത്യമായി വെള്ളം കുടിക്കേണ്ടത് അത്യാവശ്യമാണ്.

ടൊറന്റോയിലെ ബി.എം.ഒ ഫീൽഡ്, വാൻകൂവറിലെ ബി.സി പ്ലേസ് തുടങ്ങിയ സ്റ്റേഡിയങ്ങളിൽ വാട്ടർ ഫൗണ്ടനുകൾ ഉണ്ടെങ്കിലും, സ്വന്തം ബോട്ടിലുകളിൽ അവയിൽ നിന്ന് വെള്ളം നിറയ്ക്കാൻ അനുവദിക്കില്ല. പകരം സ്റ്റേഡിയത്തിനുള്ളിൽ നിന്ന് വില കൊടുത്ത് വെള്ളം വാങ്ങേണ്ടി വരും.സ്റ്റേഡിയത്തിനുള്ളിലെ കുടിവെള്ളത്തിന് സാധാരണ നിരക്ക് മാത്രമേ ഈടാക്കൂ എന്ന് ഫിഫ വ്യക്തമാക്കുന്നുണ്ടെങ്കിലും, ഉയർന്ന ടിക്കറ്റ് നിരക്കിന് പുറമെ ഇതുംകൂടി താങ്ങേണ്ടി വരുന്നത് വലിയ സാമ്പത്തിക ബാധ്യതയാണെന്ന് ആരാധകർ പറയുന്നു
.