കാനഡയിൽ നിന്ന് വേർപിരിയുന്നതിനെക്കുറിച്ചുള്ള ചോദ്യാവലിക്ക് ആൽബർട്ട പ്രവിശ്യാ ഭരണകൂടം ഔദ്യോഗിക അംഗീകാരം നൽകി

കാനഡയിൽ നിന്ന് വേർപിരിയുന്നതുമായി ബന്ധപ്പെട്ട് ഒക്ടോബർ 19-ന് നടക്കാനിരിക്കുന്ന ജനഹിതപരിശോധനയുടെ ചോദ്യാവലിക്ക് ആൽബർട്ട പ്രീമിയർ ഡാനിയേൽ സ്മിത്തും പ്രവിശ്യാ ക്യാബിനറ്റും ഔദ്യോഗിക അംഗീകാരം നൽകി. നിയമപരമായി നിർബന്ധിതമല്ലാത്ത ഈ ഹിതപരിശോധനയിൽ, കാനഡയുടെ ഭാഗമായി തുടരണമോ അതോ വേർപിരിയലിനായുള്ള ഔദ്യോഗിക നിയമനടപടികളിലേക്ക് കടക്കണമോ എന്ന് വോട്ടർമാർക്ക് നേരിട്ട് തിരഞ്ഞെടുക്കാം. 

ബാലറ്റ് പേപ്പറിൽ വോട്ടർമാർക്ക് മുന്നിലെത്തുന്ന പ്രധാന ചോദ്യം ഇതാണ്: "ആൽബർട്ട കാനഡയുടെ ഒരു പ്രവിശ്യയായി തുടരണമോ, അതോ കാനഡയിൽ നിന്ന് വേർപിരിയണോ വേണ്ടയോ എന്നതിനെക്കുറിച്ച് നിർബന്ധിത വോട്ടെടുപ്പ് നടത്തുന്നതിന് ആവശ്യമായ നിയമപരമായ നടപടികൾ ആൽബർട്ട സർക്കാർ ആരംഭിക്കണോ? ഇതിനായി താഴെ പറയുന്ന രണ്ട് ഓപ്ഷനുകളാണ് വോട്ടർമാർക്ക് നൽകുക. 
ഓപ്ഷൻ 1: ആൽബർട്ട കാനഡയുടെ ഒരു പ്രവിശ്യയായി തന്നെ തുടരണം.  
ഓപ്ഷൻ 2: കാനഡയിൽ നിന്ന് വേർപിരിയുന്നതിനെക്കുറിച്ച് നിർബന്ധിത വോട്ടെടുപ്പ് നടത്തുന്നതിന് ആവശ്യമായ നിയമപരമായ നടപടികൾ ആൽബർട്ട സർക്കാർ ആരംഭിക്കണം.

വോട്ടർമാർ നേരിട്ട് പോളിംഗ് സ്റ്റേഷനുകളിൽ എത്തി മാത്രമേ വോട്ട് രേഖപ്പെടുത്താൻ പാടുള്ളൂ. തപാൽ വോട്ടുകൾ പൂർണ്ണമായും ഒഴിവാക്കിയിട്ടുണ്ട്. റഫറണ്ടത്തിലെ 10 ചോദ്യങ്ങൾക്കായി വ്യത്യസ്ത നിറങ്ങളിലുള്ള ബാലറ്റുകളാണ് തയ്യാറാക്കുന്നത്. ഇതിൽ ഒന്നാമത്തെ ചോദ്യം അടങ്ങിയ ബാലറ്റായിരിക്കും വോട്ടർമാർക്ക് ആദ്യം ലഭിക്കുകയെന്ന് തെരഞ്ഞെടുപ്പ് ഉദ്യോഗസ്ഥർ വ്യാഴാഴ്ച സ്ഥിരീകരിച്ചു. വോട്ടർമാർക്ക് താല്പര്യമുള്ള ചോദ്യങ്ങൾക്ക് നേരെ 'X' എന്ന് അടയാളപ്പെടുത്താനോ അല്ലെങ്കിൽ ഏതെങ്കിലും ചോദ്യങ്ങൾ വോട്ട് ചെയ്യാതെ ബ്ലാങ്ക് ആയി വിടാനോ ഉള്ള സ്വാതന്ത്ര്യമുണ്ടായിരിക്കുമെന്ന് ഏജൻസി വക്താവ് അറിയിച്ചു. വോട്ടിംഗ് സ്റ്റേഷനിൽ എത്തുന്ന ഒരു വോട്ടർക്ക് ബാലറ്റുകൾ നിരസിക്കാനുള്ള അവകാശവുമുണ്ട്.

ഈ വോട്ടെടുപ്പിനായി ഏകദേശം 38 ദശലക്ഷം ബാലറ്റ് പേപ്പറുകൾ അച്ചടിക്കേണ്ടി വരും. റഫറണ്ടം നിയന്ത്രിക്കുന്നതിനും വോട്ടുകൾ എണ്ണുന്നതിനുമായി 60,000 മുതൽ 90,000 വരെ തെരഞ്ഞെടുപ്പ് ഉദ്യോഗസ്ഥർ ആവശ്യമായി വരും. വോട്ടെടുപ്പ് വലിയ സാമ്പത്തിക ബാധ്യത വരുത്തിവെക്കുമെന്നും പ്രവിശ്യയുടെ വികസനത്തെയും നിക്ഷേപങ്ങളെയും ഇത് ദോഷകരമായി ബാധിക്കുമെന്നും ബിസിനസ്സ് രംഗത്തുള്ളവരും പ്രതിപക്ഷവും വിമർശിക്കുന്നുണ്ട്.