വാണിജ്യ ട്രക്കുകളിൽ ഡാഷ് ക്യാമറകൾ നിർബന്ധമാക്കാൻ ബ്രിട്ടീഷ് കൊളംബിയ

 

തുടർച്ചയായുണ്ടാകുന്ന വാഹനാപകടങ്ങളുടെ പശ്ചാത്തലത്തിൽ, വാണിജ്യ ട്രക്കുകളിൽ ഡാഷ് ക്യാമറകൾ നിർബന്ധമാക്കാൻ ബ്രിട്ടീഷ് കൊളംബിയ  തീരുമാനിച്ചു. കാനഡയിൽ ഇത്തരമൊരു നിയമം കൊണ്ടുവരുന്ന ആദ്യ പ്രവിശ്യയാണ് ബ്രിട്ടീഷ് കൊളംബിയ. റോഡ് സുരക്ഷ വർദ്ധിപ്പിക്കാനും അപകടങ്ങളിൽ വ്യക്തമായ അന്വേഷണം ഉറപ്പാക്കാനുമാണ് ഈ പുതിയ നീക്കം. റോയൽ അസൻ്റ് ലഭിച്ച് ആറ് മാസത്തിന് ശേഷം ഈ നിയമം പ്രാബല്യത്തിൽ വരും.

വാണിജ്യ ട്രക്കുകളുടെ മുൻവശത്തെ റോഡ് ദൃശ്യങ്ങൾ പകർത്തുന്ന ക്യാമറകളാണ് നിർബന്ധമാക്കുന്നത്. ഡ്രൈവർമാരുടെ സ്വകാര്യത മാനിച്ചുകൊണ്ട്, ക്യാബിൻ്റെ ഉള്ളിലെ ദൃശ്യങ്ങൾ പകർത്തുന്ന ക്യാമറകൾ ഈ നിയമത്തിൻ്റെ പരിധിയിൽ വരില്ല.  ഹൈവേ 5-ൽ ഉണ്ടായ നിരവധി ദാരുണമായ അപകടങ്ങളെത്തുടർന്നാണ് ഈ നിയമത്തിനായുള്ള സമ്മർദ്ദം ശക്തമായത്. അപകടങ്ങളിൽ പ്രിയപ്പെട്ടവരെ നഷ്ടപ്പെട്ട കുടുംബങ്ങളുടെ ആവശ്യപ്രകാരം കൺസർവേറ്റീവ് എം.എൽ.എ വാർഡ് സ്റ്റാമർ ആണ് ഈ ബില്ലിനായി മുന്നിട്ടിറങ്ങിയത്.

അപകടങ്ങൾ ഉണ്ടാകുമ്പോൾ തെളിവുകൾ നഷ്ടപ്പെടാതിരിക്കാനും, വർഷങ്ങളോളം നീളുന്ന അന്വേഷണങ്ങൾ ഒഴിവാക്കി കൃത്യമായ വിവരങ്ങൾ വേഗത്തിൽ കണ്ടെത്താനും ഡാഷ് ക്യാമറകൾ സഹായിക്കുമെന്ന് വാർഡ് സ്റ്റാമർ പറഞ്ഞു. ഡ്രൈവർമാരിൽ കൂടുതൽ ഉത്തരവാദിത്തബോധം ഉണ്ടാക്കാൻ ഇത് കാരണമാകുമെന്നും അദ്ദേഹം കൂട്ടിച്ചേർത്തു.

ബി.സി. ട്രക്കിംഗ് അസോസിയേഷൻ ഈ തീരുമാനത്തെ സ്വാഗതം ചെയ്തിട്ടുണ്ട്. നിലവിൽ തന്നെ അസോസിയേഷനിലെ 75 ശതമാനത്തോളം ട്രക്കുകളിൽ ഡാഷ് ക്യാമറകൾ ഉപയോഗിക്കുന്നുണ്ടെന്ന് പ്രസിഡൻ്റ് ഡേവ് ഏൾ വ്യക്തമാക്കി. വ്യത്യസ്ത പ്രവിശ്യകളിൽ വ്യത്യസ്ത നിയമങ്ങൾ വരുന്നത് ഒഴിവാക്കാൻ, ഈ നിയമം രാജ്യവ്യാപകമായി നടപ്പിലാക്കണമെന്നാണ് അസോസിയേഷൻ്റെ ആവശ്യം. ട്രാൻസ്പോർട്ട് മന്ത്രിമാരുടെ കൗൺസിലിൽ ഇതുസംബന്ധിച്ച ചർച്ചകൾ ഇതിനകം തന്നെ ആരംഭിച്ചിട്ടുണ്ട്.