തീപിടിത്തത്തിനും പൊള്ളലേൽക്കാനും സാധ്യത: 'സെക്യൂറ' എയർ ഫ്രയറുകൾ ഉപയോഗിക്കരുതെന്ന്  മുന്നറിയിപ്പ്

 

 

 പ്രമുഖ ബ്രാൻഡായ സെക്യൂറയുടെ എയർ ഫ്രയറുകൾ ഉപയോഗിക്കുന്നത് അടിയന്തിരമായി നിർത്താൻ ഉപഭോക്താക്കൾക്ക് ഹെൽത്ത് കാനഡ കർശന നിർദ്ദേശം നൽകി. എയർ ഫ്രയറിനുള്ളിലെ വയറിംഗ് കണക്ഷനുകൾ അമിതമായി ചൂടാകാനും, ഇത് വഴി തീപിടുത്തമുണ്ടാകാനും  സാധ്യതയുണ്ടെന്ന് കണ്ടെത്തിയതിനെ തുടർന്നാണ് ഈ അടിയന്തിര നടപടി. 2019 മേയ് മാസത്തിനും 2020 ഒക്ടോബർ മാസത്തിനും ഇടയിൽ കാനഡയിലുടനീളം വിറ്റഴിക്കപ്പെട്ട 680-ഓളം സെക്യൂറ എയർ ഫ്രയറുകളെയാണ് ഈ സുരക്ഷാ മുന്നറിയിപ്പ് ബാധിക്കുന്നത്.

കറുപ്പ് നിറത്തിൽ വെള്ളിനിറത്തിലുള്ള ഡിസൈനുകളോട് കൂടിയ ഈ  ഉപകരണത്തിൻ്റെ  നിർമ്മാണ തകരാറാണ് ഈ അപകടസാധ്യതയിലേക്ക് നയിച്ചതെന്ന് കനേഡിയൻ ആരോഗ്യ മന്ത്രാലയം പുറത്തിറക്കിയ പ്രസ്താവനയിൽ വ്യക്തമാക്കുന്നു.  
സെക്യൂറ എയർ ഫ്രയറിൻ്റെ 'SAF-53 (TXG-DS16)' എന്ന മോഡൽ നമ്പറും, ഒപ്പം 1903, 1904 എന്നീ ഡെയ്റ്റ് കോഡുകളുമുള്ള  ഉപകരണങ്ങളാണ് നിലവിൽ തിരിച്ചുവിളിച്ചിരിക്കുന്നത് . ഈ വിവരങ്ങൾ എയർ ഫ്രയറുകളുടെ അടിഭാഗത്തുള്ള വെള്ളി നിറത്തിലുള്ള ലേബലിൽ രേഖപ്പെടുത്തിയിട്ടുണ്ട്.

നിലവിൽ കാനഡയിൽ ഇതുകാരണം അപകടങ്ങളോ പരിക്കുകളോ റിപ്പോർട്ട് ചെയ്യപ്പെട്ടിട്ടില്ലെങ്കിലും, മുൻകരുതൽ എന്ന നിലയിൽ ഇവയുടെ ഉപയോഗം പൂർണ്ണമായും നിർത്താൻ അധികൃതർ ആവശ്യപ്പെടുന്നു. ബാധിക്കപ്പെട്ട എയർ ഫ്രയറുകൾ കൈവശമുള്ളവർ അതിന്റെ പവർ കോർഡ് വൈദ്യുതി കേബിൾ മുറിച്ചുമാറ്റിയ ശേഷം, ആ ചിത്രവും മറ്റ് വിവരങ്ങളും കമ്പനിക്ക് സമർപ്പിച്ചാൽ സൗജന്യമായി പുതിയ ഉൽപ്പന്നമോ അല്ലെങ്കിൽ ആമസോൺ ഗിഫ്റ്റ് കാർഡോ നൽകുമെന്ന് നിർമ്മാതാക്കളായ സെക്യൂറ ഇൻക് വ്യക്തമാക്കുന്നു. കാനഡയിലെ ഉപഭോക്തൃ സുരക്ഷാ നിയമപ്രകാരം ഇത്തരം തിരിച്ചുവിളിച്ച ഉൽപ്പന്നങ്ങൾ വീണ്ടും വിൽക്കുന്നതോ മറ്റുള്ളവർക്ക് സമ്മാനമായി നൽകുന്നതോ കർശനമായി നിരോധിച്ചിട്ടുണ്ട്.