ആൽബർട്ട വിഘടനവാദ ഹിതപരിശോധന അപകടകരമായ നടപടി:  പ്രധാനമന്ത്രി മാർക്ക് കാർണി

കാനഡയിൽ നിന്ന് വേർപിരിയുന്നതുമായി ബന്ധപ്പെട്ട് ഒക്ടോബറിൽ നടക്കാനിരിക്കുന്ന ആൽബെർട്ടാ ഹിതപരിശോധന കേവലം ഒരു വിലപേശൽ തന്ത്രമായി  ഉപയോഗിക്കുന്നത് അത്യന്തം അപകടകരമാണെന്ന് പ്രധാനമന്ത്രി മാർക്ക് കാർണി മുന്നറിയിപ്പ് നൽകി. യൂറോപ്യൻ യൂണിയനിൽ നിന്നുള്ള ബ്രിട്ടൻ്റെ വേർപിരിയൽ സമയത്ത് ബാങ്ക് ഓഫ് ഇംഗ്ലണ്ട് ഗവർണറായിരുന്ന തൻ്റെ വ്യക്തിപരമായ അനുഭവം ചൂണ്ടിക്കാണിച്ചാണ് അദ്ദേഹം ഈ മുന്നറിയിപ്പ് നൽകിയത്.

ഇത്തരം വിഘടനവാദ വോട്ടെടുപ്പുകൾ പലപ്പോഴും 'ഒരു നഷ്ടവുമില്ലാത്ത മികച്ച അവസരം' എന്ന രീതിയിലാണ് അനുകൂലികൾ ചിത്രീകരിക്കാറുള്ളതെന്നും, ഭാവി ചർച്ചകളിൽ തങ്ങളുടെ പ്രദേശത്തിന് കൂടുതൽ മേൽക്കൈ നേടാൻ ഇത് സഹായിക്കുമെന്ന വ്യാമോഹത്തിലാണ് ജനങ്ങൾ വോട്ട് ചെയ്യാറെന്നും അദ്ദേഹം ഓർമ്മിപ്പിച്ചു. ബ്രെക്സിറ്റിൻ്റെ ആഘാതത്തിൽ നിന്നും അത് വരുത്തിവെച്ച നഷ്ടങ്ങളിൽ നിന്നും കരകയറാൻ ഒരു പതിറ്റാണ്ട് കഴിഞ്ഞിട്ടും ബ്രിട്ടൻ ഇപ്പോഴും ശ്രമിച്ചു കൊണ്ടിരിക്കുകയാണെന്നും കാർണി കൂട്ടിച്ചേർത്തു.  

ആൽബർട്ടാ പ്രീമിയർ ഡാനിയേൽ സ്മിത്ത് കഴിഞ്ഞ ആഴ്ചയാണ് ഒക്ടോബർ 19-ന് നടക്കാനിരിക്കുന്ന ഹിതപരിശോധനയിൽ കാനഡയിൽ നിന്ന് വേർപിരിയുന്നതുമായി ബന്ധപ്പെട്ട ഒരു ചോദ്യം കൂടി ഉൾപ്പെടുത്തുമെന്ന് പ്രഖ്യാപിച്ചത്. കാനഡയിൽ തുടരണമോ അതോ വേർപിരിയുന്നതിനുള്ള നിയമപരമായ നടപടികളിലേക്ക് കടക്കണമോ എന്നാണ് ജനങ്ങളോട് ചോദിക്കുന്നത്.

എന്നാൽ ഈ ചോദ്യം പ്രവിശ്യകൾക്ക് കാനഡയിൽ നിന്ന് വേർപിരിയുന്നതിനുള്ള നിയമപരമായ നിബന്ധനകൾ വ്യക്തമാക്കുന്ന ക്ലാരിറ്റി ആക്ടിന് അനുസൃതമാണോ എന്ന് ഫെഡറൽ സർക്കാർ കർശനമായി പരിശോധിച്ചുവരികയാണെന്ന് മാർക്ക് കാർണി വ്യക്തമാക്കി. കനേഡിയൻ ഐക്യത്തിനായി താൻ ശക്തമായി പ്രചാരണം നടത്തുമെന്നും, സഹകരണ ഫെഡറലിസം പൂർണ്ണമായും വിജയകരമാണെന്ന് തെളിയിക്കുമെന്നും അദ്ദേഹം  മാധ്യമങ്ങളോട് പറഞ്ഞു.