കാനഡയിൽ 10,000 തദ്ദേശീയർക്ക് തൊഴിലവസരങ്ങളുമായി 'ടിം ഹോർട്ടൺസ്'; വിദേശ തൊഴിലാളികളെ ആശ്രയിക്കുന്നത് കുറയ്ക്കുന്നു

കാനഡയിലെ പ്രമുഖ കോഫി-ഫാസ്റ്റ് ഫുഡ് ഭീമന്മാരായ 'ടിം ഹോർട്ടൺസ്'  രാജ്യത്തുടനീളമായി 10,000 തദ്ദേശീയരായ തൊഴിലാളികളെ പുതുതായി നിയമിക്കുന്നു. ഇതിലൂടെ കനേഡിയൻ സർക്കാരിൻ്റെ 'ടെംപററി ഫോറിൻ വർക്കർ'  പ്രോഗ്രാമിനെ ആശ്രയിക്കുന്നത് കമ്പനി ഗണ്യമായി കുറയ്ക്കും. പ്രാദേശിക സമൂഹങ്ങളുമായുള്ള ബന്ധം ശക്തമാക്കുന്നതിൻ്റെയും ഈ വർഷം രാജ്യമൊട്ടാകെ ആരംഭിക്കുന്ന 80 പുതിയ ഔട്ട്‌ലെറ്റുകളുടെ വിപുലീകരണത്തിൻ്റെയും ഭാഗമായാണ് ഇതെന്ന് കമ്പനി വ്യക്തമാക്കി.

കാനഡയിലുടനീളം 4,000-ലധികം ശാഖകളുള്ള ടിം ഹോർട്ടൺസ് രാജ്യത്തെ ഏറ്റവും വലിയ തൊഴിൽദാതാക്കളിൽ ഒന്നാണ്. കോവിഡ് മഹാമാരിയുടെ സമയത്ത് കടുത്ത തൊഴിലാളി ക്ഷാമം നേരിട്ടപ്പോൾ വിദേശ തൊഴിലാളികളെ കമ്പനി വൻതോതിൽ ആശ്രയിച്ചിരുന്നു. എന്നാൽ നിലവിൽ കമ്പനിയിലെ ആകെ ജീവനക്കാരുടെ 3.6 ശതമാനം മാത്രമാണ് ഈ പ്രോഗ്രാം വഴിയുള്ളത്. വരും ദിവസങ്ങളിൽ ഇത് ഇനിയും കുറയ്ക്കാനാണ് അധികൃതരുടെ തീരുമാനം.

 പ്രാദേശിക പ്രതിഭകളെ കണ്ടെത്തുന്നതിനായി കാനഡയിലുടനീളം നൂറുകണക്കിന് തൊഴിൽ മേളകൾ നടത്താൻ കമ്പനി പദ്ധതിയിടുന്നുണ്ട്. കനേഡിയൻ വിദ്യാർത്ഥികൾ, നിലവിൽ കാനഡയിൽ ജോലി ചെയ്യാൻ അനുമതിയുള്ള അന്താരാഷ്ട്ര വിദ്യാർത്ഥികൾ മറ്റ് ഉദ്യോഗാർത്ഥികൾ എന്നിവരെ ലക്ഷ്യമിട്ടാണ് പുതിയ കാമ്പയിൻ. വിദേശ തൊഴിലാളികളെ കൂടുതൽ ലഭ്യമാക്കുന്നതിനായുള്ള ലോബിയിംഗ് പ്രവർത്തനങ്ങൾ പൂർണ്ണമായി നിർത്തിയതായി ടിം ഹോർട്ടൺസിൻ്റെ മാതൃ കമ്പനിയായ 'റെസ്റ്റോറൻ്റ് ബ്രാൻഡ്‌സ് ഇൻ്റർനാഷണൽ' സ്ഥിരീകരിച്ചു.

കാനഡയിലെ യുവാക്കൾക്കിടയിലെ തൊഴിലില്ലായ്മ നിരക്ക് 14 ശതമാനത്തിന് മുകളിലേക്ക് ഉയർന്ന സാഹചര്യത്തിലാണ് കമ്പനിയുടെ ഈ സുപ്രധാന തീരുമാനം. പുതിയ സ്റ്റോറുകൾ തുറക്കുന്നതിനൊപ്പം നിലവിലുള്ള ഔട്ട്‌ലെറ്റുകൾ നവീകരിക്കാനും ഉൽപ്പന്നങ്ങളുടെ ഗുണനിലവാരം ഉയർത്താനും കമ്പനിക്ക് പദ്ധതിയുണ്ട്.