കോസ്റ്റ്കോയുടെ 'കിർക്ക്‌ലാൻഡ്' മൾട്ടി വൈറ്റമിൻ ഗുളികകൾ കനേഡിയൻ വിപണിയിൽ നിന്ന് തിരിച്ചുവിളിച്ചു

 

പ്രമുഖ വെയർഹൗസ് ശൃംഖലയായ കോസ്റ്റ്കോയുടെ (Costco) സ്വന്തം ബ്രാൻഡായ 'കിർക്ക്‌ലാൻഡ് സിഗ്നേച്ചർ വുമൺ 50+' (Kirkland Signature Women 50+) മൾട്ടി വൈറ്റമിൻ ഗുളികകൾ കാനഡയിലുടനീളം വിപണിയിൽ നിന്ന് തിരിച്ചുവിളിച്ചു. ഗുളികകൾ അടങ്ങിയ കുപ്പികൾക്കുള്ളിൽ ലോഹക്കഷണങ്ങളുടെ സാന്നിധ്യം കണ്ടെത്തിയതിനെ തുടർന്നാണ്  'ഹെൽത്ത് കനഡ'യുടെ അടിയന്തര നടപടി.

മേയ് 25-നാണ് ഇതുമായി ബന്ധപ്പെട്ട നോട്ടീസ് പുറപ്പെടുവിച്ചത്. നിലവിൽ '5J46568W7' എന്ന ലോട്ട് നമ്പറിലുള്ള ഉൽപ്പന്നങ്ങളെ മാത്രമാണ് ഈ പ്രശ്നം ബാധിച്ചിട്ടുള്ളത്. അതിനാൽ ഉപഭോക്താക്കൾ തങ്ങളുടെ കൈവശമുള്ള വൈറ്റമിൻ കുപ്പികളിലെ ലോട്ട് നമ്പർ പരിശോധിച്ച് ഉറപ്പുവരുത്തണമെന്ന് അധികൃതർ നിർദ്ദേശിച്ചു. ഈ നിർദ്ദിഷ്ട ലോട്ട് നമ്പറിലുള്ള വൈറ്റമിൻ ഗുളികകൾ വാങ്ങിയവർ അത് കഴിക്കുന്നത് അടിയന്തരമായി നിർത്തലാക്കണമെന്ന് ഹെൽത്ത് കനഡ കർശന മുന്നറിയിപ്പ് നൽകി. 

ഗുളികകൾ ഉപയോഗിക്കുന്നത് നിർത്തുന്നതിന് മുൻപ്, പ്രത്യേകിച്ചും മറ്റ് ആരോഗ്യപ്രശ്നങ്ങൾ ഉള്ളവർ, തങ്ങളുടെ ഡോക്ടറുടെയോ ആരോഗ്യവിദഗ്ദ്ധരുടെയോ ഉപദേശം തേടേണ്ടതാണ്. ഈ ഗുളികകൾ കഴിച്ചതിനെ തുടർന്ന് എന്തെങ്കിലും പാർശ്വഫലങ്ങൾ അനുഭവപ്പെട്ടിട്ടുണ്ടെങ്കിൽ അത് ഹെൽത്ത് കനഡയെ അറിയിക്കാനും ഉപഭോക്താക്കളോട് ആവശ്യപ്പെട്ടിട്ടുണ്ട്.