കാനഡയിൽ തുടരാൻ ആൽബർട്ടയിൽ വൻ പ്രചാരണം:  രാജ്യത്തെ ഭിന്നിപ്പിക്കാനാകില്ലെന്ന് ക്യാമ്പയിൻ

കാനഡയിൽ നിന്നും ആൽബർട്ട വേർപിരിയുന്നതിന് എതിരെ  'ഫോറെവർ കാനഡ' എന്ന പേരിൽ എഡ്മൻ്റണിൽ വിപുലമായ പ്രചാരണ പരിപാടികൾക്ക് തുടക്കമായി. ഒക്ടോബറിൽ നടക്കാനിരിക്കുന്ന ജനഹിതപരിശോധനയിൽ കാനഡയ്ക്കൊപ്പം നിലകൊള്ളാൻ പ്രവിശ്യാ നിവാസികളെ പ്രേരിപ്പിക്കുകയാണ് ഈ ജനകീയ മുന്നേറ്റത്തിൻ്റെ  ലക്ഷ്യം.

ആൽബർട്ടയുടെ മുൻ ഡെപ്യൂട്ടി പ്രീമിയർ തോമസ് ലൂക്കാസുക്കിൻ്റെ നേതൃത്വത്തിൽ നൂറുകണക്കിന് സന്നദ്ധപ്രവർത്തകർ രാജ്യത്തിൻ്റെ ഐക്യം വിളംബരം ചെയ്ത് 'യൂണിറ്റി ബസ്' വഴി പ്രവിശ്യയിലുടനീളം പര്യടനം നടത്തും. ഈ രാജ്യം ആർക്കും തകർക്കാൻ കഴിയില്ലെന്നും, വരാനിരിക്കുന്ന വോട്ടെടുപ്പ് ആൽബർട്ടയുടെ ചരിത്രത്തിലെ ഏറ്റവും നിർണായകമായ ഒന്നാണെന്നും ലൂക്കാസുക് വ്യക്തമാക്കി. 

പ്രവിശ്യയിലെ ഭൂരിപക്ഷം ജനങ്ങളും കാനഡയ്ക്കൊപ്പം ഉറച്ചുനിൽക്കുന്നു എന്ന് തെളിയിക്കാൻ വീടുകൾ കയറിയുള്ള പ്രചാരണം, വിവരശേഖരണം, ഫ്ലാഗ് സൈനുകൾ സ്ഥാപിക്കൽ എന്നിവ ക്യാമ്പയിൻ്റെ ഭാഗമായി നടപ്പിലാക്കും. ആൽബർട്ട കാനഡയുടെ ഭാഗമായി തുടരണമോ അതോ നിയമപരമായ വേർപിരിയൽ നടപടികളിലേക്ക് കടക്കണമോ എന്ന് ആരായുന്ന ഹിതപരിശോധന ഒക്ടോബറിൽ നടത്തുമെന്ന് പ്രീമിയർ ഡാനിയേൽ സ്മിത്ത് ഈ ആഴ്ച പ്രഖ്യാപിച്ചിരുന്നു. ഇതിനെ തുടർന്നാണ് രാജ്യത്തിൻ്റെ അഖണ്ഡത കാത്തുസൂക്ഷിക്കാൻ രാഷ്ട്രീയ ഭേദമന്യേ പ്രമുഖരും കനേഡിയൻ പൗരന്മാരും ഒന്നിച്ച് തെരുവിലിറങ്ങിയിരിക്കുന്നത്.