കാനഡയിൽ പട്ടുണ്ണികൾ പെരുകുന്നു: ലൈം രോഗബാധയിൽ വൻ വർദ്ധനവ്, ജാഗ്രതാ നിർദ്ദേശം

കാനഡയിൽ പട്ടുണ്ണികൾ വഴിയുള്ള രോഗബാധകൾ അതിവേഗം വർദ്ധിക്കുന്നതായി ആരോഗ്യവിദഗ്ധരുടെ മുന്നറിയിപ്പ്. ആഗോളതാപനവും ശൈത്യകാലത്തിൻ്റെ കാഠിന്യം കുറഞ്ഞതുമാണ് പട്ടുണ്ണികൾ പെരുകാൻ കാരണമായി ചൂണ്ടിക്കാണിക്കപ്പെടുന്നത്. പുതിയ കണക്കുകൾ പ്രകാരം, കാനഡയിൽ 'ലൈം രോഗം' (Lyme disease) ബാധിക്കുന്നവരുടെ എണ്ണത്തിൽ വൻ വർദ്ധനവാണ് രേഖപ്പെടുത്തിയിരിക്കുന്നത്. 2015-ൽ വെറും 917 കേസുകൾ റിപ്പോർട്ട് ചെയ്ത സ്ഥാനത്ത്, 2024 ആയപ്പോഴേക്കും ഇത് 5,200 കടന്നു. എന്നാൽ യഥാർത്ഥ രോഗബാധിതരുടെ എണ്ണം ഇതിലും വളരെ കൂടുതലായിരിക്കുമെന്നാണ് വിദഗ്ധർ ചൂണ്ടിക്കാണിക്കുന്നത്.
 
മുൻകാലങ്ങളെ അപേക്ഷിച്ച് കാനഡയിൽ തണുപ്പുകാലത്തിൻ്റെ ദൈർഘ്യം കുറയുന്നതും ചൂട് കൂടുന്നതുമാണ് പട്ടുണ്ണികൾക്ക് അനുകൂല സാഹചര്യമൊരുക്കുന്നത്. തണുപ്പുകാലത്ത് ഇവ ചത്തുപോകാത്തതും, മാൻ, എലി തുടങ്ങിയ ജീവികളുടെ എണ്ണം വർദ്ധിച്ചതും ഇവ വടക്കൻ മേഖലകളിലേക്ക് വേഗത്തിൽ വ്യാപിക്കാൻ കാരണമായി. കൃഷിക്കാർ, ഔട്ട്ഡോർ ജോലിക്കാർ എന്നിവർക്കാണ് രോഗബാധയേൽക്കാൻ കൂടുതൽ സാധ്യത.  ലൈം രോഗത്തിന് പുറമേ മുൻപ് കാനഡയിൽ അപൂർവ്വമായിരുന്ന ചില മാരക രോഗങ്ങളും ഇപ്പോൾ റിപ്പോർട്ട് ചെയ്യപ്പെടുന്നുണ്ട്. 

ഒൻ്റാരിയോയിൽ അനാപ്ലാസ്മോസിസ്, ബാബേസിയോസിസ് എന്നീ രോഗങ്ങൾ ഇതിനകം സ്ഥിരീകരിച്ചിട്ടുണ്ട്. കാനഡയുടെ മധ്യ-കിഴക്കൻ മേഖലകളിൽ മുൻപ് കാണാതിരുന്ന റോക്കി മൗണ്ടൻ സ്പോട്ടഡ് ഫിവറും  കഴിഞ്ഞ വേനൽക്കാലത്ത് ഒൻ്റാരിയോയിൽ റിപ്പോർട്ട് ചെയ്തു. പട്ടുണ്ണികളുടെ കടിയേൽക്കുന്നത് വഴി റെഡ് മീറ്റ് കഴിക്കുമ്പോൾ അലർജിയുണ്ടാകുന്ന ആൽഫാ-ഗാൽ സിൻഡ്രോം എന്ന രോഗവും കാനഡയിൽ വ്യാപിക്കുന്നതായി ഗവേഷകർ വ്യക്തമാക്കി. ഒൻ്റാരിയോയ്ക്ക് പുറമെ, ക്യൂബെക്കിലും സ്ഥിതി ആശങ്കാജനകമാണ്. മോൺട്രിയോളിൽ മാത്രം 2025-ൽ 161 ലൈം രോഗബാധകൾ റിപ്പോർട്ട് ചെയ്തു. ഇത് ചരിത്രത്തിലെ ഏറ്റവും ഉയർന്ന നിരക്കാണ്. ഈ പ്രതിസന്ധി പഠിക്കാൻ കാനഡയിലെ ഗവേഷകർ 'കനേഡിയൻ ടിക് റിസർച്ച് ആൻഡ് ഇന്നൊവേഷൻ സെൻ്റർ' സ്ഥാപിച്ചിട്ടുണ്ട്.

പട്ടുണ്ണികളുടെ ശല്യമുണ്ടെങ്കിലും ആളുകൾ ഭയന്ന് വീടിനുള്ളിൽ ഇരിക്കേണ്ടതില്ലെന്നും, ആവശ്യമായ മുൻകരുതലുകൾ എടുത്ത് വേനൽക്കാലം ആസ്വദിക്കണമെന്നുമാണ് ഡോക്ടർമാർ നിർദ്ദേശിക്കുന്നത്. കാടുകളിലോ പുല്ലുനിറഞ്ഞ സ്ഥലങ്ങളിലോ പോകുമ്പോൾ ശരീരം പൂർണ്ണമായി മറയ്ക്കുന്ന നീളമുള്ള കൈയുള്ള കുപ്പായങ്ങളും പാൻ്റുകളും ധരിക്കണമെന്നും പ്രാണികളെ അകറ്റുന്ന ലോഷനുകൾ ഉപയോഗിക്കണമെന്നും അവർ നിർദ്ദേശിച്ചു.