സൈബർ തട്ടിപ്പുകാർക്കെതിരെ കനേഡിയൻ-യുഎസ് സേനകളുടെ സംയുക്ത നീക്കം, കോടിക്കണക്കിന് രൂപയുടെ സാമ്പത്തിക നഷ്ടം ഒഴിവാക്കി

അന്താരാഷ്ട്ര ഓൺലൈൻ സാമ്പത്തിക തട്ടിപ്പ് ശൃംഖലകൾക്കെതിരെ കാനഡയിലെ എഡ്മൻ്റൺ പോലീസ് സർവീസും യുണൈറ്റഡ് സ്റ്റേറ്റ്സ് സീക്രട്ട് സർവീസും ചേർന്ന് നടത്തിയ വിപുലമായ അന്വേഷണം വൻ വിജയം. എത്തിക്കൽ ഹാക്കർമാരുടെ ആഗോള ശൃംഖലയുമായി സഹകരിച്ച് നടത്തിയ ഈ സംയുക്ത ദൗത്യത്തിലൂടെ ഇരകളുടെ ബാങ്ക് അക്കൗണ്ടുകളിൽ നിന്ന് തട്ടിപ്പുകാർ പണം തട്ടിയെടുക്കുന്നത് തത്സമയം തടയാൻ അന്വേഷണസംഘത്തിന് സാധിച്ചു. കഴിഞ്ഞ ഒരു വർഷമായി തുടരുന്ന ഈ ഓപ്പറേഷനിലൂടെ വിവിധ രാജ്യങ്ങളിലായി മുന്നൂറിലധികം ബാങ്ക് അക്കൗണ്ടുകൾ മരവിപ്പിക്കുകയും ഏകദേശം 42 മില്യൺ ഡോളറിലധികം രൂപ തട്ടിപ്പുകാരുടെ അക്കൗണ്ടിലേക്ക് മാറ്റുന്നത് തടയുകയും ചെയ്തു.

പ്രമുഖ റീട്ടെയിൽ കമ്പനികളുടെയോ സർക്കാർ ഏജൻസികളുടെയോ പ്രതിനിധികളായി ചമഞ്ഞ് ജനങ്ങളിൽ ഭീതി പടർത്തിയാണ് പ്രതികൾ തട്ടിപ്പ് നടത്തിയിരുന്നതെന്ന് പോലീസ് വ്യക്തമാക്കി.   ഇരകളുടെ കമ്പ്യൂട്ടറുകൾ ഹാക്ക് ചെയ്ത്  അവരുടെ പണം മുഴുവൻ അന്താരാഷ്ട്ര ക്രിമിനൽ സംഘങ്ങളിലേക്ക് മാറ്റുന്ന രീതിയാണ് പിന്തുടരുന്നത്. പലപ്പോഴും ഇരകൾ തങ്ങൾ വഞ്ചിക്കപ്പെടുകയാണെന്ന് തിരിച്ചറിയാത്തത് അന്വേഷണത്തിന് വെല്ലുവിളി ഉയർത്തിയതായി അധികൃതർ ചൂണ്ടിക്കാട്ടുന്നു. ഒരു സർക്കാർ ഏജൻസിയും ഫോണിലൂടെയോ ഇമെയിലിലൂടെയോ വ്യക്തിഗത സാമ്പത്തിക വിവരങ്ങളോ കമ്പ്യൂട്ടറുകളുടെ നിയന്ത്രണമോ ആവശ്യപ്പെടില്ലെന്നും, ഇത്തരം സംശയാസ്പദമായ സാഹചര്യങ്ങൾ ഉണ്ടായാൽ ഉടനടി ആൻ്റി-ഫ്രോഡ് സെൻ്ററുകളിലോ പ്രാദേശിക പോലീസിലോ വിവരമറിയിക്കണമെന്നും എഡ്മൻ്റൺ പോലീസ് പൊതുജനങ്ങൾക്ക് ജാഗ്രതാ നിർദ്ദേശം നൽകി.