ഒൻ്റാരിയോ ജയിലുകളിൽ നിന്ന് അബദ്ധത്തിൽ വിട്ടയച്ച മൂന്ന് തടവുകാരെ കണ്ടെത്താനായില്ല; സർക്കാർ നടപടികൾ ശക്തമാക്കുന്നു

 

കാനഡയിലെ ഒൻ്റാരിയോ പ്രവിശ്യയിലെ ജയിലുകളിൽ നിന്ന് അധികൃതരുടെ പിഴവ് മൂലം അബദ്ധത്തിൽ വിട്ടയച്ച അഞ്ച് തടവുകാരിൽ രണ്ട് പേരെ പോലീസ് വീണ്ടും പിടികൂടി. ബാക്കി മൂന്ന് പേർക്കായി ഇപ്പോഴും തിരച്ചിൽ തുടരുകയാണെന്ന് ഒൻ്റാരിയോ സർക്കാർ അറിയിച്ചു. ഒൻ്റാരിയോയിൽ കഴിഞ്ഞ അഞ്ച് വർഷത്തിനിടയിൽ 150-ലധികം തടവുകാരെയാണ് അധികൃതരുടെ പിഴവ് മൂലം അബദ്ധത്തിൽ ജയിലിൽ നിന്ന് വിട്ടയച്ചത്. ഇതിൽ ഭൂരിഭാഗവും  ജയിൽ അധികൃതരുടെ ഭാഗത്തുനിന്നുണ്ടായ വീഴ്ചകൾ കാരണമാണ് സംഭവിച്ചത്.

കഴിഞ്ഞ ഏപ്രിൽ പകുതിയോടെ ആറ് തടവുകാരെ കാണാതായെന്നാണ് പ്രീമിയർ ഡഗ് ഫോർഡ് ആദ്യം അറിയിച്ചിരുന്നത്. പിന്നീട് ഇത് അഞ്ചാണെന്ന് തിരുത്തി. ഇതിൽ രണ്ട് പേരെ പിന്നീട് പിടികൂടിയെങ്കിലും ജയിൽ അധികൃതരുടെ ഭാഗത്തു നിന്നുണ്ടായ ഗുരുതരമായ വീഴ്ച വലിയ വിമർശനങ്ങൾക്ക് ഇടയാക്കിയിരുന്നു. ഇത്തരം പിഴവുകൾ ആവർത്തിക്കാതിരിക്കാൻ ജയിലുകളിൽ ശക്തമായ മേൽനോട്ടവും കർശനമായ പരിശോധനകളും ഏർപ്പെടുത്തുമെന്ന് സർക്കാർ അറിയിച്ചു. അബദ്ധത്തിൽ പുറത്തുപോയ തടവുകാർ പൊതുജനങ്ങൾക്ക് ഭീഷണിയാണോ എന്ന് പരിശോധിച്ച്, ആവശ്യമെങ്കിൽ  മുന്നറിയിപ്പ് നൽകാനുള്ള ചുമതല പ്രാദേശിക പോലീസിനാണെന്ന് സോളിസിറ്റർ ജനറൽ അറിയിച്ചു. ഒളിവിൽ പോയ തടവുകാരുടെ ചിത്രങ്ങൾ പുറത്തുവിടണമെന്നും ഈ വിഷയത്തിൽ കൂടുതൽ സുതാര്യത വേണമെന്നും പ്രതിപക്ഷം ആവശ്യപ്പെട്ടിട്ടുണ്ട്. പൊതുജനങ്ങൾക്ക് കാര്യങ്ങൾ അറിയാനുള്ള അവകാശമുണ്ടെന്നും പ്രതിപക്ഷം വ്യക്തമാക്കി.

തടവുകാരെ അബദ്ധത്തിൽ വിട്ടയച്ച സംഭവം പ്രീമിയർ ഡഗ് ഫോർഡിൻ്റെ സർക്കാരിന് വലിയ രാഷ്ട്രീയ തലവേദനയായി മാറിയിട്ടുണ്ട്. ഇതേ തുടർന്ന് ജയിൽ സംവിധാനങ്ങളുടെ വിശ്വാസ്യത തിരിച്ചുപിടിക്കാനുള്ള കഠിനശ്രമത്തിലാണ് ഇപ്പോൾ ഒൻ്റാരിയോ ഭരണകൂടം. കാണാതായ മൂന്ന് തടവുകാരെക്കുറിച്ചുള്ള വിവരങ്ങൾ സുരക്ഷാ കാരണങ്ങളാൽ പോലീസ് ഇതുവരെ പരസ്യപ്പെടുത്തിയിട്ടില്ല.