മോഷ്ടിക്കപ്പെട്ട തോക്കുകളുമായി ഇന്ത്യൻ വംശജൻ പിടിയിൽ; കാൽഗറിയിൽ വൻ ആയുധവേട്ട

സംഘടിത കുറ്റകൃത്യങ്ങൾക്കെതിരെയുള്ള അന്വേഷണത്തിൻ്റെ ഭാഗമായി വടക്കുകിഴക്കൻ കാൽഗറിയിൽ നിന്ന് തോക്കുകളും വെടിയുണ്ടകളുമായി ഇന്ത്യൻ വംശജനായ 19-കാരനെ പോലീസ് അറസ്റ്റ് ചെയ്തു. മാനിറ്റോബയിൽ നിന്ന് മോഷ്ടിച്ചതടക്കം രണ്ട് കൈത്തോക്കുകളാണ് ഇയാളിൽ നിന്ന് കണ്ടെടുത്തത്.ആൽബെർട്ട ലോ എൻഫോഴ്‌സ്‌മെൻ്റ് റെസ്‌പോൺസ് ടീം നടത്തിയ പരിശോധനയിൽ രണ്ട് കൈത്തോക്കുകൾ, മാഗസിനുകൾ, വെടിയുണ്ടകൾ എന്നിവ കണ്ടെടുത്തു. പിടിച്ചെടുത്ത തോക്കുകളിലൊന്ന് മാനിറ്റോബയിൽ നിന്ന് മോഷ്ടിച്ചതാണ്. 

ഇക്ജോത് സിദ്ദു (19) എന്ന യുവാവാണ് പിടിയിലായത്. നിരോധിത ആയുധങ്ങൾ കൈവശം വെക്കൽ, മോഷ്ടിച്ച ആയുധം സൂക്ഷിക്കൽ തുടങ്ങി എട്ട് കുറ്റങ്ങളാണ് ഇയാൾക്കെതിരെ ചുമത്തിയിരിക്കുന്നത്. പിടിച്ചെടുത്ത ആയുധങ്ങൾ മുമ്പ് നടന്ന മറ്റേതെങ്കിലും വെടിവെപ്പുകളിലോ കുറ്റകൃത്യങ്ങളിലോ ഉപയോഗിച്ചിട്ടുണ്ടോ എന്ന് പോലീസ് പരിശോധിച്ചു വരികയാണ്. പ്രവിശ്യകൾ കടന്നുള്ള മയക്കുമരുന്ന്-ആയുധ മാഫിയ സംഘങ്ങളുമായി ഇയാൾക്ക് ബന്ധമുണ്ടോ എന്നും അന്വേഷിക്കുന്നുണ്ട്.നിലവിൽ ജാമ്യത്തിൽ ഇറങ്ങിയ പ്രതി മെയ് 29-ന് കോടതിയിൽ ഹാജരാകണം. സംഘടിത കുറ്റകൃത്യങ്ങൾ തടയുന്നതിനും നഗരത്തിലെ തോക്ക് ഉപയോഗിച്ചുള്ള അക്രമങ്ങൾ കുറയ്ക്കുന്നതിനുമുള്ള പോലീസിൻ്റെ കർശന നടപടികളുടെ ഭാഗമായാണ് ഈ അറസ്റ്റ്.