ഒൻ്റാരിയോയിൽ ഡോക്ടർമാർ ഉപയോഗിക്കുന്ന AI ടൂളുകളിൽ പിഴവ്: രോഗികളുടെ സുരക്ഷയിൽ ആശങ്കയെന്ന് ഓഡിറ്റർ ജനറൽ

ഒൻ്റാരിയോയിലെ ഡോക്ടർമാർ ഉപയോഗിക്കുന്ന ആർട്ടിഫിഷ്യൽ ഇൻ്റലിജൻസ് (AI) ടൂളുകൾ തെറ്റായ വിവരങ്ങൾ നൽകുന്നതായി ഓഡിറ്റർ ജനറലിൻ്റെ മുന്നറിയിപ്പ്. രോഗികളുടെ ചികിത്സാ കുറിപ്പുകൾ തയ്യാറാക്കുന്നതിനായി ഉപയോഗിക്കുന്ന എഐ സ്ക്രൈബ് ടൂളുകളിലാണ് പിഴവ് കണ്ടെത്തിയത്. ഇല്ലാത്ത കാര്യങ്ങൾ ഉൾപ്പെടുത്തുന്നതും പ്രധാന വിവരങ്ങൾ വിട്ടുപോകുന്നതും വലിയ സുരക്ഷാ ഭീഷണിയാണെന്ന് ഓഡിറ്റർ ജനറൽ ഷെല്ലി സ്പെൻസ് വ്യക്തമാക്കി.

പരിശോധന നടത്തിയവയിൽ 45% സിസ്റ്റങ്ങളും ഇല്ലാത്ത വിവരങ്ങൾ റിപ്പോർട്ടിൽ ഉൾപ്പെടുത്തി. 60% കേസുകളിലും തെറ്റായ മരുന്നുകളാണ് രേഖപ്പെടുത്തിയത്.  വിവരങ്ങൾ വിട്ടുപോകുന്നു: 85% റിപ്പോർട്ടുകളിലും രോഗികളുടെ മാനസികാരോഗ്യവുമായി ബന്ധപ്പെട്ട പ്രധാന വിവരങ്ങൾ രേഖപ്പെടുത്താൻ AI പരാജയപ്പെട്ടതായും കണ്ടെത്തിയിട്ടുണ്ട്. ഡോക്ടർമാരും രോഗികളും തമ്മിലുള്ള സംഭാഷണം കേട്ട്, അത് തനിയെ മെഡിക്കൽ റിപ്പോർട്ടുകളാക്കി മാറ്റുന്ന സാങ്കേതികവിദ്യയാണ് എഐ സ്ക്രൈബ്. ഡോക്ടർമാരുടെ ജോലിഭാരം കുറയ്ക്കാനായി 2023-ലാണ് ഒൻ്റാരിയോ സർക്കാർ ഇത് അവതരിപ്പിച്ചത്. എന്നാൽ, കൃത്യമായ സുരക്ഷാ പരിശോധനകൾ നടത്താതെയാണ് 20 കമ്പനികൾക്ക് ഇതിനുള്ള അനുമതി നൽകിയതെന്ന് റിപ്പോർട്ട് കുറ്റപ്പെടുത്തുന്നു. 

എന്നാൽ ഈ പിഴവുകൾ പരീക്ഷണ ഘട്ടത്തിൽ മാത്രമാണ് ഉണ്ടായതെന്നും നേരിട്ടുള്ള ചികിത്സയിൽ പ്രശ്നങ്ങളില്ലെന്നുമാണ് മന്ത്രി സ്റ്റീഫൻ ക്രോഫോർഡ് പറയുന്നത്. ആവശ്യമായ മാറ്റങ്ങൾ വരുത്തിയിട്ടുണ്ടെന്നും അദ്ദേഹം അവകാശപ്പെട്ടു. എങ്കിലും, ഈ സാങ്കേതികവിദ്യയിൽ പൂർണ്ണ വിശ്വാസമില്ലെന്ന് ഓഡിറ്റർ ജനറൽ പറഞ്ഞു. AI ഉപയോഗിക്കുന്നത് നല്ലതാണെങ്കിലും മനുഷ്യൻ്റെ മേൽനോട്ടം നിർബന്ധമാണെന്ന് റിപ്പോർട്ട് ഓർമ്മിപ്പിക്കുന്നു. വരും ദിവസങ്ങളിൽ കൂടുതൽ കർശനമായ പരിശോധനകൾക്കും സുരക്ഷാ മാനദണ്ഡങ്ങൾക്കും ശേഷം മാത്രമേ ഇത്തരം ടൂളുകൾ ഉപയോഗിക്കാവൂ എന്ന് സർക്കാർ സമ്മതിച്ചിട്ടുണ്ട്.