ക്രെഡിറ്റ് ഏജൻസികൾക്കെതിരെ കാനഡയിൽ വൻതുക നഷ്ടപരിഹാരം ആവശ്യപ്പെട്ട് ക്ലാസ്-ആക്ഷൻ ഹർജി

പ്രമുഖ ക്രെഡിറ്റ് റിപ്പോർട്ടിംഗ് ഏജൻസികളായ ഇക്വിഫാക്സിനും ട്രാൻസ് യൂണിയനും  എതിരെ കാനഡയിൽ പുതിയ ക്ലാസ്-ആക്ഷൻ ഹർജി ഫയൽ ചെയ്തു.  ഉപഭോക്താക്കളുടെ ക്രെഡിറ്റ് ഫയലുകളിൽ തെറ്റായ വിവരങ്ങൾ ഉൾപ്പെടുത്തിയെന്നും അത് തിരുത്താൻ മതിയായ സഹായം നൽകുന്നില്ലെന്നും ആരോപിച്ചാണ് ഹർജി.

തൻ്റെ ക്രെഡിറ്റ് ഫയലിൽ മറ്റൊരു വ്യക്തിയുടെ ഭവനവായ്പ വിവരങ്ങൾ തെറ്റായി രേഖപ്പെടുത്തിയത് മാസങ്ങളോളം നീണ്ട ശ്രമങ്ങൾക്കൊടുവിലും തിരുത്താൻ സാധിച്ചില്ലെന്ന് കെവിൻ വില്ലെനിയൂവ് എന്ന ഉപഭോക്താവ് ചൂണ്ടിക്കാട്ടി. നിലവിൽ 79 ശതമാനം ക്രെഡിറ്റ് ഫയലുകളിലും തെറ്റായ വിവരങ്ങൾ അടങ്ങിയിട്ടുണ്ടെന്നും ഇതിൻ്റെ ഉത്തരവാദിത്തം ഏജൻസികൾ ഏറ്റെടുക്കുന്നില്ലെന്നും പരാതിയിൽ പറയുന്നു.

ക്യൂബെക് സുപ്പീരിയർ കോടതിയിൽ സമർപ്പിച്ച ഈ ഹർജിയിലൂടെ ഓരോ അംഗത്തിനും 10,000 ഡോളർ വീതം നഷ്ടപരിഹാരം ലഭിക്കാൻ സാധ്യതയുണ്ട്. 2023 മെയ് 5-ന് ശേഷം തങ്ങളുടെ ക്രെഡിറ്റ് ഫയലിലെ പിശകുകൾ തിരുത്താൻ അപേക്ഷ നൽകിയിട്ടും കൃത്യമായ സമയത്ത് പരിഹാരം ലഭിക്കാത്ത കാനഡയിലുടനീളമുള്ള താമസക്കാർക്ക് ഈ ക്ലാസ്-ആക്ഷനിൽ ഭാഗമാകാം. 5,000 ഡോളർ നഷ്ടപരിഹാരമായും മറ്റൊരു 5,000 ഡോളർ ശിക്ഷാനടപടിയായുള്ള തുകയായുമാണ്  ഹർജിക്കാർ ആവശ്യപ്പെടുന്നത്. എന്നാൽ ആരോപണങ്ങൾ നിഷേധിച്ച ഇക്വിഫാക്സ്, നിയമപരമായ മാർഗങ്ങളിലൂടെ ഇതിനെ നേരിടുമെന്ന് അറിയിച്ചിട്ടുണ്ട്.