കരടിയുടെ ആക്രമണത്തില് കൊല്ലപ്പെടുന്നതിന് മുന്പ് അച്ഛന് അവസാന സന്ദേശമയച്ച് യുവാവ്
By: 600002 On: May 12, 2026, 12:44 PM
പി പി ചെറിയാന്
മൊണ്ടാന: അമേരിക്കയിലെ മൊണ്ടാനയിലുള്ള ഗ്ലേസിയര് നാഷണല് പാര്ക്കില് കരടിയുടെ ആക്രമണത്തില് 33-കാരനായ ആന്തണി പോളിയോ കൊല്ലപ്പെട്ടു. 1998-ന് ശേഷം ഈ പ്രദേശത്ത് റിപ്പോര്ട്ട് ചെയ്യപ്പെടുന്ന ആദ്യത്തെ കരടി ആക്രമണ മരണമാണിത്.
ആക്രമണത്തിന് തൊട്ടുമുന്പ് ആന്തണി തന്റെ അച്ഛന് വൈകാരികമായ ഒരു വോയിസ്മെയില് അയച്ചിരുന്നു. 'അച്ഛാ, ഞാന് മലകയറുകയാണ്. ഇവിടെ നല്ല വന്യമായ അന്തരീക്ഷമാണ്. ഐ ലവ് യു ഡാഡ്,' എന്നായിരുന്നു ആ സന്ദേശം.
മൗണ്ടന് ബ്രൗണ് ട്രെയിലില് ഒറ്റയ്ക്ക് ഹൈക്കിംഗ് നടത്തുന്നതിനിടെയാണ് ആന്തണി കരടിയുടെ മുന്പില്പ്പെട്ടത്. ഇതൊരു അപ്രതീക്ഷിത ഏറ്റുമുട്ടലായിരുന്നുവെന്ന് അന്വേഷണ ഉദ്യോഗസ്ഥര് കരുതുന്നു.
പരിചയസമ്പന്നനായ ഒരു ഹൈക്കര് ആയിരുന്ന ആന്തണി, കരടിയെ പ്രതിരോധിക്കാന് 'ബിയര് സ്പ്രേ' (Bear Spray) ഉപയോഗിച്ചിരുന്നതായും തെളിവുകള് സൂചിപ്പിക്കുന്നു. എന്നാല് ആക്രമണത്തില് നിന്ന് രക്ഷപ്പെടാന് അദ്ദേഹത്തിന് സാധിച്ചില്ല.
ആന്തണിയുടെ മൃതദേഹം നടപ്പാതയില് നിന്നും ഏകദേശം 15 മീറ്റര് അകലെ വനത്തിനുള്ളില് നിന്നാണ് കണ്ടെത്തിയത്. നിലവില് സുരക്ഷാ മുന്കരുതലിന്റെ ഭാഗമായി ഈ പ്രദേശം താല്ക്കാലികമായി അടച്ചിട്ടിരിക്കുകയാണ്.
ഫ്ലോറിഡ സ്വദേശിയായ ആന്തണി ഒരു മികച്ച കായികതാരവും സാമൂഹിക പ്രവര്ത്തകനുമായിരുന്നു. മകന്റെ വിയോഗത്തില് തളര്ന്ന അച്ഛന് ആര്തര്, ആന്തണി ഒരു പോരാളിയായിരുന്നുവെന്ന് കണ്ണീരോടെ ഓര്ത്തെടുത്തു.