വാഹനങ്ങൾ തകരാറിലാക്കി വിലകുറച്ച് തട്ടിയെടുക്കുന്ന സംഘം പിടിയിൽ; ആൽബർട്ടയിൽ ആറ് പേർക്കെതിരെ കേസ്

ആൽബർട്ടയിലെ എഡ്മൻ്റൺ, കാൽഗറി ഉൾപ്പെടെയുള്ള മേഖലകളിൽ വാഹന ഉടമകളെ കബളിപ്പിച്ച് കുറഞ്ഞ വിലയ്ക്ക് കാറുകൾ തട്ടിയെടുക്കുന്ന ആറംഗ സംഘത്തിനെതിരെ പോലീസ് കേസെടുത്തു. വാഹനങ്ങൾ വാങ്ങാനെന്ന വ്യാജേന എത്തുന്ന പ്രതികൾ, വിൽപനക്കാരൻ്റെ ശ്രദ്ധ തിരിച്ച് കാറിൻ്റെ എൻജിനിലോ മറ്റ് ഭാഗങ്ങളിലോ മനഃപൂർവം കേടുപാടുകൾ വരുത്തുകയാണ് ചെയ്യുന്നത്. തുടർന്ന് വാഹനം തകരാറിലാണെന്ന് വിശ്വസിപ്പിച്ച് ഉടമയെ ഭീഷണിപ്പെടുത്തിയും സമ്മർദ്ദത്തിലാക്കിയും വിപണി വിലയേക്കാൾ വളരെ കുറഞ്ഞ തുകയ്ക്ക് വാഹനം സ്വന്തമാക്കുന്നതാണ് ഇവരുടെ രീതി. ഇത്തരത്തിൽ തട്ടിയെടുക്കുന്ന വാഹനങ്ങൾ വ്യാജ രേഖകളും കൃത്രിമം കാണിച്ച ഓഡോമീറ്റർ റീഡിംഗും ഉപയോഗിച്ച് മറ്റ് കുറ്റകൃത്യങ്ങൾക്കായി ഉപയോഗിച്ചതായും എഡ്മൻ്റൺ പോലീസ് കണ്ടെത്തി.

സംഭവവുമായി ബന്ധപ്പെട്ട് 24-നും 39-നും ഇടയിൽ പ്രായമുള്ള ആറ് പേർക്കെതിരെ സാമ്പത്തിക തട്ടിപ്പ്, രേഖകളിൽ കൃത്രിമം കാണിക്കൽ തുടങ്ങിയ 33 കുറ്റങ്ങൾ ചുമത്തിയിട്ടുണ്ട്. ഇതിനോടകം 13 പരാതികൾ ലഭിച്ചിട്ടുണ്ടെന്നും എന്നാൽ കൂടുതൽ പേർ ഈ തട്ടിപ്പിന് ഇരയായിട്ടുണ്ടാകാമെന്നും പോലീസ് സംശയിക്കുന്നു. പ്രതികളിൽ നാല് പേർക്കായി പ്രവിശ്യാതലത്തിൽ ലുക്കൗട്ട് നോട്ടീസ് പുറപ്പെടുവിച്ചിട്ടുണ്ട്. സ്വകാര്യമായി വാഹനങ്ങൾ വിൽക്കുന്നവർ അപരിചിതരായ ഇടപാടുകാരുടെ കാര്യത്തിൽ ജാഗ്രത പാലിക്കണമെന്ന് എഡ്മൻ്റൺ പോലീസ് സർവീസ്  മുന്നറിയിപ്പ് നൽകി.