ആൽബർട്ടയിൽ ഇത്തവണത്തെ പോളൺ സീസൺ അതിരൂക്ഷമാകുമെന്ന് മുന്നറിയിപ്പ്

 

ആൽബർട്ടയിൽ ഇത്തവണത്തെ പോളൺ സീസൺ ഏറെ വെല്ലുവിളി നിറഞ്ഞതായിരിക്കുമെന്ന് ആരോഗ്യ വിദഗ്ധരുടെ മുന്നറിയിപ്പ്. തണുത്ത കാലാവസ്ഥയെത്തുടർന്ന് സീസൺ വൈകിയാണ് ആരംഭിച്ചതെങ്കിലും, വിവിധയിനം മരങ്ങളിൽ നിന്നുള്ള പൂമ്പൊടികൾ ഒരേസമയം വായുവിൽ കലരുന്നത് സാഹചര്യം സങ്കീർണ്ണമാക്കും.

സാധാരണഗതിയിൽ മാർച്ച് അവസാന ആഴ്ചയോടെ ആരംഭിക്കേണ്ട ഈ പ്രക്രിയ ഏപ്രിൽ പകുതിയോടെ ആണ് ഇത്തവണ സജീവമായത്. മാപ്പിൾ, സിഡാർ തുടങ്ങിയ മരങ്ങൾക്കൊപ്പം ബിർച്ച്, പോപ്ലർ തുടങ്ങിയവയും ഒരേസമയം പൂമ്പൊടി പുറത്തുവിടുന്നത് കടുത്ത അലർജിക്ക് കാരണമാകുമെന്ന് ഏറോബയോളജി റിസർച്ച് ലബോറട്ടറീസ് ഡയറക്ടർ ഡാനിയൽ കോട്ട്സ് വ്യക്തമാക്കി. കഴിഞ്ഞ 35 വർഷത്തിനിടയിൽ കാനഡയിൽ പാരഗരേണുവിൻ്റെ അളവ് ഇരട്ടിയായതായും, ആഗോളതാപനം മൂലം വരും വർഷങ്ങളിൽ ഇത് ഇനിയും വർദ്ധിക്കുമെന്നും അദ്ദേഹം കൂട്ടിച്ചേർത്തു.

അലർജി ലക്ഷണങ്ങളുള്ളവർ കൃത്യമായ പരിശോധനകൾ നടത്തി തങ്ങൾക്ക് ഏത് തരം പൂമ്പൊടിയോടാണ് അലർജിയെന്ന് തിരിച്ചറിയേണ്ടത് അത്യാവശ്യമാണെന്ന് റിപ്പോർട്ട് നിർദ്ദേശിക്കുന്നു. അലർജി ബാധിതർ പുറത്തിറങ്ങുമ്പോൾ മാസ്ക് ധരിക്കുക, വായുസഞ്ചാരം കുറവുള്ള സൺഗ്ലാസുകൾ ഉപയോഗിക്കുക, വസ്ത്രങ്ങൾ കൃത്യമായി കഴുകുക തുടങ്ങിയ പ്രതിരോധ മാർഗങ്ങൾ സ്വീകരിക്കേണ്ടതാണ്.

മഴയ്ക്ക് ശേഷം പുറത്തിറങ്ങുന്നത് വായുവിലെ പൂമ്പൊടിയുടെ അളവ് കുറയ്ക്കാൻ സഹായിക്കുമെങ്കിലും, ഫംഗസ് സ്പോറുകൾ വർദ്ധിക്കാൻ സാധ്യതയുള്ളതിനാൽ ജാഗ്രത പാലിക്കണം. വളർത്തുമൃഗങ്ങൾ പുറത്തുപോകുമ്പോൾ അവയുടെ രോമങ്ങളിൽ പൂമ്പൊടി പറ്റിപ്പിടിക്കാൻ സാധ്യതയുള്ളതിനാൽ, അലർജിയുള്ളവർ മൃഗങ്ങളെ കിടപ്പുമുറിയിൽ പ്രവേശിപ്പിക്കാതിരിക്കുന്നത് ഗുണകരമാകുമെന്നും വിദഗ്ധർ ശുപാർശ ചെയ്യുന്നു