മാനിറ്റോബയിലെ ആശുപത്രിയിൽ ഉറുമ്പ് ശല്യം; ശസ്ത്രക്രിയകൾ റദ്ദാക്കി

തെക്കൻ മാനിറ്റോബയിലെ മൊർഡൻ-വിങ്ക്ലർ മേഖലയിലുള്ള ബൗണ്ടറി ട്രയൽസ് ഹെൽത്ത് സെൻ്ററിൽ  ഉറുമ്പുകളുടെ വ്യാപനം കാരണം നിരവധി ശസ്ത്രക്രിയകൾ റദ്ദാക്കി. ഇതാദ്യമായല്ല ഈ ആശുപത്രിയിൽ ഇത്തരമൊരു സാഹചര്യം ഉണ്ടാകുന്നത്. ശസ്ത്രക്രിയാ മുറികളിലും മെഡിക്കൽ ഉപകരണങ്ങൾ സൂക്ഷിക്കുന്ന ഇടങ്ങളിലും ഉറുമ്പുകളെ കണ്ടെത്തിയതിനെത്തുടർന്ന് രോഗികളുടെ സുരക്ഷ മുൻനിർത്തിയാണ് അധികൃതർ ഈ തീരുമാനമെടുത്തത്.

അണുവിമുക്തമായി സൂക്ഷിക്കേണ്ട ഇടങ്ങളിൽ പ്രാണികളുടെ സാന്നിധ്യം ഉണ്ടാകുന്നത് ഗുരുതരമായ ആരോഗ്യപ്രശ്നങ്ങൾക്ക് കാരണമാകുമെന്നതിനാലാണ് അടിയന്തരമല്ലാത്ത ശസ്ത്രക്രിയകൾ മാറ്റിവെച്ചത്. ആശുപത്രി കെട്ടിടത്തിനുള്ളിൽ ഉറുമ്പുകൾ എങ്ങനെയെത്തി എന്ന് കണ്ടെത്താനുള്ള പരിശോധനകൾ ആരോഗ്യ വകുപ്പ് ഉദ്യോഗസ്ഥർ നടത്തിവരികയാണ്. കീടനിയന്ത്രണത്തിനുള്ള വിദഗ്ധ സംഘം നിലവിൽ ആശുപത്രിയിൽ ശുചീകരണ പ്രവർത്തനങ്ങൾ നടത്തി വരികയാണ്.

വരും ദിവസങ്ങളിൽ ശസ്ത്രക്രിയകൾ പുനരാരംഭിക്കാൻ കഴിയുമെന്നാണ് പ്രതീക്ഷിക്കുന്നതെന്ന് സതേൺ ഹെൽത്ത് അധികൃതർ അറിയിച്ചു. ശസ്ത്രക്രിയകൾ മാറ്റിവെച്ച രോഗികൾക്ക് പുതിയ തീയതികൾ പിന്നീട് അറിയിക്കുമെന്നും, അത്യാഹിത വിഭാഗത്തിൻ്റെ പ്രവർത്തനങ്ങളെ ഈ സാഹചര്യം ബാധിച്ചിട്ടില്ലെന്നും ആശുപത്രി വൃത്തങ്ങൾ വ്യക്തമാക്കി.