വാൻകൂവറിൽ ഡെലിവറി റോബോട്ടുകൾ എത്തുന്നു; ആറു മാസത്തെ പരീക്ഷണ പദ്ധതിക്ക് അനുമതി

 

നഗരത്തിലെ നടപ്പാതകളിലൂടെ ഭക്ഷണസാധനങ്ങൾ വിതരണം ചെയ്യുന്നതിനായി റോബോട്ടുകളെ ഉപയോഗിക്കുന്ന ആറുമാസത്തെ പരീക്ഷണ പദ്ധതിക്ക് വാൻകൂവർ സിറ്റി കൗൺസിൽ അംഗീകാരം നൽകി. അമേരിക്കൻ കമ്പനിയായ 'സെർവ് റോബോട്ടിക്സ്'  ആണ് ഈ പദ്ധതി നടപ്പിലാക്കുന്നത്. ഈ വർഷം അവസാനത്തോടെ ഡൗൺടൗൺ, കിറ്റ്‌സിലാനോ  മേഖലകളിൽ റോബോട്ടുകൾ പ്രവർത്തനം തുടങ്ങും.

കാറുകൾക്ക് പകരം വൈദ്യുതിയിൽ പ്രവർത്തിക്കുന്ന ഇത്തരം ചെറിയ റോബോട്ടുകൾ ഉപയോഗിക്കുന്നത് വഴി കാർബൺ പുറന്തള്ളൽ കുറയ്ക്കാനും ഡെലിവറി ചെലവ് ചുരുക്കാനും സാധിക്കുമെന്ന് അധികൃതർ കരുതുന്നു. ഗതാഗതക്കുരുക്ക് ഒഴിവാക്കാനും കുറഞ്ഞ ദൂരങ്ങളിലേക്ക് വേഗത്തിൽ ഭക്ഷണം എത്തിക്കാനും ഈ ഡെലിവറി രീതി സഹായിക്കുമെന്ന് കൗൺസിലർ മൈക്ക് ക്ലാസൻ പറഞ്ഞു.

അതേസമയം, നടപ്പാതകളിൽ റോബോട്ടുകൾ ഇറങ്ങുന്നതിനെതിരെ ചില കോണുകളിൽ നിന്ന് ആശങ്കയും ഉയരുന്നുണ്ട്. കാൽനടയാത്രക്കാർക്കും പ്രത്യേകിച്ച് ഭിന്നശേഷിക്കാർക്കും ഈ റോബോട്ടുകൾ തടസ്സമാകുമോ എന്നതാണ് പ്രധാന ഭയം. സുരക്ഷാ പ്രശ്നങ്ങൾ കണക്കിലെടുത്ത് ടൊറൻ്റോ നഗരം ഇത്തരം റോബോട്ടുകൾക്ക് നിരോധനം ഏർപ്പെടുത്തിയത് കൗൺസിലർ ലൂസി മലോണി ചൂണ്ടിക്കാട്ടി.

എന്നാൽ, സെൻസറുകൾ ഉപയോഗിച്ച് സ്വയം സഞ്ചരിക്കുന്ന ഈ റോബോട്ടുകൾക്ക് എന്തെങ്കിലും പ്രയാസം നേരിട്ടാൽ ഉടൻ തന്നെ ഒരു ഹ്യൂമൻ ഓപ്പറേറ്ററുടെ സഹായം തേടാൻ കഴിയുമെന്നും, കാറുകളെ അപേക്ഷിച്ച് ഇവ അപകടസാധ്യത കുറഞ്ഞവയാണെന്നും കമ്പനി അധികൃതർ വ്യക്തമാക്കുന്നു. ആറുമാസത്തെ നിരീക്ഷണത്തിന് ശേഷം ലഭിക്കുന്ന ഫലത്തിൻ്റെ അടിസ്ഥാനത്തിലായിരിക്കും പദ്ധതി തുടരുന്ന കാര്യത്തിൽ നഗരസഭ അന്തിമ തീരുമാനമെടുക്കുക