സിറ്റി ഓഫ് കാൽഗറിയുടെ പേരിൽ വ്യാജ സന്ദേശങ്ങൾ; ജാഗ്രതാ നിർദ്ദേശവുമായി പോലീസ്

സിറ്റി ഓഫ് കാൽഗറിയുടെ  പേരിൽ നഗരവാസികൾക്കിടയിൽ വ്യാപകമായി വ്യാജ സന്ദേശങ്ങൾ പ്രചരിക്കുന്നതായി പോലീസും സിറ്റി ഉദ്യോഗസ്ഥരും മുന്നറിയിപ്പ് നൽകി. നിശ്ചിത തീയതിക്കുള്ളിൽ പണമടച്ചില്ലെങ്കിൽ നഗരസഭയുടെ നിയമങ്ങൾക്കനുസൃതമായി കർശനമായ നടപടികൾ സ്വീകരിക്കുമെന്ന് ഭീഷണിപ്പെടുത്തുന്ന തരത്തിലാണ് ഈ സന്ദേശങ്ങൾ. വ്യക്തിഗത വിവരങ്ങളോ പണമോ തട്ടിയെടുക്കാൻ ലക്ഷ്യമിട്ടുള്ള 'സ്മിഷിംഗ്' അഥവാ എസ്എംഎസ് ഫിഷിംഗ് രീതിയാണിതെന്ന് വാർഡ് 11 കൗൺസിലർ റോബ് വാർഡ് വ്യക്തമാക്കി.

ആളുകളിൽ ഭയവും പരിഭ്രാന്തിയും സൃഷ്ടിച്ച് വേഗത്തിൽ പ്രതികരിക്കാൻ പ്രേരിപ്പിക്കുന്ന തരത്തിലുള്ളതാണ് മെസേജുകൾ. 
ടിക്കറ്റ് അറിയിപ്പുകൾക്കോ പേയ്‌മെൻ്റ് അഭ്യർത്ഥനകൾക്കോ വേണ്ടി തങ്ങൾ ഒരിക്കലും ടെക്സ്റ്റ് മെസേജുകൾ ഉപയോഗിക്കാറില്ലെന്ന് സിറ്റി ഓഫ് കാൽഗറി അധികൃതർ ഔദ്യോഗികമായി അറിയിച്ചു. വെറും രണ്ട് ദിവസത്തിനുള്ളിൽ മൂവായിരത്തിലധികം ആളുകളാണ് സംശയാസ്പദമായ ഇത്തരം സന്ദേശങ്ങളെക്കുറിച്ച് നഗരസഭയുടെ 311 ഹെൽപ്പ് ലൈനിൽ പരാതിപ്പെട്ടത്. ഇത്തരത്തിലുള്ള തട്ടിപ്പുകൾക്ക് ഇരയായവർ എത്രയും വേഗം പോലീസിൽ റിപ്പോർട്ട് ചെയ്യണമെന്നും, ബാങ്കുകളെ വിവരമറിയിച്ച് തട്ടിപ്പ് രേഖപ്പെടുത്തണമെന്നും വിദഗ്ധർ നിർദ്ദേശിക്കുന്നു. അപരിചിതമായ ലിങ്കുകളിൽ ക്ലിക്ക് ചെയ്യുന്നതിനെതിരെ അതീവ ജാഗ്രത പാലിക്കണമെന്നും അധികൃതർ മുന്നറിയിപ്പ് നൽകുന്നു.