ലേക്ക് മഹാഗണിയിൽ മുങ്ങിമരിച്ച പന്ത്രണ്ടുകാരന് കണ്ണീരോടെ വിട നല്കി കാല്ഗറി

ലേക്ക് മഹാഗണിയിൽ മുങ്ങിമരിച്ച പന്ത്രണ്ടുകാരന് കണ്ണീരോടെ വിട നല്കി കാല്ഗറി. കുട്ടിയുടെ കുടുംബാംഗങ്ങളും സുഹൃത്തുക്കളും നാട്ടുകാരും ഉൾപ്പെടെ നൂറുകണക്കിന് ആളുകൾ സംസ്കാര ചടങ്ങുകളിൽ പങ്കെടുത്തു. തടാകത്തിന് സമീപം കളിച്ചുകൊണ്ടിരുന്ന കുട്ടി അബദ്ധത്തിൽ വെള്ളത്തിൽ വീഴുകയായിരുന്നു. രക്ഷാപ്രവർത്തകർ ഉടനടി സ്ഥലത്തെത്തി കുട്ടിയെ രക്ഷിക്കാൻ ശ്രമിച്ചെങ്കിലും ജീവൻ രക്ഷിക്കാനായില്ല. അന്ന് വൈകുന്നേരത്തോടെയാണ് മൃതദേഹം കണ്ടെടുത്തത്. - പഠനത്തിൽ മിടുക്കനും സഹപാഠികൾക്കും അധ്യാപകർക്കും പ്രിയങ്കരനുമായ കുട്ടിയുടെ വേർപാട് സ്കൂളിനെയും നാട്ടുകാരെയും ഒരുപോലെ ദുഃഖത്തിലാഴ്ത്തി. ലളിതമായ ചടങ്ങുകളോടെ പ്രാദേശിക ചർച്ചിലായിരുന്നു സംസ്കാരം നടന്നത്.

അപകടത്തെത്തുടർന്ന് മഹാഗണി മേഖലയിലെ താമസക്കാർക്കിടയിൽ സുരക്ഷാ ആശങ്കകൾ ശക്തമായിട്ടുണ്ട്. തടാകത്തിന് ചുറ്റും കൂടുതൽ മുന്നറിയിപ്പ് ബോർഡുകളും വേലികളും സ്ഥാപിക്കണമെന്നും കുട്ടികളുടെ സുരക്ഷ ഉറപ്പാക്കാൻ കർശനമായ നടപടികൾ വേണമെന്നും നാട്ടുകാർ ആവശ്യപ്പെട്ടു. തങ്ങളെ സഹായിച്ചവർക്കും പ്രാർത്ഥനകൾക്കും നന്ദി പറയുന്നതായി കുട്ടിയുടെ കുടുംബം അറിയിച്ചു. കമ്മ്യൂണിറ്റിയെ ഒന്നടങ്കം നടുക്കിയ ഈ ദുരന്തത്തിൻ്റെ പശ്ചാത്തലത്തിൽ ജലാശയങ്ങൾക്ക് സമീപം കൂടുതൽ ജാഗ്രത പാലിക്കണമെന്ന് അധികൃതർ നിർദ്ദേശിച്ചു.