സുരക്ഷാ പരിശോധന കടുപ്പിച്ച് ഹൈഡ്രോ വൺ; സ്വകാര്യതയുടെ ലംഘനമെന്ന് ലേബർ ആർബിട്രേറ്റർ

ഒൻ്റാരിയോയിലെ ഏറ്റവും വലിയ വൈദ്യുതി വിതരണ കമ്പനിയായ ഹൈഡ്രോ വൺ നടപ്പിലാക്കിയ കർശനമായ സുരക്ഷാ പരിശോധനകൾ അനാവശ്യവും ജീവനക്കാരുടെ സ്വകാര്യതയിലേക്കുള്ള കടന്നുകയറ്റവും ആണെന്ന് ലേബർ ആർബിട്രേറ്റർ വിധിച്ചു. 2015-ൽ ഐസിസ് റിക്രൂട്ടറായി പ്രവർത്തിച്ചിരുന്ന ഒരു വിദ്യാർത്ഥി കമ്പനിയിൽ ജോലി ചെയ്തിരുന്നുവെന്ന വെളിപ്പെടുത്തലിനെ തുടർന്നാണ് ഹൈഡ്രോ വൺ പരിശോധനകൾ കടുപ്പിച്ചത്. ചൈനീസ്, റഷ്യൻ ചാരന്മാരുമായി ബന്ധമുള്ളവരെ തടയാൻ ഇത്തരം പരിശോധനകൾ അത്യാവശ്യമാണെന്ന് കമ്പനി വാദിച്ചെങ്കിലും, നിലവിലുള്ള ജീവനക്കാരുടെ ക്രെഡിറ്റ് ഹിസ്റ്ററിയും ഡ്രൈവിംഗ് റെക്കോർഡുകളും പരിശോധിക്കുന്നത് നീതീകരിക്കാനാവില്ലെന്ന് ആർബിട്രേറ്റർ ജോൺ സ്റ്റൗട്ട് വ്യക്തമാക്കി.

രാജ്യത്തിൻ്റെ സുപ്രധാന അടിസ്ഥാന സൗകര്യങ്ങൾ വിദേശ ശക്തികളുടെ ഭീഷണിയിലാണെന്ന് രഹസ്യാന്വേഷണ ഏജൻസികൾ മുന്നറിയിപ്പ് നൽകുന്ന സാഹചര്യത്തിലാണ് ഈ തീരുമാനം വരുന്നത്. സുരക്ഷാ മുൻകരുതലുകൾ എടുക്കുമ്പോൾ തന്നെ തൊഴിലാളികളുടെ അവകാശങ്ങളും സ്വകാര്യതയും സംരക്ഷിക്കപ്പെടണമെന്ന് യൂണിയനുകൾ വാദിച്ചു. പുതിയതായി ജോലിയിൽ പ്രവേശിക്കുന്നവർക്ക് ഈ കർശന പരിശോധനകൾ ബാധകമാക്കാമെങ്കിലും, നിലവിലുള്ള ജീവനക്കാരെ ഇതിനായി നിർബന്ധിക്കുന്നത് അവരുടെ ഉപജീവനത്തെ ബാധിക്കുന്ന തീരുമാനമാണെന്ന് വിധിയിൽ ചൂണ്ടിക്കാട്ടി. വിധിയുടെ അടിസ്ഥാനത്തിൽ സുരക്ഷാ നയത്തിൽ മാറ്റം വരുത്തുമെന്ന് ഹൈഡ്രോ വൺ അറിയിച്ചു.