കാനഡയിലെ ഇടത്തരം നഗരങ്ങൾ വളർച്ചയുടെ പാതയിൽ; ബഹുനില കെട്ടിടങ്ങളുടെ നിർമ്മാണത്തിൽ വൻ വർധനവ്

കാനഡയിലെ ഇടത്തരം നഗരങ്ങൾ വളർച്ചയുടെ പുതിയ പാതയിലാണെന്ന് പുതിയ റിപ്പോർട്ടുകൾ സൂചിപ്പിക്കുന്നു. ഈ നഗരങ്ങളിൽ വീടുകൾക്ക് പകരം അപ്പാർട്ട്മെന്റുകളുടെ  നിർമ്മാണമാണ് ഇപ്പോൾ വൻതോതിൽ നടക്കുന്നത്. ഹാലിഫാക്സ്, ലണ്ടൻ, കെലോണ തുടങ്ങിയ നഗരങ്ങളിലാണ് പ്രധാനമായും ഈ മാറ്റം ദൃശ്യമാകുന്നത്. ഭൂമിയുടെ വില വർധനവും ജനസംഖ്യാ വളർച്ചയുമാണ് ഈ മാറ്റത്തിന് പ്രധാന കാരണങ്ങൾ.

വിക്ടോറിയ, അബോട്ട്സ്‌ഫോർഡ്, കിച്ചനർ-വാട്ടർലൂ തുടങ്ങിയ നഗരങ്ങളിൽ നടക്കുന്ന പുതിയ നിർമ്മാണങ്ങളിൽ പത്തിൽ ഒൻപതും അപ്പാർട്ട്‌മെൻ്റുകളോ ബഹുനില കെട്ടിടങ്ങളോ ആണെന്ന് കാനഡ മോർട്ട്ഗേജ് ആൻഡ് ഹൗസിംഗ് കോർപ്പറേഷൻ (CMHC) പുറത്തുവിട്ട കണക്കുകൾ സൂചിപ്പിക്കുന്നു. കഴിഞ്ഞ 15 വർഷത്തിനിടെ ഒറ്റപ്പെട്ട വീടുകൾ എന്ന സങ്കൽപ്പത്തിൽ നിന്ന് മാറി ഉയർന്ന ജനസാന്ദ്രതയുള്ള പാർപ്പിട സമുച്ചയങ്ങളിലേക്ക് ഈ നഗരങ്ങൾ ചുവടുമാറ്റിക്കഴിഞ്ഞു. 

എന്നാൽ,  ഈ നിർമ്മാണങ്ങൾ ഒന്നും നഗരങ്ങളിലെ വാടക കുറയ്ക്കാൻ സഹായിക്കുന്നില്ലെന്നത് വലിയ ആശങ്കയുയർത്തുന്നുണ്ട്. ഹാലിഫാക്സ് പോലുള്ള നഗരങ്ങളിൽ നിർമ്മാണ പ്രവർത്തനങ്ങൾ വൻതോതിൽ നടക്കുന്നുണ്ടെങ്കിലും, അവ സാധാരണക്കാർക്ക് താങ്ങാനാവുന്നതിലും അപ്പുറമാണെന്ന് വിദഗ്ധർ അഭിപ്രായപ്പെടുന്നു. ലാഭവിഹിതം ലക്ഷ്യമിട്ട് നിർമ്മിക്കുന്ന ആഡംബര യൂണിറ്റുകൾക്ക് മുൻഗണന നൽകുന്നത് മൂലം കുറഞ്ഞ വരുമാനക്കാർക്കും വിദ്യാർത്ഥികൾക്കും വീട് കണ്ടെത്തുക പ്രയാസകരമാകുന്നുണ്ടെന്നും ഇവർ പറയുന്നു. നഗരങ്ങൾ വികസിക്കുമ്പോഴും പാർപ്പിടങ്ങളുടെ ലഭ്യതയും അവയുടെ താങ്ങാനാവുന്ന വിലയും തമ്മിലുള്ള വലിയ വ്യത്യാസം കാനഡയിലെ ഭവന പ്രതിസന്ധി കൂടുതൽ സങ്കീർണ്ണമാക്കുകയാണ്.