കാനഡയിൽ അന്താരാഷ്ട്ര വിദ്യാർത്ഥികളുടെ എണ്ണത്തിൽ വൻ ഇടിവ് : ഒൻ്റാരിയോയിൽ പ്രതിസന്ധി രൂക്ഷം

 

കാനഡയിൽ അന്താരാഷ്ട്ര വിദ്യാർത്ഥികളുടെ എണ്ണത്തിൽ വൻ ഇടിവ്.  അന്താരാഷ്ട്ര വിദ്യാർത്ഥികളുടെ എണ്ണം കോവിഡ് മഹാമാരിയുടെ കാലഘട്ടത്തിന് സമാനമായ നിലയിലേക്കാണ് കുറഞ്ഞത്. താൽക്കാലിക താമസക്കാരുടെ എണ്ണം കുറയ്ക്കുന്നതിനായി ഫെഡറൽ സർക്കാർ പഠന അനുമതി പത്രങ്ങൾക്ക് പരിധി നിശ്ചയിച്ചതാണ് ഈ ഇടിവിന് കാരണമെന്ന് സ്റ്റാറ്റിസ്റ്റിക്സ് കാനഡ വ്യക്തമാക്കി. 2024 ജനുവരിയിലാണ് ഈ നിയന്ത്രണങ്ങൾ സർക്കാർ നടപ്പിലാക്കിയത്. ഇതിനെത്തുടർന്ന് 2024-2025 അധ്യയന വർഷത്തിൽ വിദ്യാർത്ഥികളുടെ എണ്ണത്തിൽ നാല് ശതമാനം കുറവുണ്ടായി.

എന്നാൽ 2025-2026 കാലയളവിൽ ഇത് 26 ശതമാനമായി കുത്തനെ ഇടിഞ്ഞു. വർഷങ്ങളായി അന്താരാഷ്ട്ര വിദ്യാർത്ഥികളുടെ എണ്ണത്തിലുണ്ടായ വളർച്ച ഇതോടെ ഇല്ലാതായിരിക്കുകയാണ്. 2003 മുതൽ 2023 വരെയുള്ള കാലയളവിൽ വിദ്യാർത്ഥികളുടെ എണ്ണം എട്ടിരട്ടി വർദ്ധിച്ചിരുന്നു. കോളേജുകളെയാണ് പുതിയ പ്രതിസന്ധി ഏറ്റവും കൂടുതൽ ബാധിച്ചിട്ടുള്ളത്. 2025-2026 കാലയളവിൽ കോളേജ് പ്രവേശനത്തിൽ 40 ശതമാനം കുറവുണ്ടായി.

2023-2024 അധ്യയന വർഷത്തെ അപേക്ഷിച്ച് കോളേജുകളിൽ 42 ശതമാനം ഇടിവാണ് രേഖപ്പെടുത്തിയിരിക്കുന്നത്. സർവ്വകലാശാലകളിൽ ഇതേ കാലയളവിൽ 17 ശതമാനം കുറവുണ്ടായി. ഇതോടെ സർവ്വകലാശാലകളിലെ വിദ്യാർത്ഥികളുടെ എണ്ണം 2019-2020 കാലത്തെ നിലയിലേക്ക് തിരിച്ചെത്തി. കാനഡയിലെ പ്രവിശ്യകളിൽ ഒൻ്റാരിയോയിലാണ് ഏറ്റവും വലിയ ഇടിവ് സംഭവിച്ചത്. ഒൻ്റാരിയോയിൽ 2024-2025-ൽ ആറ് ശതമാനവും തൊട്ടടുത്ത വർഷം 36 ശതമാനവും വിദ്യാർത്ഥികൾ കുറഞ്ഞു.

കാനഡയിലെ മൊത്തം അന്താരാഷ്ട്ര വിദ്യാർത്ഥികളിൽ പത്തിൽ ആറുപേരും ഒൻ്റാരിയോയിലാണ് പഠിച്ചിരുന്നത്. എന്നാൽ ഇപ്പോഴത്തെ സാഹചര്യത്തിൽ അത് 54 ശതമാനമായി കുറഞ്ഞു. 2027-ഓടെ കാനഡയിലെ മൊത്തം ജനസംഖ്യയിൽ താൽക്കാലിക താമസക്കാരുടെ എണ്ണം അഞ്ച് ശതമാനത്തിന് താഴെ എത്തിക്കുക എന്നതാണ് സർക്കാരിൻ്റെ ലക്ഷ്യം.