കോൾ സെൻ്ററുകളിൽ എഐ 'ശബ്ദ മാറ്റം': കാനഡയിൽ പ്രതിഷേധം ശക്തമാകുന്നു

കനേഡിയൻ ടെലികോം കമ്പനികൾ കോൾ സെൻ്റർ ജീവനക്കാരുടെ സംസാരശൈലി കൃത്രിമബുദ്ധി (AI) ഉപയോഗിച്ച് സംസാരശൈലി മാറ്റുന്നതിനെതിരെ കാനഡയിലെ യൂണിയനുകളും അക്കാദമിക് വിദഗ്ധരും രംഗത്തെത്തി. വിദേശ തൊഴിലാളികളുടെ ശബ്ദം മാറ്റി, അവർ കാനഡയിലുള്ളവരെപ്പോലെ സംസാരിക്കുന്നു എന്ന് തോന്നിപ്പിക്കാനാണ് ഈ സാങ്കേതികവിദ്യ ഉപയോഗിക്കുന്നത്. ഈ രീതി ഉപഭോക്താക്കളെ തെറ്റിദ്ധരിപ്പിക്കലാണെന്ന് യൂണിയൻ നേതാക്കൾ പറയുന്നു. ഇത് കാനഡയിലെ പ്രാദേശിക തൊഴിലവസരങ്ങളെ ഇല്ലാതാക്കുമെന്നും അവർ മുന്നറിയിപ്പ് നൽകി.

ഏപ്രിൽ 30-ന് നടന്ന പാർലമെൻ്ററി കമ്മിറ്റിയിൽ ഈ വിഷയം ചർച്ചയായി. കാനഡയിലെ ഒരു പ്രമുഖ കമ്പനി ഈ സാങ്കേതികവിദ്യ ഉപയോഗിക്കുന്നുണ്ടെന്ന് യൂണിഫോർ  ഡയറക്ടർ റോച്ച് ലെബ്ലാങ്ക് വെളിപ്പെടുത്തി. കമ്പനിയുടെ പേര് അദ്ദേഹം നേരിട്ട് പറഞ്ഞില്ലെങ്കിലും ടെലസ് ഡിജിറ്റലിൻ്റെ വെബ്‌സൈറ്റിലേക്കാണ് അദ്ദേഹം വിരൽ ചൂണ്ടിയത്. സംസാരശൈലി ലഘൂകരിക്കുന്നതിനായി ഒരു എഐ സ്ഥാപനവുമായി പങ്കാളിത്തം പ്രഖ്യാപിച്ചതായി ടെലസ് നേരത്തെ അറിയിച്ചിരുന്നു. അതേസമയം, ഇത്തരത്തിലുള്ള സാങ്കേതികവിദ്യ ഉപയോഗിക്കുന്നില്ലെന്ന് റോജേഴ്‌സും ബെല്ലും വ്യക്തമാക്കി. 

സംസാരത്തിലെ പ്രാദേശിക ശൈലികൾ കുറയ്ക്കാൻ എഐ ടൂളുകൾക്ക് തത്സമയം സാധിക്കും. ഇന്ത്യയിലും ഫിലിപ്പീൻസിലുമാണ് കാനഡയുടെ ഭൂരിഭാഗം കോൾ സെൻ്ററുകളും പ്രവർത്തിക്കുന്നത്. ചിലവ് കുറയ്ക്കുന്നതിനായി കനേഡിയൻ കമ്പനികൾ ഈ ജോലികൾ പുറംകരാർ നൽകുകയാണ് ചെയ്യുന്നത്. ഇക്കാര്യത്തിൽ ഫെഡറൽ തലത്തിൽ കനേഡിയൻ ടെലികമ്മ്യൂണിക്കേഷൻ വർക്കേഴ്സ് അലയൻസ് പരാതി ഉന്നയിച്ചിട്ടുണ്ട്. കൃത്രിമബുദ്ധി എവിടെയൊക്കെ ഉപയോഗിക്കുന്നു എന്ന് അറിയാൻ കനേഡിയൻ ജനതയ്ക്ക് അവകാശമുണ്ടെന്ന് അവർ പറഞ്ഞു. ഈ നടപടി വഞ്ചനാപരമാണെന്നും കാനഡയിലെ തൊഴിലുകൾ കവർന്നെടുക്കുന്നതിന് തുല്യമാണെന്നും അക്കാദമിക് വിദഗ്ധരും മുന്നറിയിപ്പ് നൽകി. എന്നാൽ, ആശയവിനിമയം കൂടുതൽ വ്യക്തമാക്കാൻ ഈ സാങ്കേതികവിദ്യ സഹായിക്കുമെന്നാണ് മറ്റ് ചിലരുടെ വാദം.